ސިޓީ އަތުން ބަލިވެ ގުޑީސް ކަޓައިފި

އެސޯސިއޭޝަން ކަޕްގައި ސްޕޯޓްސް ކުލަބް ސިޓީ އަތުން ބަލިވެ، ގުޑީސް ސްޕޯޓްސް ކުލަބް މުބާރާތުން ކަޓައިފިއެވެ.

ބުދަ ދުވަހުގެ ރޭ ސިޓީއާ ދެކޮޅަށް ކުޅުނު މެޗުން ބަލިވުމާއެކު، ގުޑީސް ވަނީ މިހާތަނަށް ކުޅުނު ތިން މެޗުން ވެސް ބަލިވެފައެވެ. ފުރަތަމަ މެޗުގައި ގުޑީސް ބަލިވީ ކުލަބް ވެމްކޯ އަތުންނެވެ. ދެ ވަނަ މެޗުގައި ބަލިވީ އޮފު އެފްސީ އަތުންނެވެ.

ޒުވާނުންގެ މަރުކަޒުގެ އެތެރޭ ހޯލުގައި ކުޅުނު މެޗުން ގުޑީސް ބަލިވީ ސީދާ ތިން ސެޓުންނެވެ. ފުރަތަމަ މެޗުގައި ލިބުނު އަނިޔާގެ ސަބަބުން ގުޑީސް ޓީމުގެ ސެޓަރު ހުސެއިން ވިޝާމް (ބުޅިކެ) މި މެޗުގައި ވެސް ނުކުޅެއެވެ. އަދި މެޗުގެ ވަކި ހިސާބަކުން އެ ޓީމުގެ ބިދޭސީ ކުޅުންތެރިޔާ ގޮނިބީދޫ ސިޔާމްސުންދަރުގެ ފަޔަށް ލިބުނު އަނިޔާއެއްގެ ސަބަބުން އޭނާ ބަދަލުކުރިއެވެ.

މެޗުގައި ގުޑީސްގެ ފަރާތުން އެދެވޭ ކުޅުމެއް ނުފެނެއެވެ. ސިޓީން މެޗުގެ ސެޓުތައް ހޯދީ ފަސޭހަކަމާއެކުއެވެ. ސިޓީގެ އަލީ ހުޒާމް (ހުޒަންޓެ)ގެ އިތުރުން ބިދޭސީ އެޓޭކަރުންގެ ބާރު ހަމަލާތައް ވަނީ ފެނިފައެވެ. މެޗުގެ ސެޓުތައް ސިޓީން ހޯދީ 25-19، 25-18 އަދި 25-19 ންނެވެ. މި މެޗުން ލިބުނު މުހިންމު މޮޅާއެކު ސިޓީން ވަނީ މުބާރާތުގެ ގަދަ ތިނެއްގެ ރޭހަށް ވާދަކުރަން ޖެހިލައިފައެވެ. މެޗުގެ މޮޅު ކުޅުންތެރިޔަކަށް ހޮވުނީ ސިޓީގެ ބިދޭސީ ކުޅުންތެރިޔާ ވިނީތު ކުމާރުއެވެ.

މުބާރާތުގައި މިއަދު ހަވީރު އޮފު އެފްސީ ނިކުންނާނީ ދިވެހި ސިފައިންގެ ކުލަބާ ދެކޮޅަށެވެ. އަދި މިރޭގެ މެޗުގައި ގުޑީސް ނިކުންނާނީ ވެމްކޯއާ ދެކޮޅަށެވެ.