ހާޑު ދެ މެޗެއް ކުޅެފައިވުމުން ކުޅުންތެރިންގެ ވަރުބަލިކަން އެބަހުރި: ފައްލޯ

އެސޯސިއޭޝަން ކަޕްގައި އަންގާރަ ދުވަހުގެ ރޭ ކުޅުނު މެޗުގައި ކުޅުންތެރިންގެ ވަރުބަލިކަން ފެނުނު ކަމަށް ޕޮލިސް ކުލަބުގެ ކޯޗު ފަތުހުއްﷲ ވަހީދު (ފައްލޯ) ބުނެފިއެވެ.

ފައްލޯ މިހެން ބުނީ މުބާރާތުގައި ޕޮލިސްގެ ތިން ވަނަ މެޗުގައި އޮފު އެފްސީގެ މައްޗަށް ތިން ސެޓު އެއް ސެޓުން ކުރި ހޯދި މެޗަށްފަހުއެވެ. ފައްލޯ ބުނީ މުބާރާތުގައި މީގެ ކުރިން ޕޮލިސް ކުޅުނު ދެ މެޗަކީ ވެސް ވަރަށް ހާޑު ދެ މެޗު ކަމަށެވެ. އަދި އެ ދެ މެޗު ވެސް ކާމިޔާބުކުރެވުނީ ފަސް ސެޓަށް ގޮސްގެންކަމަށެވެ. ފައްލޯ ބުނީ، އެކަމުގެ ސަބަބުން ކުޅުންތެރިންގެ ފަރާތުން ވަރުބަލިކަން ފެނުނު ކަމަށެވެ. ފުރަތަމަ މެޗުގައި ގުޑީސް ސްޕޯޓްސް ކުލަބާ ދެކޮޅަށް އަދި ދެ ވަނަ މެޗުގައި ދިވެހި ސިފައިންގެ ކުލަބާ ދެކޮޅަށް ކުޅެވެސް ޕޮލިސް މޮޅުވީ ފަސް ސެޓަށް ގޮސްގެން ކަމަށެވެ.

މީގެ އިތުރުން ފައްލޯ ބުނީ މުބާރާތުގެ ކުރީ ކޮޅުގައި މިފަދަ ކާމިޔާބީއެއް ލިބުމަކީ މުބާރާތުގައި ކުރިއަށް ހުރި މެޗުތަކުގައި ޒުވާން ކުޅުންތެރިންނަށް ހިތް ހަމަ ޖެހިގެން، ރަނގަޅު ކުރަން ހުރި ކަންކަން ރަނގަޅު ކުރުމަށް ލިބުނު ފުރުސަތެއް ކަމަށެވެ.

މީގެ އިތުރުން ޕޮލިސް ޓީމުގެ ސެޓަރު މުތުސާމީގެ މޮޅު ކުޅުމާ ގުޅޭގޮތުން ފައްލޯ ބުނީ އޭނާ އެއީ ޓީމުގެ ބެކްބޯންކަމަށެވެ. އަދި ކުޅުންތެރިން ނަގަން ލިބުނު ފުރުސަތުގައި ނިންމި ނިންމުމަކީ ވެސް އެއީ ކަމަށެވެ. ފައްލޯ ބުނީ ޕޮލިސް ޓީމަކީ ގިނަ ޒުވާން ކުޅުންތެރިން ހިމެނޭ ޓީމަކަށްވުމުން ސެޓަރުގެ ބޭނުމަކީ އެ ކުޅުންތެރިން ލައްވާ ފައްލޯ ބޭނުންވާ ގޭމު ކުޅުވުން ކަމަށެވެ.

މުބާރާތުގައި ޕޮލިސް ޓީމުގެ ސެޓަރުގެ ފަރާތުން މޮޅު ކުޅުމެއް ފެންނައިރު، އޭނާ އަންނަނީ މެޗުތަކުގައި އެ ޓީމުގައި ހިމެނޭ ޒުވާން ކުޅުންތެރިންނަށް ވެސް އެޓޭކްކުރަން ފުރުސަތު ދެމުންނެވެ. އެގޮތުން ޕޮލިސް ޓީމުގައި ހިމެނޭ ޒުވާން ދެ ކުޅުންތެރިންކަމަށްވާ މާއިޝް އަހުމަދާއި ހައިލަމް ހަސަންގެ ކުޅުން މި މުބާރާތުގައި ފާހަގަވެއެވެ.

ކުޅުނު ތިން މެޗުން މޮޅުވެ ލިބުނު ހަތް ޕޮއިންޓާއެކު މިވަގުތު ޕޮލިސް އޮތީ ތާވަލްގެ އެއް ވަނަ މަގާމުގައެވެ. ދެ ވަަނަ މަގާމުގައި އޮތް ކުލަބް ވެމްކޯ ވަނީ ކުޅުނު ދެ މެޗުން މޮޅުވެ ހަ ޕޮއިންޓު ހޯދާފައެވެ. ވެމްކޯ އޮތީ ތާވަލްގެ ދެ ވަނަ މަގާމުގައެވެ. ކުޅުނު ދެ މެޗުން ސިޓީ ސްޕޯޓްސް ކުލަބަށް ލިބެނީ ތިން ޕޮއިންޓެވެ. އަދި އޮފު އެފްސީ ކުޅުނު ތިން މެޗުން އެ ޓީމަށް ލިބެނީ ތިން ޕޮއިންޓެވެ. ދިވެހި ސިފައިންގެ ކުލަބާއި، ގުޑީސް ސްޕޯޓްސް ކުލަބަށް ލިބެނީ އެއް ޕޮއިންޓެވެ.

މުބާރާތުގައި ހުކުރު ދުވަހު ޕޮލިސް ނިކުންނާނީ ސިޓީއާ ދެކޮޅަށެވެ.