އޮމަދޫ ބަނދަރުގެ ދަތިކަން އިންތިހާއަށް، މަސައްކަތް ފެށުމަށް ސާމާނު ގެންގޮސްފި

އދ. އޮމަދޫ ބަނދަރު ތަރައްޤީ ކުރުމުގެ މަސައްކަތް ހުއްޓިފައި އޮންނަތާ 2 އަހަރަށް ވުރެ ގިނަ ދުވަސް ވެފައިވަނިކޮށް، އަލުން މަސައްކަތް ފެށުމަށް ސާމާނު ގެނެސްފައިވާ ކަމަށް އޮމަދޫ ކައުންސިލުން ބުނެފި އެވެ.

ރާއްޖެއެމްވީ އާއި ވާހަކަ ދައްކަމުން އޮމަދޫ ކައުންސިލުން ބުނެފައިވަނީ 2023 ވަނަ އަހަރު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާއި ހަވާލުކޮށްގެން ކުރިއަށްގެންދިޔަ މިމަޝްރޫއުގެ މަސައްކަތް ވަކި ހިސާބަކުން ހުއްޓުމަކަށް އައިސްފައިވަނީ ކޮންސެޕްޓަށް ބަދަލުތަކެއް ގެންނަން ބޭނުންވެގެން ކަމަށެވެ. ނަމަވެސް އަލުން މަސައްކަތް ފެށުމަށްޓަކައި ބޭނުންވާ ސާމާނު މިހާރު އޮމަދޫއަށް ގެނެސްފައިވާ ކަމަށްވަނީ ބުނެފައެވެ.

މަސައްކަތް ކުރުމަށް ބޭނުންވާ ހައިމާކްތަކާއި އެހެނިހެން ސާމާނު ގެނެސްފައިވާއިރު، ބަނދަރުގެ މަސައްކަތް ފެއްޓޭނެ ވަކި ތާރީހެއް އެނގިފައިނުވާ ކަމަށް ކައުންސިލުން ވަނީ ބުނެފައެވެ.

ނިމިދިޔަ ސަރުކާރުން މަސައްކަތް ފެށި ނަމަވެސް ބަނދަރުގެ ކޮންސެޕްޓަށް ގެންނަން ބޭނުންވާ ބަދަލުތަކާއި އެކު މަސައްކަތް އަލުން ނުފެށި ވަނިކޮށް ވެރިކަން ބަދަލުވެގެންދިޔުމުން، ކޮންމެވެސް ވަރެއްގެ ޑިލޭތަކެއް އައުމަށްފަހުން، ކައުންސިލުން އޮމަދޫއަކީ ލޯކަލް ޓުއަރިޒަމް ފުޅާވަމުން އަންނަ ރަށަކަށްވެފައި ބޭރު ތޮށީގެ ބޭނުން އެކިއެކި ކަންކަމުގައި ބޭނުންކުރަންޖެހޭއިރު، އޮމަދޫއަށް ދިމާވެފައިވާ ބަނދަރުގެ މައްސަލައާއި ގުޅިގެން މީހުން ދިރިއުޅޭ ރަށަކަށް ލިބޭނެ އެންމެ ބޮޑު ގެއްލުން މިހާރު އެރަށުގެ ރައްޔިތުން ތަހައްމަލު ކުރަމުންދާ ކަމަށް ގިނަ ރައްޔިތުން ދަނީ ބުނަމުންނެއެވެ.

ރަށުގެ މަލަމަތި ވީރާނާވެފައިވާ ތަނެއްގެ ގޮތުގައި ފެންނައިރު، ބަނދަރުގެ ޖާގައިގެ ދަތިކަން އިންތިހާއަށް ގޮސްފައިވާއިރު މޫސުމް ގޯސްވެއްޖެ ނަމަ ބަނދަރު ބޭނުންނުކުރެވެއެވެ.

