މީގެ ކުރީގެ މުބާރާތްތަކުގައި ވެސް ދިވެހި ސިފައިންގެ ކުލަބް މޮޅުވެފައި ހުންނާނީ ފަހަތުން އަރައި މެޗުތައް ކާމިޔާބުކޮށްގެން ކަމަށް އެ ޓީމުގެ ކެޕްޓަން ހުސެއިން ޝާހިދު (ޝާޑު)ބުނެފިއެވެ.

ޝާޑު މިހެން ބުނީ ބުރާސްފަތި ދުވަހުގެ ހަވީރު އޮތް މެޗުގައި އޮފު އެފްސީގެ މައްޗަށް ކުރި ހޯދުމަށްފަހުއެވެ. ޝާޑު ބުނީ މެޗުގައި ޓީމުގެ ހުރިހާ ކުޅުންތެރިންގެ ފަރާތުން ވެސް މޮޅު ކުޅުމެއް ފެނުނުކަމަށެވެ. އަދި ކޯޗު ބޭނުންވި ގޭމު ކުޅެވުނުކަން ފާހަގަކޮށް ޝާޑު ބުނީ ފަހު ސެޓު ދައްކޮށް ކުޅުންތެރިން ކޮންމެވެސް ވަރަށް ޖެހިލުންވެފައި ތިބުމުންކަމަށެވެ. ސިފައިންގެ ޓީމު މުބާރާތް ފަށަން ޖެހުނީ ދަށްކޮށެވެ. ފުރަތަމަ މެޗުގައި ސްޕޯޓްސް ކުލަބް ސިޓީ އަތުން ބަލިވިއިރު، ދެ ވަނަ މެޗުގައި ޕޮލިސް ކުލަބް އަތުން ބަލިވީ ފުރަތަމަ ދެ ސެޓު ވެސް ހޯދާފައިވަނިކޮށެވެ. ނަމަވެސް ތިން ވަނަ މެޗުގައި ވަނީ ވަރުގަދަ ކުލަބް ވެމްކޯގެ މައްޗަށް ސީދާ ތިން ސެޓުން ކުރި ހޯދާފައެވެ. އަދި ހަތަރު ވަނަ މެޗުގައި އޮފު އެފްސީ ބަލިކޮށް، ސިފައިން އަންނަނީ ގަދަ ތިން ޓީމުގެ ތެރޭގައި ވާދަކުރަމުންނެވެ.

މެޗަށް ފަހު ޝާޑު ބުނީ އެ ޓީމުގެ ކޯޗު އަބްދުﷲ ޖުނައިދު ވެސް މީގެ ކުރިން ފާހަގަކުރި ގޮތަށް ސިފައިންނަކީ ވެއްޓުނީމާ ތެދުވެ، ފަސް ބެލުމެއް ނެތި ކުރިއަށް ދާ ބައެއް ކަމަށެވެ.

މީގެ އިތުރުން ޝާޑު ބުނީ އެ ޓީމުގައި އަނިޔާގެ މައްސަލަތަކެއް ހުރި ކަމަށެވެ. އަނިޔާގެ ސަބަބުން ބައެއް ބޭރު ކުޅުންތެރިން ޓީމާ ގުޅުނީ ވެސް ލަހުން ކަން ޝާޑު ވަނީ ފާހަގަކޮށްފައެެވެ. ނަމަވެސް އަނިޔާއިން ރަނގަޅުވެ ކުޅުންތެރިންގެ ކުޅުން މެޗަކަށްފަހު މެޗެއް ރަނގަޅުވަމުން އަންނަކަން ޝާޑު ވަނީ ފާހަގަކޮށްފައެެވެ. އަދި އެ ޓީމުގެ ދިވެހި އެޓޭކަރު އާދަމް ނަސީމް (އެޑަމް) އާދަޔާ ޚިލާފަށް ރަނގަޅުކަމަށް ވެސް ޝާޑު ވަނީ ބުނެފައެވެ.

މުބާރާތުގައި ސިފައިންނަށް ބާކީ އޮތީ އެންމެ މެޗެކެވެ. އެއީ އާދިއްތަ ދުވަހުގެ ރޭ ގުޑީސް ސްޕޯޓްސް ކުލަބާ ދެކޮޅަށް ކުޅޭ މެޗެވެ.