އިންޓަރނޭޝަނަލް ޔޯގާ ޑޭ ރާއްޖޭގައި ފާހަގަކުރުމަށް ބޭއްވި ހަރަކާތުގެ ތެރެއިން ހިންގި ހަމަނުޖެހުމުގައި ސިޔާސީ ޕާޓީއެއްގެ ބައިވެރިވުން އޮތްނަމަ ފިޔަވަޅުއަޅާނެކަމަށް އިލެކްޝަންސް ކޮމިޝަންގެ ނާއިބު ރައީސް އިސްމާއީލް ހަބީބު ވިދާޅުވެއްޖެއެވެ.
ރާއްޖެެއެމްވީއަށް މައުލޫމާތު ދެއްވަމުން ހަބީބު ވިދާޅުވީ، ސިޔާސީ ޕާޓީއެއްގެ ބައިވެރިވުން އޮތްކަމަށްވާނަމަ ކޮމިޝަނަށް އެ ޕާޓީއެއް ހާޒިރުކޮށް، ކޮމިޝަނުން ފިޔަވަޅުއަޅާނެ ކަމަށެވެ. އަދި ހިނގައިދިޔަ ކަންތައްތަކާ ގުޅިގެން ކޮމިޝަނުން ބަޔާނެއްވެސް ނެރޭނެކަމަށެވެ.
ހަބީބު މިހެން ވިދާޅުވެފައިވާއިރު، ބައިނަލްއަގުވާމީ ޔޯގާ ދުވަސް ފާހަގަކުރުމަށް ގަލޮޅު ރަސްމީ ދަނޑުގައި ބޭއްވި ހަރަކާތް ހުއްޓުވުމަށް ހަމަނުޖެހުން ހިންގި މީހުން ބޭނުންކުރި ބައެއް އާލާތްތައް ނެރެފައިވަނީ ޕީޕީއެމް އޮފީހުންކަމަށް ފުލުހުން ވަނީ ބުނެފައެވެ.
ގަލޮޅު ދަނޑުގައި ކުރިއަށްގެންދިޔަ މި ހަރަކާތަށް ހުރަސްއަޅައި، އެ ހަރަކާތުގައި ބައިވެރިވި ބޭރު ގައުމުތަކުގެ ސަފީރުންނާއި ޑިޕްލޮމެޓުންނާއި އާންމުންނާ ދެކޮޅަށް، ބިރުވެރިކަން އުފެދޭ ގޮތަށް އެތަނަށް ބަޔަކު ވަދެގަނެ، ބައެއް މީހުންނަށް ހަމަލާދީ، ތަކެއްޗަށް ގެއްލުންދީފައިވާ މައްސަލަ ސީރިއަސް މައްސަލައެއްގެ ގޮތުގައި ފުލުހުންގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓުން ތަހުގީގުކުރަމުންދާކަމަށެވެ.
މި ހާދިސާ ހިނގުމަށް މެދުވެރިވި ސަބަބުތައް ބަލައި ފުލުހުން ރެސްޕޮންޑުކުރިގޮތުގެ އިންޓަރނަލް ރިވިއުއެއް ކުރާނެކަމުގެ ޔަގީންކަންދޭކަމަށް ވެސް ފުލުހުން ބުނެއެވެ.
މީގެ އިތުރުން ފުލުހުން ވަނީ، އެ ހާދިސާއާގުޅޭ މައުލޫމާތާއި ފޮޓޯއާއި ވީޑިއޯ ފޮނުވުމަށް އޮންލައިން ޕޯޓަލްއެއް ގާއިމް ކޮށްފައެވެ. އެ ޕޯޓަލްއަށް މައުލޫމާތާއި ފޮޓޯއާއި ވީޑިއޯ ފޮނުވާ މީހުންގެ ސިއްރުކަން ހިފަހައްޓާނެކަމަށް ފުލުހުން ވަނީ ބުނެފައެވެ.
