ޚިޔާލު ފާޅުކުރުމުގެ މިނިވަންކަމުގެ ތެރެއިން އެބައެއްގެ ދީނާއި ސަގާފަތާއި ބެހުމަށް ހުއްދަ ދެވިގެންނުވާނެ: ރައީސް ޔާމީން
17 ޖޫން 2022 | ހުކުރު 07:29މި މަސައްކަތް ފަށަން ޖެހުނީ އިސްލާމުންގެ ހައްޤުގައި ބަސްބުނާނެ މީހެއް ނުވަތަ ޕާޓީއެއް ރާއްޖޭގައި ނެތުމުން
"ނަބިއްޔާގެ ދިފާއުގައި" ޖަލްސާގައި ކުރީގެ ރައީސް އަބްދުﷲ ޔާމީން އަބްދުލްޤައްޔޫމް ވާހަކަފުޅު ދައްކަވަނީ
ޚިޔާލު ފާޅުކުރުމުގެ މިނިވަންކަމުގެ ތެރެއިން އެބައެއްގެ ދީނާއި ސަގާފަތާއި ބެހުމަށް ހުއްދަ ދެވިގެންނުވާނެ ކަމަށް ކުރީގެ ރައީސް އަބްދުﷲ ޔާމީން އަބްދުލްޤައްޔޫމް ވިދާޅުވެއްޖެއެވެ.
ކާނިވާ ސަރަހައްދުގައި ބުރާސްފަތި ދުވަހުގެ ރޭ ބޭއްވި "ނަބިއްޔާގެ ދިފާއުގައި" ޖަލްސާގައި ވާހަކަފުޅުދައްކަވަމުން ޔާމީން ވިދާޅުވީ މި ސަރުކާރު ވެރިކަމަށް އައުމަށް ޑިމަކޮރަސީ ނޫން ވާހަކައެއް ދައްކާފައި ނުވާ ކަމަށެވެ. އެހެންނަމަވެސް އެ ޑިމޮކްރަސީ ތެރޭގައި ވެސް ވަކިކަހަލަ ހުދޫދެއް ނުވަތަ އިމެއް ވާ ކަމަށެވެ.
ޚިޔާލު ފާޅުކުރުމުގެ މިނިވަންކަމުގެ ތެރެއިން އެބައެއްގެ ދީނާއި ސަގާފަތާ ބެހުމަށް ހުއްދަ ދެވިގެންނުވާނެ ކަމަށާއި މި ސަރުކާރު އައިފަހުން ފާޅުވި އެމްޑީއެން އާއި އުތެމާ ފަދަ ޖަމާއަތްތަކަކީ އެ ފުރުސަތު ދެވުމުން ފާޅުވި ބައެއް ކަމަށް ޔާމީން ވިދާޅުވިއެވެ.
ކީރިތި ރަސޫލާ ސައްލަﷲ އަލައިހި ވަސައްލަމްއަށް ފުރައްސާރަކޮށް އިންޑިއާގެ ވެރިކަންކުރާ ޕާޓީ, ބާރަތަޔާ ޖަނަތާ ޕާޓީ (ބީޖޭޕީ)ގެ ދެ އޮފިޝަލުން ކަމަށްވާ، ނުޕުރް ޝަރްމާ އާއި ނަވީން ކުމާރު ޖިންދާލް ދެއްކި ވާހަކަތައް ކުށްވެރިކުރަން މި ސަރުކާރުން ނޫޅެނީ ކީއްވެތޯ ބުނެ ޔާމީން ސުވާލު އުފެއްދެވިއެވެ.
ރައީސް ޔާމީން ވިދާޅުވީ ހިންދޫ ދީނުގެ މީހުން ރަސޫލާއަށް ފުރައްސާރަކުރުމަކީ އިއްތިފާގެއް ނޫން ކަމަށެވެ. އެމީހުންގެ ފަލްސަފާއަކީ ހިންދުސްތާނެއް ބިނާކުރުންކަމަށް ވާއިރު އެ ހިންދުސްތާނުގައި އުޅެންޖެހޭނީ ހިންދޫއިންކަމަށް އެމީހުން ގަބޫލުކުރާކަމަށް އެމަނިކުފާނު ވިދާޅުވިއެވެ.
