2023 ގެ ނިޔަލަށް ރާއްޖޭގެ ހުރިހާ ރަށެއްގައި ޓޫރިސްޓް ފެސިލިޓީ ޤާއިމްވެފައި ހުންނާނެ ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
ބުދަ ދުވަހު ފެށި "ޔޫއެންޑަބްލިއުޓީއޯ ގްލޯބަލް ސަމިޓް އޮން ކޮމިއުނިޓީ ބޭސްޑް ޓޫރިޒަމް" ފައްޓަވައިދެއްވައި ވާހަކަފުޅު ދައްކަވަމުން މައުސޫމް ވިދާޅުވީ ރާއްޖެއަކީ މިއަދު "ވަން އައިލެންޑް ވަން ރިސޯޓް" މޮޑެލްއާއި އެއްގޮތަށް ހިދުމަތްދޭ ކާމިޔާބު މަންޒިލެއް ކަމަށެވެ. މި ކާމިޔާބީ އަކީ ސަރުކާރާއި ފަތުރުވެރިކަމުގެ ދާއިރާގެ ކުންފުނިތަކާއި މުވައްޒަފުންނާ ގުޅިގެން ކުރާ މަސައްކަތުގެ ނަތީޖާއެއް ކަމަށާއި ފަތުރުވެރިކަން ސިންދަފާތު ކުރުމަށް މަސައްކަތް ކުރަން ޖެހޭނީ "ވަން އައިލެންޑް ވަން ރިސޯޓް" ކޮންސެޕްޓަށް ބުރޫ ނާރާ ގޮތަށް ކަމަށް ވެސް އޭނާ ވިދާޅުވިއެވެ.
މިނިސްޓަރ ވިދާޅުވީ ފަތުރުވެރިކަން ކުރިއެރުވުމަށް ރަށު ފަތުރުވެރިކަން ފަށާފައިވާއިރު މިހާތަނަށް 95 ރަށެއްގައި ގެސްޓްހައުސް އާއި ޓުއަރިސްޓް ހޮޓެލް އެބަހުރި ކަމަށެވެ. އަދި ސަފާރީ އާއި ލިވްއަބޯޑު ދާއިރާ ރާއްޖޭގެ ހުރިހާ އަތޮޅަކަށް ވެސް ފުޅާ ކުރެވިފައިވާ ކަމަށާއި ޓްރެވަލް އެޖެންޓުން އެ މީހުން އޮފާތަކުގައި ކޮމިއުނިޓީ ބޭސްޑް ޓޫރިޒަމްގެ ޕްރޮޑަކްޓްތައް ހިމަނަން ފަށާފައިވާކަން ވެސް މައުސޫމް ފާހަގަ ކުރެއްވިއެވެ.
އަޅުގަނޑުމެންނަށް ވަރަށް ބޮޑު ޔަގީންކަމެއް އެބައޮތް، 2023ވަނަ އަހަރު ނިމޭއިރު ރާއްޖޭގެ ހުރިހާ ރަށެއްގައި އަދި ހުރިހާ މުޖުތަމައެއްގައި ހޮޓަލް ނުވަތަ ގެސްޓް ހައުސް ނުވަތަ އެނޫން ޓޫރިސްޓް ފެސިލިޓީތައް ހުންނާނެ ކަމަށް،ޓޫރިޒަމް މިނިސްޓަރ ޑރ. އަބްދުﷲ މައުސޫމް
މައުސޫމް އިތުރަށް ވިދާޅުވީ ފަތުރުވެރިކަން ސިންދަފާތު ކުރުމަށް ކުރާ މަސައްކަތުގެ ނަތީޖާއެއްގެ ގޮތުން ރަށްރުގައި ފަތުރުވެރިކަމުގެ ދާއިރާގައި އުޅޭ މީހުންގެ އަދަދު އިތުރުވެފައިވާ ކަމަށެވެ.
މީގެ އިތުރުން ކޮމިއުނިޓީ ބޭސްޑް ޓޫރިޒަމްގެ ސަބަބުން ކައުންސިލްތަކާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތައް ބާރުވެރި ކުރުވޭނެ ކަމަށް ވެސް މައުސޫމް ވިދާޅުވިއެވެ.
