ޕޯޓޯއަށް ކުޅެމުން އައި ޕޯޗުގަލްގެ މިޑްފީލްޑަރު ވިޓީނިއާ ޕެރިސް ސެއިންޓް ޖާމަން (ޕީއެސްޖީ)އަށް ބަދަލުވާން ނިންމައިފިއެވެ.
މިއީ ދާދި ފަހުން ޕީއެސްޖީގެ ސްޕޯޓިންގ ޑިރެކްޓަރުގެ މަގާމަށް އައްޔަންކުރި ކަމްޕޯސް މަގާމާ ހަވާލުވި ފަހުން އެކުލަބުން ހޯދި ފުރަތަމަ ކުޅުންތެރިޔާއެވެ.
އުމުރުން 22 އަހަރުގެ ވިޓީނިއާ ޕީއެސްޖީއަށް ބަދަލުވަނީ 40 މިލިއަން ޔޫރޯއަށެވެ. އަދި އޭނާ ހޯދުމަށް ޕީއެސްޖީން ހުށަހެޅި ރަސްމީ ޕްރޮޕޯސަލް ޕޯޓޯއިން ވަނީ ގަބޫލުކޮށްފައެވެ. އަދި ވިޓީނިއާގެ މެޑިކަލް ޓެސްޓުތަކާއި އެއްބަސްވުމުގެ ކަންކަމަށް މިހާރު ޕީއެސްޖީން އަންނަނީ ތައްޔާރުވަމުންނެވެ. މިއީ ކުރިއަށް އޮތް ސީޒަނަށް އެ ޓީމު ވަރުގަދަ ކުރުމުގެ ގޮތުން ޕީއެސްޖީން ހޯދި ކުޅުންތެރިއެކެވެ.
ވިޓީނިއާ އޭނާގެ ސީނިއަރ ކެރިއަރު ފަށާފައިވަނީ 2019 ވަނަ އަހަރު ޕޯޓޯއިންނެވެ. އޭގެ ފަހުން އޭނާ ވަނީ 2020 ވަނަ އަހަރު ވޮލްވްސްއަށް ލޯނު އެއްބަސްވުމެއްގެ ދަށުން ކުޅެފައެވެ. އޭނާ ވަނީ ޕޯޓޯއަށް ކުޅެދިން 59 މެޗުގައި ހަތަރު ލަނޑު ޖަހާފައެވެ. ވިޓީނިއާ އަންނަނީ 2022 ވަނަ އަހަރުން ފެށިގެން ޕޯޗުގަލްގެ ގައުމީ ޓީމަށް ވެސް ކުޅެމުންނެވެ. ގައުމީ ޓީމަށް އޭނާ ވަނީ ތިން މެޗު ކުޅެދީފައެވެ.
