އޮސްޓްރޭލިޔާ ވަރލްޑްކަޕުން ޖާގަ ހޯދައިފި

މިއަހަރުގެ ނޮވެމްބަރު, ޑިސެމްބަރު މަހު ޤަތަރުގައި އޮންނަ ވަރލްޑްކަޕުން އޮސްޓްރޭލިޔާ ޖާގަ ކަށަވަރުކޮށްފިއެވެ. އޮސްޓްރޭލިޔާ ވަރލްޑްކަޕްގެ ޖާގަ ޔަޤީންކުރީ އިންޓަރ ކޮންޓިނެންޝިއަލް ޕްލޭއޮފްގައި ޕެރޫ ބަލިކޮށްގެންނެވެ.

ޕެރޫގެ މައްޗަށް އޮސްޓްރޭލިޔާ ކުރި ހޯދީ މެޗުގެ ފުރިހަމަ ވަގުތު ލަނޑެއް ނުޖެހި ނަތީޖާ އެއްވަރުވެ, ޕެނަލްޓީގައި ކުރި ހޯދައިގެންނެވެ. ޕެނަލްޓީގައި އޮސްޓްރޭލިޔާއިން ކުރި ހޯދީ 5-4 ނެވެ. އޮސްޓްރޭލިޔާއަކީ ޤަތަރު ވަރލްޑްކަޕުން ޖާގަ ހޯދި 31 ވަނަ ޤައުމެވެ. މިއީ އޮސްޓްރޭލިޔާ ވަރލްޑްކަޕްގައި ކުޅޭނެ ހަ ވަނަ ފަހަރެވެ. 2006 ވަނަ އަހަރުގެ ފަހުން އޮސްޓްރޭލިޔާ އަންނަނީ ވަރލްޑްކަޕްގައި ވާދަކުރަމުންނެވެ. މުބާރާތުގައި އޮސްޓްރޭލިޔާ ވާދަކުރަން ޖެހޭނީ ގްރޫޕް ޑީގައެވެ. އެގްރޫޕްގައި ދެން ހިމެނެނީ ފްރާންސާއި, ޑެންމާކާއި, ޓިޔުނީޝިޔާއެވެ.

ވަރލްޑްކަޕުން ޖާގަ ލިބޭ ފަހު ޤައުމު ޔަޤީންވާނީ އަންގާރަ ދުވަހުގެ ރެއެވެ. އެޖާގައަށް ވާދަކުރާނީ ނިއުޒީލެންޑާއި, ކޮސްޓަރިކާއެވެ.