ރައްޔިތުން މި ސަރުކާރު ކޮޅަށް ޖަހަން އެބަ ޖެހޭ ކަަމަށާއި މިކަން ސަރުކާރުގެ ސަމާލުކަމަށް ގެންނަން ޖެހޭ ކަމަށް ޔާމީން ވިދާޅުވިއެވެ. މިއީ ޕީޕީއެމުން ކުރާ ސިޔާސީ މަސައްކަތެއް ނޫންކަމަށް ވިދާޅުވެ ޔާމީން އިތުރަށް ވިދާޅުވީ މިއީ ސިޔާސީ ދަތުރުގެ ފަޅުވެރިން ކުރާ މަސައްކަތެއް ނޫން ކަމަށާއި މި މަސައްކަތް ފަށަން ޖެހުނީ އިސްލާމުންގެ ހައްޤުގައި ބަސްބުނާނެ މީހެއް ނުވަތަ ޕާޓީއެއް ރާއްޖޭގައި ނެތުމުން ކަމަށް ޔާމީން ވިދާޅުވިއެވެ.
މި މައްސަލަ ކުށްވެރި ކުރަން މި ސަރުކާރުން ނޫޅެނީ ކީއްވެތޯ ވިދާޅުވެ ޔާމީން ވަނީ ސުވާލު އުފައްދަވާފައެވެ. އަދި މި ސަރުކާރަކީ ފިނޑި ސަރުކާރެއް ކަމަށް ޔާމީން ވިދާޅުވިއެވެ. ޔާމީން މިހެން ވިދާޅުވި ނަމަވެސް ކީރިތި ރަސޫލާ ﷺ އަށާއި އިސްލާމްދީނަށް ފުރައްސާރަކޮށް ހަޤީޤަތާއި ޚިލާފު ވާހަކަ ދެއްކުމަކީ ދިވެހި ރާއްޖޭގެ ސަރުކާރުން އެއްވެސް ގޮތަކަށް ބަލައިގަންނާނެ ކަމެއް ނޫންކަމަށާއި، އެކަން ސަރުކާރުން އެންމެ ހަރުކަށި އިބާރާތުން ކުށްވެރިކުރާކަމަށް ސަރުކާރުން ވަނީ ބުނެފައެވެ.
ދިވެހި ސަރުކާރުގެ ފަރާތުން ފޮރިން މިނިސްޓްރީން މިކަމާ ގުޅިގެން ބަޔާނެއް ނެރެފައިވާއިރު، މިނިސްޓްރީގެ ބަޔާނުގައި ވަނީ މިފަދަ ހުރިހާ އަމަލެއް ސަރުކާރުން ވަރަށް ހަރުކަށި އިބާރާތުން ކުށްވެރިކުރާ ކަމަށް ބުނެފައެވެ. އެގޮތުން އިސްލާމް ދީނާއި ކީރިތި ރަސޫލާ އުނގަންނައިދެއްވި ރިވެތި އުސޫލުތަކާ ދެކޮޅަށް ހިންގާ ހުރިހާ ހަރަކާތްތައް ސަރުކާރުން އެންމެ ހަރުކަށިކޮށް ކުށްވެރިކުރާއިރު، އިސްލާމްދީނާއި ރަސޫލާއަށް އަމާޒުކޮށް ދޮގު ވާހަކަތައް ދެއްކުމަކީވެސް ސަރުކާރުން އެއްވެސް ހާލަތެއްގައި ބަލައިގަންނާނޭކަމެއް ނޫންކަމަށް ބަޔާނުގައި ބުނެފައިވެއެވެ.
މިބަޔާނުގައި މިނިސްޓްރީން ވަނީ، އިންޑިއާގެ ބީޖޭޕީގެ ބައެއް އޮފިޝަލުން ކީރިތި ރަސޫލާއަށް އަމާޒުކޮށް، މިފަދަ ވާހަކަތަކެއް ދައްކާފައިވާތީ އެކަމާމެދު ސަރުކާރުން ކަންބޮޑުވާކަން ފާޅުކޮށްފައެވެ. އަދި އިންޑިއާ ސަރުކާރުން އެ އޮފިޝަލުންގެ މި އަމަލު ކުށްވެރިކޮށް، ބީޖޭޕީން އެ އޮފިޝަލުންނާމެދު އަވަހަށް ފިޔަވަޅު އެޅުމުން އެކަން ދިވެހި ސަރުކާރުން ބަލައިގަންނަކަމަށް މިނިސްޓްރީން ވަނީ ބުނެފައެވެ.
