ޓީމުގައި ހުންނަން ބޭނުންނުވާ ކުޅުންތެރިން ބޭނުމެއް ނޫން: ގާޑިއޯލާ

ކުޅުންތެރިޔަކު ޓީމުގައި ހުންނަން ބޭނުންނުވާނަމަ، އޭނާ ޓީމުގައި ބަހައްޓަން ނޭދޭ ކަމަށް މެންޗެސްޓަރ ސިޓީގެ ކޯޗު ޕެޕް ގާޑިއޯލާ ބުނެފިއެވެ.

ގާޑިއޯލާ މިހެން ބުނީ ސްޕެއިންގެ ގަދަ އެއް ބާރު ބާސެލޯނާއިން ސިޓީއަށް ކުޅެމުން އަންނަ ޕޯޗުގަލްގެ ބެނާޑޯ ސިލްވާ ހޯދުމުގެ މަސައްކަތް ކުރާކަމަށް ވާހަކަތައް ދެކެވެނިކޮށެވެ. ބާސާއާއި ސިޓީއާ ދެމެދު އޯގަސްޓު މަހުގެ 24 ވަނަ ދުވަހު ކުޅޭ މެޗުގެ ކުރިން ބާސާގެ ރައީސް ޖޯން ލަޕޯޓާ ވަނީ ސިލްވާ ބާސެލޯނާއަށް ކުޅުމުގެ ފުުރުސަތާ ގުޅޭ ގޮތުން ވާހަކަ ދައްކާފައެވެ.

އެކަމަށް ރައްދު ދެމުން ގާޑިއޯލާ ބުނީ އޯގަސްޓު 24 ގައި އޮންނަ މެޗަށް ސިޓީ ނިކުންނާނީ ސިލްވާއާއެކު އިތުރު 10 ކުޅުންތެރިންނާއެކު ކަމަށެވެ. މީގެ އިތުރުން ގާޑިއޯލާ ބުނީ ސިޓީ އާއި ބާސާ ކަހަލަ ބޮޑެތި ޓީމުތަކަށް ކުޅެން ކޮންމެ ކުޅުންތެރިޔަކު ވެސް ބޭނުންވާނެ ކަމަށެވެ. ނަމަވެސް އޭނާއަށް ގަބޫލުކުރެވޭ ގޮތުގައި ސިލްވާ ސިޓީގައި މަޑު ކުރާނެ ކަމަށް ގާޑިއޯލާ ބުންޏެވެ. ސިޓީގެ އަމާޒާއި، ކުލަބެއްގެ ގޮތުގައި ސިޓީ ކުރިއަށްދާނެ ކަމަށާއި، ސިޓީގައި މަޑުކުރުމާއި ނުކުރުމަކީ ސިލްވާގެ އަމިއްލަ ކަމެއް ކަމަށް ވެސް ގާޑިއޯލާ ބުންޏެވެ. އިތުރަށް ގާޑިއޯލާ ބުނީ އަބަދުވެސް އޭނާ ގެންގުޅޭ އުސޫލެއް އޮންނަ ކަމަށެވެ. އެއީ އެއްވެސް ކުޅުންތެރިޔަކު ޓީމުގައި ހުންނަން ބޭނުންނުވާނަމަ، އެ ކުޅުންތެރިޔަކި ޓީމުގައި ބަހައްޓަން ބޭނުން ނުުވާ ކަމަށެވެ.

މިކަމާ ގުޅިގެން ލަޕޯޓާ ބުނީ ބާސާއި މޮޅެތި ކުޅުންތެރިން ހިމަނަން އޭނާ ބޭނުންވާ ކަމަށެވެ. އަދި ބާސާއަކީ ރަނގަޅު މޮޅު ޓީމަކަށް ހެދުމަށް އޭނާ ބުރަކޮށް މަސައްކަތް ކުރާ ކަމަށެވެ. މީގެ އިތުރުން ލަޕޯޓާ ބުނީ އަންނަ ސީޒަނުގައި މޮޅު ޓީމެއް ދެއްކުމަށް މަސައްކަތް ކުރާ ކަމަށެވެ.