އެސޯސިއޭޝަން ކަޕް ކަހަލަ ފެންވަރު ރަނގަޅު މުބާރާތެއްގައި ކޮންމެ މެޗަކުން މޮޅުވުމަކީ އުނދަގޫ ކަމެއް ކަމަށް ކުލަބް ވެމްކޯގެ ކޯޗު އިބްރާހީމް ނިޒާރު (ބޮޑޭ) ބުނެފިއެވެ.
މިއަހަރުގެ މުބާރާތް ފަށައިގެން އެންމެ ގަދަކޮށް ފެންނަ އެއް ޓީމަކީ ވެމްކޯއެވެ. ކުޅުނު ދެ މެޗުން ވެސް މޮޅުވެ، ތިން ވަނަ މެޗާއި ހަމައަށް ނުކުތްއިރު ވެމްކޯ އޮތީ ވަރަށް ވަރުގަދަ ކޮށެވެ. ބުދަ ދުވަހުގެ ހަވީރު ތިން ވަނަ މެޗުގައި ވެމްކޯ ސިފައިންގެ އަތުން ބަލިވީ ސީދާ ތިން ސެޓުންނެވެ. އެ މެޗަށްފަހު ނިޒާރު ބުނީ އޭނާ ދެކޭގޮތުގައި އެއީ ރަނގަޅެއް ކަމަށެވެ. އަދި ފެންވަރު ރަނގަޅު މުބާރާތެއްގައި ކޮންމެ މެޗަކުން މޮޅުވުމަކީ އުނދަގޫ ކަމެއް ކަމަށެވެ. މީގެ އިތުރުން އޭނާ ބުނީ ބަލިވެސް އަދި މޮޅު ވެސް ގަބޫލުކުރާ ކަމަށެވެ. އަދި މެޗުގައި ދިމާވި މައްސަލައަކީ ވެމްކޯގެ ގޭމު ނުޖެއްސިގެން ދިމާވި މައްސަލަ ކަމަށެވެ.
ބަލިވެސް އަހަރަމުން ގަބޫލުކުރަން. މޮޅުވެސް ގަބޫލުކުރަން. ދެން މިއަދު މެޗު ސްޓާޓިންގައި އަހަރަމެންނަށް ރަނގަޅަށް އަހަރަމެންގެ ގޭމު ނުޖެއްސިގެން އެދިޔައީ. ދެން ކުޅުންތެރިން ވެސް އެބަ އުޅޭ ވަރަށް ބޮޑަށް އެންޖަރީތައް އެބަ އުޅޭ އަހަރަމެން ޓީމުގައި. ވާހަކައަކީ ހުރިހާ ކުޅުންތެރިން ކަހަލަ ގޮތަކަށް. މިއަދު މެޗުގައި ފެނިގެން ވެސް ދިޔަ ކުޑަކޮށް ސްލޯކަމެއް ވެސް ދިޔަ.އިބްރާހީމް ނިޒާރު (ބޮޑޭ) / ވެމްކޯގެ ކޯޗު
އިތުރަށް ވާހަކަ ދައްކަމުން ނިޒާރު ބުނީ އެ ޓީމުގެ ބިދޭސީ ކުޅުންތެރިޔާ އަނިޔާގައި ހުރުމަކީ ފޫބައްދަން އުނދަގޫ ކަމެއް ކަމަށެވެ. އެހެން ނަމަވެސް، މުބާރާތގެ މިހާ ހިސާބަށް ކުޅުނީ އެ ކުޅުންތެރިޔާ ނެތް ކަން އެނގިގެން ކަމަށެވެ. އަދި ކުރިއަށް އޮތް ތަނުގަައި ވެސް ކުޅޭނީ އެ ކުޅުންތެރިޔާއަކީ ނެތް ކުޅުންތެރިއެއްގެ ގޮތުގައި ބަަލައިގެން ކަމަށެވެ. މެޗާއި ދޭތެރޭ ހިތްހަމަޖެހޭކަން ފާހަކޮށް ނިޒާރު ބުނީ މެޗުގައި ކުޅެވިފައި، ދެން ގޭމު ގެއްލެނީ ކަމަށެވެ.
މުބާރާތުގައި ވެމްކޯއަށް ބާކީ އޮތީ ދެ މެޗެވެ. އެއީ މިރޭ ގުޑީސް ސްޕޯޓްސް ކުލަބާ ދެކޮޅަށް ކުޅޭ މެޗާއި، ހޮނިހިރު ދުވަހުގެ ރޭ ޕޮލިސް ކުލަބާ ދެކޮޅަށް ކުޅޭ މެޗެވެ.
