ގައުމީ ވޮލީ ލީގުގައި ފަހަތުން އަރައި ކުލަބް ވެމްކޯ ބަލިކޮށް ދިވެހި ސިފައިންގެ ކުލަބުން މޮޅަކާއެކު ލީގު ފަށައިފިއެވެ.

މި ދެ ޓީމު އެސޯސިއޭޝަން ކަޕްގައި ދެ ފަހަރަކު ވާދަކުރިއެވެ. ލީގު ބުރުގައި ވާދަ ކުރި މެޗު ސީދާ ތިން ސެޓުން ސިފައިން ކާމިޔާބުކުރި ނަމަވެސް، ޕްލޭ އޮފްގައި ވެމްކޯއިން ވަނީ ސީދާ ތިން ސެޓުން ސިފައިންގެ މައްޗަށް ކުރި ހޯދާފައެވެ.

އާދިއްތަ ދުވަހުގެ ހަވީރު ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު މެޗުގެ ފުރަތަމަ ސެޓު ކާމިޔާބުކުރީ ވެމްކޯއިންނެވެ. ވާދަވެރިކޮށް ދިޔަ މި ސެޓު ވެމްކޯ އިން ކާމިޔާބުކުރީ ސިފައިންނަށް ހެދުނު ގޯސްތަކެއްގެ ފައިދާ ނަގައި 25-18 ންނެވެ. ސެޓުގައި ވެމްކޯގެ އަޝްވަލް ރާއީ އާއި އިސްމާއިލް ސާޖިދު (ކުޑަކާއްޓޭ)ގެ ބާރު ހަމަލާތަކެއް ފެނުނެވެ. ސިފައިންގެ ޓީމުން ވަނީ ދެ ވަނަ ސެޓުގައި އެ ޓީމުގެ ކުޅުން ރަނގަޅުކޮށް ސެޓު ކާމިޔާބުކޮށްފައެވެ. އެ ޓީމުގެ ބިދޭސީ އެޓޭކަރު މަނޫ ޖޯސެފްގެ ހަމަލާތަކުން ސިފައިން ސެޓު ނިންމާލީ ލީޑުގައި އޮވެއެވެ. މި ސެޓު ސިފައިން ކާމިޔާބުކުރީ 25-19 ންނެވެ.

ސިފައިންގެ ޓީމުން ވަނީ އެ ރޫހުގައި ނިކުމެ ޖެހިގެން އައި ދެ ސެޓު ވެސް ކާމިޔާބުކޮށް މެޗުން މޮޅުވެފައެވެ. މެޗުގެ ތިން ވަނަ ސެޓު ސިފައިންގެ ޓީމުން ކާމިޔާބުކުރީ 25-23 ންނެވެ. ދެ ޓީމުގެ ފަރާތުން ވެސް ވާދަވެރި ކުޅުމެއް މި ސެޓުގައި ފެނުނެވެ. އަދި ހަތަރު ވަނަ ސެޓު ސިފައިންގެ ޓީމުން ކާމިޔާބުކުރީ 25-19 ންނެވެ. މެޗުގެ މޮޅު ކުޅުންތެރިޔަކަށް ހޮވުނީ ސިފައިންގެ ޓީމުގެ މަނޫ ޖޯސެފްއެވެ.

މުބާރާތުގައި މިރޭ ސްޕޯޓްސް ކުލަބް ސިޓީ ނިކުންނާނީ ޕޮލިސް ކުލަބާ ދެކޮޅަށެވެ.