އެގޮތުން މޫސުމް ގޯސްވާ ދުވަސްވަރު ރަށުގެ ރައްޔިތުން ނުނިދާ ބަނދަރުގައި އަޅާފައިވާ ލޯންޗާއި ދޯނި ފަހަރުތައް ސަލާމަތްކުރުމަށް މަސައްކަތްތަކެއް ކުރާ ކަމަށާއި، މިހާތަނަށް އައި އިރު ތިން ލޯންޗެއް އަޑިއަށް ގޮސް މިލިއަނުން ގެއްލުންތައް ލިބިފައިވެއެވެ. އަދި އޮމަދޫ އަކީ ކަންނެލި މަސްވެރިކަންވެސް ފުޅާ ދާއިރާއެއްގައި ކުރަމުން އަންނަ ރަށެކެވެ.

އދ. އޮމަދޫ ބަނދަރު ތަރައްގީ ކުރުމުގެ މި މަޝްރޫއުގެ މަސައްކަތް އެމްޓީސީސީއާ ހަވާލު ކޮށްފައިވަނީ 630 ދުވަހުގެ ތެރޭގައި ނިންމާ ގޮތަށް 72،322،592.58 ރުފިޔާއަށެވެ.

މި މަޝްރޫއުގެ ދަށުން 49،765 ކިއުބިކް މީޓަރުގެ ސަރަހައްދެއްގެ އައު ބަނދަރު ފުން ކުރުމާއި 12،105 ކިއުބިކް މީޓަރުގެ ނެރު ފުން ކުރުމާއި ބްރޭކްވޯޓަރ ޖެހުމާއި ރިވެޓްމަންޓް ޖެހުމާއި އެއްގަމުތޮށި ލުމުގެ މަސައްކަތް ކުރާނެއެވެ. އަދި ސްކޯރިން އޭޕްރަން ޖެހުމާއި މޫރިންގ ރިންގު ހަރުކުރުމާއި ރޭމްޕު ހެދުމާއި އެކްސެސް ޕްލެޓްފޯމް އެޅުން ވެސް މި މަޝްރޫއުގެ ތެރޭގައި ހިމެނެއެވެ.

މީގެ އިތުރުން 150 މީޓަރުގެ ދެ ކޮންކްރީޓް ޖެޓީ ހެދުމާއި ނެވިގޭޝަން ލައިޓްހަރުކުރުމާއި މަގު ބައްތި ހަރުކުރުމާއި ޕޭވްމަންޓު ހެދުމުގެ މަސައްކަތް ވެސް އެމްޓީސީސީން ކުރާނެ ކަމަށް މިއެއްބަސްވުމުގައިވެ އެވެ.

މި މަސައްކަތް ހުއްޓިފައިވާއިރު، މުޅި ބަނދަރު ސަރަހައްދުގައި މިމަސައްކަތްކުރުމަށް އެމްޓީސީސީން ގެނައި ދަނގަޑާއި އެނޫންވެސް ގިނަ އަދަދެއްގެ ސާމާނު ޖަމާކޮށްފައި ހުރުމުން، ތަކްލީފްތަކާއި އެކު ބަނދަރު ބޭނުންކުރަމުންދާ މީހުންނަށްވަނީ އިތުރު ތަކްލީފްތަކާއި ކުރިމަތިވެފައެވެ.

17 އަށްވުރެ ގިނަ ގެސްޓްހައުސް މިވަގުތުވެސް އޮޕަރޭޓްކުރަމުންދާ އޮމަދޫގެ ގެސްޓްހައުސްތަކުގެ ވެރިންވެސް ވަނީ، ބަނދަރުގެ ދަތިކަން ހުރުމުން އެކަމުގެ ކަންބޮޑުވުން ފާޅުކޮށްފަ އެވެ.

ރައްޔިތުންގެ ހުރި ކަންބޮޑުވުންތަކަށް ހައްލު ހޯދުމަށް މަސައްކަތް ކުރަމުންދާ ކަމަށް ކައުންސިލުން ވަނީ ބުނެފައެވެ.