މިހާތަނަށް ރާއްޖޭގައި ބާއްވާ ބައިނަލްއަޤްވާމީ ކުޅިވަރުގެ އެންމެ ބޮޑު އެއް އިވެންޓް "އޭޝިޔަން ބޮޑީ ބިލްޑިން އެންޑް ފިޒިކް ސްޕޯޓްސް ޗެމްޕިއަންޝިޕް" މާލެ އަތޮޅު މާފުށީގައި ބާއްވަނީ ފަތުރުވެރިކަމަށްވެސް ވަރަށް ބޮޑަށް ވިސްނައިގެންކަމަށް ބޮޑީބިލްޑިން އެސޯސިއޭޝަނުން ބުނެފިއެވެ.
ޖުލައި މަހުގެ 15-21 އަށް ބާއްވާ މުބާރާތާ ގުޅޭގޮތުން އެސޯސިއޭޝަންގެ ނައިބުރައީސް އަހުމަދު އައިމަން ވިދާޅުވީ މުޅި މުބާރާތް މާފުށި ބީޗްގައި ބާއްވާނީ ރާއްޖެ އިޝްތިހާރުވާނެ ގޮތަށް ވިސްނައިގެން, ސްޕޯރޓްސް ޓޫރިޒަމްގެ ވިސްނުންތަކުގެ ތެރެއިންކަމަށެވެ. އަދި މިހާރުވެސް މުބާރާތާ ގުޅިގެން ރާއްޖެ އިޝްތިހާރުވަމުންދާކަމަށް ވިދާޅުވިއެވެ.
ސްޕޯރޓްސް ޓޫރިޒަމްއަށް ވަރަށްބޮޑަށް ފޯކަސްކޮށްގެން މުބާރާތް ބާއްވަނީ. 30 ޤައުމުގައި މިހާރުވެސް ރާއްޖެ އިޝްތިހާރުވަމުން ދަނީ. އެޤައުމުތަކުގައި މުބާރާތް ޕްރޮމޯޓްކުރުމަށް ރާއްޖޭގެ ވީޑިއޯތައްވެސް ދައްކަމުން ދަނީއަހުމަދު އައިމަން/ ބޮޑީބިލްޑިންގ އެސޯސިއޭޝަންގެ ނައިބުރައީސް
މުބާރާތުގައި އޭޝިޔާގެ 30 ޤައުމުން ވާދަކުރެއެވެ. އެތުލީޓުންނާއި, އޮފިޝަލުން ހިމެނޭގޮތަށް 500 އަށްވުރެ ގިނަ މީހުން މުބާރާތާ ގުޅިންހުރި ކަންކަމަށް މާފުއްޓަށް ދާނެއެވެ. އެމީހުން އެކޮމެޑޭޓް ކުރަނީ މާފުށީގެ ފަސް ހޮޓަލެއްގައެވެ. އައިމަން ވިދާޅުވީ އެކި ހޮޓާތަކުގައި އެކޮމެޑޭޓް ކުރުމަކީ ގޮންޖެހުމެއްކަމަށާއި, އެކަމަކުވެސް މާފުށީގައި މުބާރާތް ކުރިއަށްގެންދަން ޖުމްލަ ގޮތެއްގައި ފަސޭހަކަމަށެވެ. މުބާރާތް ބީޗްގައި ބާއްވަނީވެސް މުބާރާތުން ރާއްޖެ އިޝްތިހާރުކުރުމުގެ ބޭނުމުގައި, އެފަދަ ވިސްނުންތަކާއެކު ކަމަށް އައިމަން ވިދާޅުވިއެވެ.
އެެސޯސިއޭޝަނުން ބުނީ މުބާރާތަކީ ދިގުދެމިގެންދާ މުބާރާތަކަށް ވުމާއި, މާފުއްޓަކީ ދަތުރުކުރަން ފަސޭހަ ތަނަކަށްވުމުން މުބާރާތުގެ ކޮންމެވެސް ހިސާބަކުން ދިވެހި އެތުލީޓުންނަށް ހިތްވަރުދޭން ސަޕޯޓަރުން ދިއުމަށް އެދޭކަމަށެވެ. މުބާރާތް ކުރިއަށްދަނީ ހުޅުވާލެވިފައިވާ މާހައުލެއްގައެވެ.
މާފުށި ކައުންސިލްގެ ރައީސް ހުސެއިން ސޮލާހު ވިދާޅުވީ މުބާރާތަށް މުޅި މާފުށި ތައްޔާރުވަމުން އަންނަ ކަމަށާއި, ރައްޔިތުންނާއި, ގެސްޓްހައުސް ވިޔަފާރި ކުރާ ފަރާތްތަކުގެވެސް ވަރަށްބޮޑު އެއްބާރުލުމެއް ލިބެމުންދާކަމަށެވެ. އަދި މިއީ އީދުގެ ފަހުން އަންނަ މުބާރާތަކަށްވާތީ މާފުށިން ތައްޔާރުވަނީ ދެ އީދަށްކަމަށް އޭނާ ވިދާޅުވިއެވެ.
