ޓީމުތަކަށް ލިބިފައިވާ ބިދޭސީ ކުޅުންތެރިންގެ ތެރެއިން ކުޅުންތެރިޔަކަށް އަނިޔާވުމަކީ އޭގެ ގެއްލުން މުޅި ޓީމަށް ދައްކާ ކަމެއް ކަމަށް ގުޑީސް ސްޕޯޓްސް ކުލަބުގެ ހަސަން ނިލާމް (ޕާޓޭ) ބުނެފިއެވެ.
ގުޑީސް ވަނީ މިހާތަނަށް އެ ޓީމު ކުޅުނު ތިން މެޗުން ވެސް ބަލިވެ، މުބާރާތުން ކަޓައިފައެވެ. ފުރަތަމަ މެޗުގައި ޕޮލިސް ކުލަބު އަތުން ބަލިވިއިރު، ދެ ވަނަ މެޗުގައި ބަލިވީ އޮފު އެފްސީ އަތުންނެވެ. އަދި ބުދަ ދުވަހުގެ ރޭ ތިން ވަނަ މެޗުގައި ބަލިވީ ސްޕޯޓްސް ކުލަބް ސިޓީ އަތުންނެވެ. އެ މެޗުގައި ގުޑީސްގެ ބިދޭސީ ކުޅުންތެރިޔާ ގޮނިބީދޫ ސިޔާމްސުންދަރުއަށް ވަނީ އަނިޔާވެފައެވެ. އެ މެޗުން ގުޑީސް ބަލިވީ ސީދާ ތިން ސެޓުންނެވެ.
މެޗަށްފަހު ނިލާމް ބުނީ މުބާރާތަކީ ބިދޭސީ ކުޅުންތެރިންނަށް ބަރޯސާވާ މުބާރާތެއް ކަމުން، އޭގެ ތެރެއިން ކުޅުންތެރިޔަކަށް އަނިޔާވުމުން އޭގެ ގެއްލުން ޓީމަށް ދައްކާ ކަމަށެވެ.
އަސްލު މުޅި މުބާރާތަކީ އަނެއްހެން ބުނާނަމަ ބޭރު މީހުންނަށް ޑިޕެންޑުކޮށްގެން އޮތް މުބާރާތެއް. ދެން މި މުބާރާތުގައި އޭގެ އެކަކު ވެސް އެންޖެރީވީމާ ޓީމަށް ވަރަށް ބޮޑު ގެއްލުމެއް އަސްލުވޭ. އިތުރު މީހަކު ބަދަލު ކުރެވޭކަށް ވެސް ނީނދޭ. އިތުރަށް މީހަކު ގެނެސްގެން ކުޅެވޭކަށް ވެސް ނީނދޭ.ހަސަން ނިލާމް / ގުޑީސް ސްޕޯޓްސް ކުލަބުގެ ކުޅުންތެރިއެއް
މީގެ އިތުރުން ނިލާމް ބުނީ މޮޅެއް ހޯދަން ބޭނުންވާ ކަމަށެވެ. ނަމަވެސް ޓީމުގެ ސެޓަރު އަނިޔާގައު ހުރުމާއި، ބެންޗުގައި ވެސް އަރުވާނެ ރަނގަޅު ކުޅުންތެރިއެއް ނެތް ކަމަށެވެ. މިކަމުގެ ސަބަބުން ދެން ހުރި ޓީމުތަކާ ވާދަކުރެވޭނެހެން ހީނުވާކަމަށް ވެސް ނިލާމް ބުންޏެވެ.
މުބާރާތުގައި ގުޑީސްއަށް ބާކީ އޮތީ ދެ މެޗެވެ. އެއީ މިރޭ ކުލަބް ވެމްކޯއާ ދެކޮޅަށް ކުޅޭ މެޗާއި، އާދިއްތަ ދުވަހުގެ ރޭ ދިވެހި ސިފައިން ކުލަބާ ދެކޮޅަށް ކުޅޭ މެޗެވެ.
