ޕޮލިސް އަތުން ބަލިވީ ތިން ސެޓު އެއް ސެޓުން
އޮފު އެފްސީގެ ކޯޗު ރިއްޗަޅޭ
އެސޯސިއޭޝަން ކަޕްގައި އަންގާރަ ދުވަހުގެ ރޭ ޕޮލިސް ކުލަބާ ދެކޮޅަށް ކުޅުނު މެޗުގައި ތާފަތަކަށްވީ ޕޮލިސް ޓީމުގެ ސެޓަރު ކަމަށް އޮފު އެފްސީގެ ކޯޗު މުހައްމަދު ރިޝްވާން (ރިއްޗަޅޭ) ބުނެފިއެވެ.
ޕޮލިސް ކުލަބާ ދެކޮޅަށް ކުޅުނު މެޗުގެ ފުރަތަމަ ސެޓު ހޯދީ އޮފު އެފްސީންނެވެ. ނަމަވެސް ޕޮލިހުން ވަނީ ޖެހިގެން އައި ތިން ސެޓު ހޯދާ މެޗުން މޮޅުވެފައެވެ. މެޗަށްފަހު ރިއްޗަޅޭ ބުނީ އޮފު އެފްސީގެ ކުޅުންތެރިންގެ ކޮމްބިނޭޝަން ރަނގަޅު ކަމަށެވެ. ނަމަވެސް ތަފާތަކަށްވީ ޕޮލިސް ޓީމުގެ ސެޓަރު މުތުސާމީ ކަމަށެވެ. ރިއްޗަޅޭ ބުނީ ކޮމްބިނޭޝަން ރަނގަޅުވި ނަމަވެސް، އޮފު އެފްސީގެ ކުޅުންތެރިންނަށް ލީޑު ހިފަހައްޓަން ނޭންގެނީ ކަމަށެވެ. މީގެ އިތުރުން ރިއްޗަޅޭ ބުނީ ކުޑަ ދުވަސްކޮޅެއް ލިބުމުން ޕްރެކްޓިސް މަދުވިކަމަށެވެ. އަދި އޭގެ ދަތިކަން ދިމާވި ކަމަށެވެ.
މީގެ އިތުރުން ރިއްޗަޅޭ ބުނީ އޮފު އެފްސީން ކުޅެނީ އެ ޓީމުގެ ފެންވަރުގައި ކަމަށެވެ. އެ ޓީމުގެ ސެޓަރު ވެސް އޭނާގެ ފެންވަރުގައި ކުޅޭކަން ފާހަގަކޮށް ރިއްޗަޅޭ ބުނީ އެ ޓީމުގެ ބިދޭސީ ކުޅުންތެރިންގެ ކުޅުން ވެސް ރަނގަޅު ކަމަށެވެ.
އޮފު އެފްސީގައި ހިމެނޭ ބިދޭސީ ކުޅުންތެރިންނަށް ބަލާއިރު އެޓޭކަރު އަމިތު ގޫލިއާ އާއި، ބްލޮކަރު ޖޯން ޖޯސެފްގެ އިތުރުން ގުރޫ ޕްރަޝާންތު ހިމެނެވެ. މި ކުޅުންތެރިންނާއެކު އޮފު އެފްސީން މުބާރާތުގައި ރަނގަޅު ކުޅުމެއް ދައްކައެވެ. އެ ޓީމުން ވަނީ ކުޅުނު ތިން މެޗުގެ ތެރެއިން އެއް މެޗުން މޮޅުވެފައެވެ. އެއީ ގުޑީސް ސްޕޯޓްސް ކުލަބާ ދެކޮޅަށް ކުޅުނު މެޗެވެ. ފުރަތަމަ މެޗުގައި ބަލިވީ ކުލަބް ވެމްކޯ އަތުންނެވެ.
މުބާރާތުގައި އޮފު އެފްސީގެ މެޗެއް ދެން އޮންނާނީ ބުރާސްފަތު ދުވަހުގެ ހަވީރު 16:15 ގައެވެ. އެ މެޗުގައި އެ ޓީމު ނިކުންނާނީ އެންމެ ފަހުގެ ޗެމްޕިއަން ދިވެހި ސިފައިންގެ ކުލަބާ ދެކޮޅަށެވެ.
