ބޭނުމަކީ މެޗަކަށްފަހު މެޗަކުން މޮޅުވުން: ކުޑަ ކާއްޓޭ
ދެ ވަނަ މެޗުގައި ވެމްކޯ ވަނީ ސިޓީ އަތުން މޮޅުވެފައި
ވެމްކޯގެ ކެޕްޓަން އިސްމާއިލް ސާޖިދު (ކުޑަ ކާއްޓޭ)
އެސޯސިއޭޝަން ކަޕްގެ ފިިރިހެން ޑިވިޝަންގައި ކުލަބް ވެމްކޯގެ ވިސްނުމަކީ މެޗަކަށްފަހު މެޗަކުން މޮޅުވުން ކަމަށް އެ ޓީމުގެ ކެޕްޓަން އިސްމާއިލް ސާޖިދު (ކުޑަ ކާއްޓޭ) ބުނެފިއެވެ.
ވެމްކޯއިން ވަނީ މުބާރާތުގައި މިހާތަނަށް ކުޅުނު ދެ މެޗުން ވެސް މޮޅުވެފައެވެ. އަދި މިވަގުތު ޕޮއިންޓު ތާވަލްގެ އެއް ވަނަ މަގާމުގައި އޮތީ ވެސް ވެމްކޯއެވެ. މުބާރާތުގެ ފުރަތަމަ މެޗުގައި ވެމްކޯ މޮޅުވީ އޮފު އެފްސީއާ ދެކޮޅަށް ކުޅެއެވެ. އަދި ދެ ވަނަ މެޗުގައި ހޯމަ ދުވަހުގެ ރޭ ވަނީ ތިން ސެޓު އެއް ސެޓުން ސްޕޯޓްސް ކުލަބް ސިޓީ ބަލިކޮށްފައެވެ.
މެޗަށްފަހު ވާހަކަދައްކަމުން ވެމްކޯގެ ކެޕްޓަން ކާއްޓޭ ބުނީ އެ ޓީމުގެ ތަފާތަކީ ބިދޭސީ ކުޅުންތެރިޔާ އަޝްވަލް ރާއީ ކަމަށެވެ. އަދި މިހާރު އެ ޓީމުގެ ހުރިހާ ހިތްވަރަކީ ވެސް އަދި އުންމީދަކީ ވެސް އަޝްވަލް ކަމަށް ކާއްޓޭ ބުންޏެވެ. އަދި އެ ޓީމުގެ ބިދޭސީ އެއް ކުޅުންތެރިޔަކަށް ލިބުނު އަނިޔާއެއްގެ ސަބަބުން އޭނާ ދެން މުބާރާތުގައި ނުފެންނާނެކަމަށް ކާއްޓޭ ބުންޏެވެ. މީގެ އިތުރުން ކާއްޓޭ ބުނީ ޓީމުގެ ހުރިހާ ކުޅުންތެރިން ވެސް ކުރިއަށްދަނީ އެތަން ފޫބައްދަންޖެހޭނެ ކަން އެނގިގެން ކަމަށެވެ.
މީގެ އިތުރުން ކާއްޓޭ ބުނީ ސީދާ ފައިނަލުގެ ޖާގައެއް ލިބޭނެ ކަމަށް އަދި ނުދެކޭ ކަމަށެވެ.
ވެމްކޯއަކީ މުބާރާތުގައި ޕްރެލިމިނަރީ ބުރުގައި ވެސް ވާދަކުރި ޓިމެެވެ. އެސޯސިއޭޝަން ކަޕުން ވެމްކޯ ޖާގަ ހޯދީ ޕްރެލިމިނަރީ ބުރުގެ އެއް ވަނަ ޓީމުގެ ގޮތުގައެވެ.
މުބާރާތުގައި ވެމްކޯގެ ފަރާތުން އަންނަނީ މޮޅު ކުޅުމެއް ދައްކަމުންނެވެ. ބިދޭސީ ކުލޫންތެރިންނާއެކު އެ ޓީމުގެ ދިވެހި ކުޅުންތެރިންގެ ކުޅުންވެސް ފާހަގަކޮށްލެވެއެވެ.
މުބާރާތުގައި ބުދަ ދުވަހުގެ ހަވީރު ވެމްކޯ ނުކުންނާނީ އެންމެ ފަހުގެ ޗެމްޕިއަން ދިވެހި ސިފައިންގެ ކުލަބާ ދެކޮޅަށެވެ.
