ރަށްރަށުގައި ގެސްޓް ހައުސް ހިންގާ ފަރާތްތަކުން، ސަފާރީ އެއް ބާއްވައިގެން ރާ ވިއްކާ, ރާ ދީ ހަދާ ކަމަށް ރައީސް ވިދާޅުވެއްޖެ
ރައީސް ވަނީ އަމިއްލަ ނަފްސަށް ތެދުވެރިވުމަށް ގޮވާލައްވާފައި
އުކުޅަހުގައި ހިންގާ ގެސްޓް ހައުސް އެއް
ރަށްރަށުގައި ގެސްޓް ހައުސް ހިންގާ ފަރާތްތަކުން، ބޭރުގައި ސަފާރީ އެއް ބާއްވައިގެން ރާ ވިއްކާ، ރާ ދީ ހަދާ ކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.
ރައީސް މިހެން ވިދާޅުވީ، މިދިޔަ ބުދަ ދުވަހުގެ ރޭ އއ. އުކުޅަހަށް ވަޑައިގެން އެރަށުގެ ރައްޔިތުންނާ ބައްދަލު ކުރައްވާ ދެއްކެވި ވާހަކަފުޅުގައެވެ.
"ރަށުގެ އިޚްތިޞާޞް މިންކޮށްފައި، 700 މީޓަރު އެޅޭ ހިސާބުން ބޭރުގައި، އެއް ފޫޓު ބޭރުގައި ސަފާރީއެއް ބާއްވައިގެން، އެއަށް ސިއްރުސިއްރުން ގެސްޓުން ގެންގޮސް ގެން، ރާ ވިއްކައި، ރާ ދީ ހަދައިގެން، އަނެއްކާ އަނބުރާ ރަށަށް ގެނެސް، މިކަހަލަ ކަންތައްވެސް އެބަކުރޭ."
ރައީސް ވިދާޅުވީ އެކަން ކުރަނީ ހަމަ އެކަނި އަރިއަތޮޅު އުތުރުބުރީގައި ނޫން ކަމަށާއި އެހެން ބައެއް އަތޮޅުތަކުގެ ބައެއް ރަށްރަށުގައިވެސް ލޯކަލް ޓޫރިޒަމްގައި މަސައްކަތްކުރާ ފަރާތްތަކުން މިކަން ކުރަނީ މިހެން ކަމަށެވެ.
ރައީސް ވަނީ މިއީ ކޮން ފަރާތަކަށް އޮޅުވާލަން ކުރާ ކަމެއްތޯ ސުވާލު ކުރައްވާފައެވެ. ރައީސް އިތުރަށް ވިދާޅުވީ، ދުނިޔެ ދޫކޮށް ދާން ޖެހޭނީ ކޮން ވަގުތެއް ކަމެއް ނޭނގޭ ކަމަށާއި، މާދަމާ މިކަން އިސްލާހް ކުރާނެ ވަގުތެއް ނޯންނާެ ކަމަށެވެ.
"މި ކާކަށްތޯ އޮޅުވާލަން މި މަސައްކަތް ކުރަނީ. ގައިމުވެސް ހެއްދެވި ފަރާތަށް ހުރިހާ ކަމެއް ވަރަށް ސާފު. އެނގިވޮޑިގެންވޭ. އަޅުގަނޑުމެން ކޮން މުއްސަނދިކަމެއްތޯ މި ހޯދަނީ، އެކަލާނގެ ނުރުއްސަވާ މަގަކުން؟ ކޮން ބަރަކާތެއްތޯ އޭގައި އޮންނާނީ؟ ކޮން ޝޯޓްކަޓެއްތޯ ނަގަން މަސައްކަތް މި ކުރަނީ؟ މިވަގުތުކަމެއްނޭނގެ، އަޅުގަނޑުމެން މި ދުނިޔެ ދޫކުރާނީ. މާދަމާ މިކަންކަން އިޞްލާޙުކުރާނެ ވަގުތު އޮންނާނެތޯ؟"
ރައީސް ވިދާޅުވީ، އަޅުގަނޑުމެންނަށް މި ލިބޭ ފުރުޞަތުތަކުގެ ބޭނުން ހިފަން ޖެހޭނީ، އަޅުގަނޑުމެންގެ އަމިއްލަ ނަފުސަށް އިޚްލާޞްތެރި ކަންމަތީގައި ތިބެގެން ކަމުގައެވެ.
ރައީސް ވަނީ މިއީ ކުޑަހިނދުކޮޅަކު އުޅޭނެ ދުނިޔެއެއް ކަމަށާއި، ދާންއޮތް މަންޒިލް އަޅުގަނޑުމެން ރައްކާތެރިނުކުރަންޏާ، ކަށަވަރު ނުކުރަންޏާ، އަޅުގަނޑުމެންނަށް ވުރެ މޮޔަ ބަޔަކު އެބަތިބިތޯ އައްސަވާފައެވެ.
ރައީސް މުއިއްޒު ވިދާޅުވީ، މުއްސަނދިކަން ހޯދާއިރު، ނޫނީ ކަމަކަށް މަސައްކަތް ކުރަމުންދާއިރު، އެ ކުރެވޭ މަސައްކަތް އެ ކުރެވެނީ، ރަނގަޅު މަގުގައިތޯ ބަލަންޖެހޭނެ ކަމަށެވެ.
ރައީސް ވަނީ އަމިއްލަ ނަފްސަށް ތެދުވެރިވުމަށް ގޮވާލައްވާފައެވެ. އަދި އިސްލާމް ދީނުގެ ހަމަތަކުގެ މަތިން ފަތުރުވެރި ކަމުގެ އިންޑަސްޓްރީ ގައި ކުރިއަށް ދިއުމަށް ގޮވާލައްވާފައެވެ.
އެހެންވީމާ ...މި އިންޑަސްޓްރީގައި މަސައްކަތްކުރާ ހުރިހާ ފަރާތްތަކުން އަޅުގަނޑު އެދެން، ވަރަށް އިޚްލާޞްތެރިކަމާއެކީގައި، އަމިއްލަ ނަފުސަށް ތެދުވެރިވެވަޑައިގަތުމަށް. މިއީ، އެހެން މީހަކަށް ކޮށްދޭ ކަމެއް ނޫން. އަމިއްލަ ނަފުސަށް ކޮށްދޭ ކަމެއް. އެހެންވީމާ، ރީތި ހަމަތަކުގެ މަތިން، އިސްލާމްދީނުގައި ވާގޮތަށް، މި އިންޑަސްޓްރީގައި، މި ވިޔަފާރީގައި ބާރުމިނުގައި ކުރިއަށްދާންވީ."
