ޔުނިކްސް ސްޕޯޓިންގެ ފަރާތުން އިންތިޒާމުކޮށްގެން ކުރިއަށްގެންދާ ފައިގަތަޅާ ފޯރި މުބާރާތް ފަށައިފިއެވެ.

މި މުބާރާތަކީ ޔުނިކްސް ސްޕޯޓިން އާއި މޯލްޑިވްސް ސްޕޯޓްސް ކޯޕަރޭޝަން ގުޅިގެން ކުރިއަށް ގެންދާ މުބާރާތެކެވެ. މިއަހަރުގެ މުބާރާތް ހޯސްޓް ކުރަނީ ހައުސިން ޑިވެލޮޕްމަންޓް ކޯޕަރެޝަން (އެޗް.ޑީ.ސީ)އިންނެވެ. އަދި ސަޕޯޓިން ޕާޓްނަރަކީ ރޯޑް ޑިވެލޮޕްމަންޓް ކޯޕަރޭޝަން (އާރު.ޑީ.ސީ)އެވެ.

މުބާރާތުގެ ފުރަތަމަ މެޗު ކުޅެފައިވަނީ ބުދަ ދުވަހުގެ ހަވީރުއެވެ. އަންހެން އަދި ފިރިހެން، ދެ ޑިވިޝަނަަށް ކުރިއަށްދާ މުބާރާތުގައި ފުރަތަމަ އޮތީ އަންހެން ޑިވިޝަންގެ މެޗެކެވެ. އެ މެޗުގައި މުލަ މޯލްޑިވްސް ނުކުތީ ފެމިލީ ކޯޓާ ދެކޮޅަށެވެ. އެ މެޗު 28-20 ން ކާމިޔާބުކުރީ ފެމިލީ ކޯޓެވެ.

މުބާރާތުގެ ދެ ވަނަ މެޗަކަށް ކުޅުނީ ފިރިހެން ޑިވިޝަންގެ މެޗެކެވެ. އެ މެޗުގައި ޔޫތު ކުލަބުން ނުކުތީ މުލަ މޯލްޑިވްސްއާ ދެކޮޅަށެވެ. މި މެޗު 27-24 ން ކާމިޔާބުކުރީ ޔޫތު ކުލަބެވެ. މި މެޗުގައި މިނިސްޓަރު މަޚްލޫފް ވަނީ ލަނޑެއް ހަދާފައެވެ. މިއީ މުބާރާތުގެ ފުރަތަމަ ލަނޑެވެ. އެއީ ފުރަތަމަ 12 ބޯޅަ ހަމަކޮށްގެން ހެދި ލަނޑެވެ.

މުބާރާތުގެ އަންހެން ޑިވިޝަންގައި ބުދަ ދުވަހު ކުޅުނު އެހެން މެޗުތަަކަށް ބަލާއިރު، ޓްރެޑެނެޓުން ވަނީ 26-12 ން މޯލްޑިވްސް ޕޯޓް ބަލިކޮށްފައެވެ. ކަސްޓަމްސް ރެކްރިއޭޝަން ކުލަބުން ވަނީ 28-9 ން ޔޫތު ކުލަބް ބަލިކޮށްފައެވެ. ޕެންޝަން އޮފީހައި އެޗް.ޑީ.ސީ ބައްދަލުކުރި މެޗު 25-19 ން ކާމިޔާބުކުރީ ޕެންޝަން އޮފީހެވެ. އަދި ފަހު މެޗުގައި ސްޓެލްކޯ ކުލަބުން ވަނީ 26-17 ން އާރު.ޑީ.ސީ ބަލިކޮށްފައެވެ.

ފިރިހެން ޑިވިޝަންގެ މެޗުތަކަށް ބަލާއިރު، އެމް.ސީ.ބީ އާއި މޯލްޑިވްސް ޕޯސްޓް ބައްދަލުކުރި މެޗު 16-15 ން ކާމިޔާބުކުރީ މޯލްޑިވްސް ޕޯސްޓެވެ. މީރާ އާއި މިފްކޯ ބައްދަލުކުރި މެޗު 22-19 ން މިފްކޯ ކާމިޔާބުކުރިއިރު، އާރު.ޑީ.ސީއާއި ކަސްޓަމްސް ރެކްރިއޭޝަން ކުލަބް ބައްދަލުކުރި މެޗު 22-16 ން ކާމިޔާބުކުރީ އާރު.ޑީ.ސީއެވެ. ބުދަ ދުވަހުގެ ފަހު މެޗުގައި އެމް.އައި.ބީ އާއި ޕެންޝަން އޮފީސް ބައްދަލުކުރި މެޗު 24-16 ން ކާމިޔާބުކުރީ ޕެންޝަން އޮފީހެވެ.

މުބާރާތުގައި ޖުމުލަ 38 ޓީމު ވާދަކުރެއެވެ. އެއީ އަންހެން 18 ޓީމާއި ފިރިހެން 20 ޓީމެވެ. މުބާރާތުގެ ގްރޫޕް ސްޓޭޖުގައި 81 މެޗު ކުޅޭނެއެވެ. އެއީ ބުދަ ދުވަހުން ފެށިގެން ހޮނިހިރު ދުވަހުގެ ނިޔަލަށެވެ. މެޗުތައް ކުރިއަށްދާނީ ހަވީރު 4-6 ށް އަދި ރޭގަނޑު 8-11 އަށެވެ.