މި ސަރުކާރުން ހުރިހާ ސިނާއަތަކަށް ވެސް ދަތިތަކާއި ކުރިމަތިކުރުވާ - ޑީޑީ
ރިސޯޓުތަކުގައި މަސައްކަތް ކުރައްވާ މުވައްޒަފުންނަށް ޑޮލަރުން ލިބެން އައި މުސާރަކޮޅު ނުލިބޭ ގޮތަށް އެކަމަށް ވެސް ހުރަސް އަޅާފައިވޭ
މި ސަރުކާރުން ހަރަދު ކުޑަ ކުރުމަށް އިހުލާސްތެރި މަސައްކަތެއް ނުކުރޭ، އަދިވެސް ދަނީ މަތި ބަރުކުރަމުން: ޑރ. ޑީޑީ
މި ސަރުކާރުން ހުރިހާ ސިނާއަތަކަށް ވެސް ބޮޑެތި ދަތިތަކާއި ތަކުލީފުތައް ކުރިމަތިކުރުވަމުންދާ ކަމަށް އެމްޑީޕީގެ ކުރީގެ ރައީސް ޑރ. އިބްރާހިމް ދީދީ ވިދާޅުވެއްޖެއެވެ.
ރާއްޖެ ޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ޑީޑީ ވިދާޅުވީ މި ސަރުކާރުން ހުރިހާ ސިނާޢަތެއްގެ މަސައްކަތް ކުރައްވާ ބޭފުޅުންނަށް ވަރަށް ބޮޑެތި ދަތިތަކާއި ތަކުލީފުތައް ކުރިމަތި ކުރުވަމުންދާ ކަމަށެވެ. އޭގެ ތެރޭގައި ޓެކްސީ ޑްރައިވަރުންނަށް ވެސް ޓެކްސީ ޑްރައިވަރުން ހޯދަމުން އައި އާމްދަނީއާއި ޓެކްސީ ޑްރައިވަރުންގެ ޢާއިލާތަކާއި ވަރަށް ބޮޑު ނިކަމެތި ކަމެއް ލިބޭ ގޮތަށް ސަރުކާރުގެ ސިޔާސަތުތައް ބައްޓަންކުރަމުން ގެންދާ ކަމަށެވެ. މީގެ އިތުރުން ސަރުކާރުން ސީދާ ވިޔަފާރީގެ ތެރެއަށް ވަދެ އެ ބޭފުޅުން ކުރަމުން އަންނަ ބުރަ މަސައްކަތުން ލިބޭ އާމްދަނީއަށް ވަރަށް ބޮޑު ހުރަހެއް އަޅަން މަސައްކަތް ކުރަމުންދާ ކަމަށް ޑީޑީ ވިދާޅުވިއެވެ.
ޑީޑީ ވިދާޅުވީ ރިސޯޓުތަކުގައި މަސައްކަތް ކުރައްވާ މުވައްޒަފުންނަށް ޑޮލަރުން ލިބެން އައި މުސާރަކޮޅު ނުލިބޭ ގޮތަށް އެކަމަށް ވެސް ހުރަސް އަޅުއްވާފައިވާ ކަމަށެވެ. އަދި މަސްވެރިންނަށް ލިބެންޖެހޭ ފައިސާއަކީ އެއީ ސަރުކާރުގެ ހެޔޮފުޅުކަމުން ދޭންޖެހޭ ފައިސާއެއް ނޫން ކަމަށާއި، ނަމަވެސް އެގޮތަށް ސިފަކުރުމަށް ސަރުކާރުން މަސައްކަތް ކުރަމުންދާ ކަމަށް ޑީޑީ ވިދާޅުވިއެވެ.
ޑީޑީ ވިދާޅުވީ މި ސަރުކާރުގެ ޓްރާންސްޕޯޓް މިނިސްޓަރަކީ ވެސް ވަރަށް ރުންކުރު ބޭފުޅެއްގެ ގޮތުގައި ފާހަގަވެގެން ގޮސްފައިވާ ކަމަށެވެ. ޑީޑީ ވިދާޅުވީ އެ ބޭފުޅާ ވިދާޅުވާ އެއްޗަކާއި ކުރައްވާ ކަމަކާ ވެސް ދިމާނުވާކަމަށް ޓެކްސީ ޑްރައިވަރުން ފާހަގަކުރައްވާ ކަމަށާއި، އޯގާތެރިކަމާ އެކީގައި ޓެކްސީ ޑްރައިވަރުންނާ އެކީގައި ބައްދަލުވުންތަކެއް ނުބޭއްވޭ ކަމާއި އެ ބޭފުޅުންގެ ހުރި ކަންބޮޑުވުންތަކަށް އެޑްރެސް ނުކުރައްވާ ކަމާއި އެތައް ޝަކުވާތަކެއް ލިބެމުންދާ ކަމަށެވެ.
ޑީޑީ ވިދާޅުވީ ސަރުކާރުން ހުރިހާ ވިޔަފާރިތަކަށް ވަދެގެން ކޮރަޕްޝަންގެ ޢަމަލުތައް އިންތިހާއަށް ކުރިއަށް ގެންދިޔުމަށް މި ބޭފުޅުން ރާވާފައި އޮތް ކަމުގެ ހެއްކަކީ އޭސީސީގެ ފުރިހަމަ ކޮންޓްރޯލް ސަރުކާރުން ނެގުން ކަމަށެވެ.
