ރައީސް މުއިއްޒު އޮމަދޫއަށް ކުރައްވާ ދަތުރުފުޅާއި ދިމާކޮށް، އޮމަދޫގެ އިހްތިސާސްގައި ތިން ފަޅު ހިމަނައިފި
7 އޮކްޓޯބަރު 2025 | އަންގާރަ 05:36އެމަނިކުފާނު މިވަގުތު ހުންނެވީ ވެސް އދ. އަތޮޅުގެ ކައުންސިލުތަކާއި ރައްޔިތުންނަށް ބައްދަލުކުރައްވަން އެ އަތޮޅުގައި
އ.ދ އޮމަދޫ
ރައީސުލްޖުމްހޫރިއްޔާ ޑރ. މުހައްމަދު މުއިއްޒު، އަރިއަތޮޅު ދެކުނުބުރިއަށް ކުރައްވަމުން ގެންދަވާ ދަތުރުފުޅުގެ ތެރެއިން، އދ. އޮމަދޫ ކައިރީ އޮންނަ ކުޑަދޫފަޅާއި އިތުރު ދެ ފަޅަކީ އެ ރަށުގެ ބައެއްގެ ގޮތުގައި ހަމަޖައްސަވައިފި އެވެ.
އެމަނިކުފާނު މިދަތުރުފުޅު ފެއްޓެވުމުގެ ކުރިން މިކަން އިއުލާންކުރައްވާ ގެޒެޓްގައި ޝާއިރުކުރެއްވި ގަރާރުގައި ވިދާޅުވެފައިވަނީ، އޮމަދޫގައި ފަތުރުވެރިކަމާއި އިގްތިސާދީ ގޮތުން ރައްޔިތުންނަށް މަންފާކުރާނެ ތަރައްގީގެ މަސައްކަތްތައް ކުރުމަށް ކުޑަދޫފަޅާއި ކޯޑު ނަމްބަރު RF1329 ފަޅާއި RF1330 އަކީ އެ ރަށުގެ ބައެއްގެ ގޮތުގައި ރައީސް ހަމަޖައްސަވާފައިވާ ކަމަށެވެ.
ރައީސް އެގޮތަށް ނިންމެވިއިރު އެމަނިކުފާނު މިވަގުތު ހުންނެވީ ވެސް އދ. އަތޮޅުގެ ކައުންސިލުތަކާއި ރައްޔިތުންނަށް ބައްދަލުކުރައްވަން އެ އަތޮޅުގަ އެވެ.
މީހުން ދިރިއުޅޭ ރަށްތަކާ ކައިރީގައި ހުރި ފަޅުރަށްރަށް އިހުތިސާސްގައި ހިމެނުއްވުމަކީ ރައީސް މުއިއްޒުގެ ރިޔާސީ ވައުދަކަށްވާއިރު، މީގެ ކުރިން ވެސް ގިނަ އަދަދެއްގެ ފަޅުރަށްތައް ރަށްރަށުގެ އިހުތިސާސްގެ ތެރޭގައި ހިމެނުއްވި އެވެ. ނަމަވެސް އެމަނިކުފާނުގެ ސަރުކާރުން ލާމަރުކަޒީ ޤާނޫނު ފުނޑާލުމަށް ގެންނަމުންދާ އިސްލާހްތަކާއި ގިނަ ކައުންސިލްތަކުން ވަނީ ނުރުހުން ފާޅުކޮށްފަ އެވެ.
އަދި އޮމަދޫއަކީ ކުރިއަރަމުން އަންނަ ލޯކަލް ޓުއަރިޒަމްއަށް ހާއްސަ ރަށަކަށްވާއިރު، އެރަށުގެ ގިނަ އަދަދެއްގެ ގެސްޓްހައުސް ވިޔަފާރި ކުރާ ފަރާތްތަކުން ވަނީ އެރަށުގެ ބަނދަރުގެ ދަތިކަން އިންތިހާއަށް ބޮޑުވެފައިވާ ކަމަށް ބުނެ ކަންބޮޑުވުން ފާޅުކޮށްފައެވެ.
އޮމަދޫ ބަނދަރު ތަރައްޤީ ކުރުމުގެ މަސައްކަތް ހުއްޓިފައި އޮންނަތާ 2 އަހަރު ވެފައި ވަނިކޮށް، ކޮންމެވެސް ވަރަކަށް ބަނދަރުގެ މަސައްކަތް ކުރަމުންދާ ކަމަށް ވަނީ މައުލޫމާތުލިބިފައެވެ. އެހެންނަމަވެސް މިމަސައްކަތް އެކަށީގެންވާ ސްޕީޑުގައި ކުރިއަށް ނުދާ ކަމަށް އެރަށުން ރާއްޖެއެމްވީއާއި ވާހަކަ ދެއްކި ފަރާތްތަކުން ވަނީ ފާހަގަކޮށްފައެވެ.
އަދި ފަތުރުވެރިކަމާއި އިގްތިސާދީ ގޮތުން ރައްޔިތުންނަށް މަންފާކުރާނެ ގޮތަށް އިތުރު ފަޅުތައް އެރަށުގެ އިހްތިސާސް ތެރޭގައި ހިމެނި ކަމުގައިވީ ނަމަވެސް ބަނދަރުގެ ދަތިކަން އިންތިހާއަށް ބޮޑުވެފައިވާއިރު އެކަމުން ކުރާނެ މަންފާއެއް ނެތް ކަމަށްވެސް ރަށުގެ ގެސްޓްހައުސް ހިންގާ ފަރާތްތަކުން ވަނީ ބުނެފައެވެ.
17 އަށްވުރެ ގިނަ ގެސްޓްހައުސް މިވަގުތުވެސް އޮޕަރޭޓްކުރަމުންދާ އޮމަދޫގެ ގެސްޓްހައުސްތަކުގެ ވެރިންވެސް ވަނީ، ބަނދަރުގެ ދަތިކަން ހުރުމުން އެކަމުގެ ކަންބޮޑުވުން ފާޅުކޮށްފަ އެވެ.
