2014 އިން ފެށިގެންވެސް އިންޓަރނޭޝަނަލް ޔޯގާ ޑޭ ރާއްޖޭގައި ފާހަގަ ކުރާކަމަށް ޔޫތު މިނިސްޓަރ އަހުމަދު މަހުލޫފު ވިދާޅުވެއްޖެއެވެ.
އިންޓަރނޭޝަނަލް ޔޯގާ ޑޭ ފާހަގަ ކުރުމުގެ ގޮތުން ބޭއްވި ޙަރަކާތުގެ ތެރެއިން ހިނގި ހަމަނުޖެހުންތަކާއި ގުޅޭގޮތުން ރާއްޖެއެމްވީއާ ވާހަކަ ދައްކަވަމުން މަހުލޫފު ވިދާޅުވީ، އެއީ ވަރަށް ދެރަކޮށް އަދި ވަރަށް ގޯސްކޮށް ހިނގާ ދިޔަ ކަމެއް ކަމަށެވެ. އެގޮތުން މީހުންނަށް ޙަމަލާ ދިނުމާއި، އެތަނުގައި ހުރި ތަކެއްޗަށް ގެއްލުން ދިނުން ކުށްވެރި ކުރައްވައި މަހުލޫފު ވިދާޅުވީ އެތަނުގައި ހިނގާ ދިޔައީ ދީނީ ޙަރަކާތެއް ނޫން ކަމަށެވެ.
މަހުލޫފު ވަނީ 2014 ވަނަ އަހަރު އޭރުގެ ރައީސް އަބްދުﷲ ޔާމީނުގެ ވެރިކަމުގައި ރާއްޖެއިން ކޯ-ސްޕޮންސަރ ކޮށްގެން އިންޓަރނޭޝަނަލް ޔޯގާ ޑޭ ފާހަގަ ކުރުމުގެ ގޮތުން ކުރައްވާފައިވާ މަސައްކަތްތަކަަށް އަލިއަޅުވާލައްވާފައެވެ.
މަހުލޫފު ވިދާޅުވީ، އޭރުން ފެށިގެން ރާއްޖޭގައި އެކި ފެންވަރުގައި ޔޯގާ ޙަރަކާތްތައް ހަމަ މި ގޮތަށް ހިންގަމުން އައިސްފައިވާ ކަމަށެވެ.
އެތައް ބަޔަކު ޔޯގާ ހަދައި މި ހުރިހާ ކަމެއް އެބަ ކުރޭ، ހަމަ ކުއްލިއަކަށް މިއަދު ފެނިއްޖެ، އެހެންވީމާ މިއަދު އެބައެނގޭ މިއީ ސިޔާސީ ކަމެއްކަން، މި އުޅެނީ އެއްވެސް ޙާލެއްގައި ދީނާ ޚިލާފު ކަމެއް ނޫން ކޮށްގެންނެއް، އަޅުގަނޑުމެން ތަކުރާރުކޮށް ބުނަމުން އަންނަ ވާހަކައެއް ދެއްތޯ ޔޯގާއަކީ ކަސްރަތެކޭ، އަޅުކަމަކާއި ގުޅޭ ކަމެއް ނޫނޭޔޫތު މިނިސްޓަރ މަހުލޫފު
މަހުލޫފު ވިދާޅުވީ، މިއީ އިންޑިއާ އާ ދެކޮޅަށް ވަރުގަދަ ކެމްޕޭނެއް އޮޕޮޒިޝަނުން ހިންގަމުންދާ ދަނޑިވަޅަކަށްވާތީ އެކަމުގެ ނާޖާއިޒް ފައިދާ ނަގައިގެން ބަޔަކު ގަސްތުގައި ސިޔާސީ ގޮތުން ހިޔާލު ތަފާތުވެ ހިންގި ޙަރަކާތެއް ކަމަށެވެ. އެހެން ވިދާޅުވާން ޖެހުނު ސަބަބަކީ 2014 އިން ފެށިގެންވެސް އިންޓަރނޭޝަނަލް ޔޯގާ ޑޭ ރާއްޖޭގައި ފާހަގަ ކުރާތީކަމަށް މަހުލޫފު ވިދާޅުވިއެވެ.
2017 ވަނަ އަހަރު ފަތިސް ގަޑީގައި ހަމަ މި ގޮތަށް ބޭއްވި ޙަރަކާތުގައި އޭރުގެ ފޮރިން މިނިސްޓަރ ދުންޔާ މައުމޫނުވެސް ބައިވެރިވެލެއްވިކަމަށް މަހުލޫފު ވިދާޅުވިއެވެ.
މަހުލޫފު ވިދާޅުވީ، ޕީޕީއެމްގެ އިސް ސަފުގައި މަސައްކަތް ކުރާ ފަރާތްތަކާއި، ސަލަފް ޖަމިއްޔާގެ ފަރާތުންވެސް މިއަދުގެ ހަމަނުޖެހުމުގައި ޙަރަކާތްތެރިވެފައިވާ ކަމަށެވެ.
ސަލަފަށް މި ފެންނަނީ ވަކި ސަރުކާރެއް ނޫނީ ވަކި ބޭފުޅަކު ރައީސަކަށް ހުންނެވީމަ، މިއޮއް ހުރިހާ ދުވަހަކު ސަލަފަކަށް ނުފެނޭ، ސަލަފްގެ ލޯ އަނދިރި، ސަލަފްގެ ކަންފަތް ބީރުވެފައި ނޫންތޯ މިހިރީ، އެހެންވީމާ ކުއްލިއަކަށް މި އަހަރު ޔޯގާ ޑޭ ފާހަގަ ކުރީމަ އެވީ ދީނީ ކަމަކަށްޔޫތު މިނިސްޓަރ މަހުލޫފު
މަހުލޫފު ވަނީ ސަލަފް ޖަމިއްޔާއަކީ ވެރިކަމަށް އައުމަށް މަސައްކަތް ކުރަމުންދާ ސިޔާސީ ޕާޓީއެއްކަމަށް ވިދާޅުވެފައެވެ.
މަހުލޫފު ވިދާޅުވީ، ދީނުގައި ޙަރާމް ކަންކަމާއި، ޙަލާލު ކަންކަމާއި ހުއްދަ ކަންކަމާއި ހުއްދަ ނޫން ކަންކަން ދީނީ އިލްމުވެރިންވެސް ސާފުކޮށްދޭން ޖެހޭ ކަމަށެވެ.
މާލޭގެ ޔޫތު ސެންޓަރުގައި ޔޯގާ ކްލާސްތައް ހިންގާތާވެސް 15 ވަރަކަށް އަހަރު ވެފައިވާކަމަށް މަހުލޫފު ވިދާޅުވިއެވެ.
ހަމަނުޖެހުން ހިންގި ގަޑީގައި އެތަނުގައި ބޭރުގެ ޑިޕްލޮމެޓުންނާއި ބައެއް އިސް ވެރިންވެސް ތިބިކަމަށް މަހުލޫފު ވިދާޅުވިއެވެ.
