ރާއްޖެ މެޗަށް ޓީމުގެ ރޫހު ރަނގަޅު ކުރަންޖެހޭ: ބަނގްލަދޭޝް ކޯޗު

ވޯލްޑްކަޕް ކޮލިފައިންގައި މާދަމާ ރާއްޖެއާ ދެކޮޅަށް ނުކުންނައިރު ބަނގްލަދޭޝް ޓީމުގެ ރޫހު ރަނގަޅު ކުރަންޖެހޭ ކަމަށް ކޯޗު ހާވިއާ ކަބަރޭރާ ބުނެފި އެވެ.

އޭނާ މިހެން ބުނީ ފުރަތަމަ 11ގެ މުހިންމު ތިން ކުޅުންތެރިއަކު އަހުލާގީ މައްސަލަތަކާހުރެ ގައުމީ ޓީމުނާއި ކުލަބުން ސަސްޕެންޑް ކުރުމާ ގުޅިގެންނެވެ. އެއީ މިދިޔަ މަހު ރާއްޖޭގައި ކުޅުނު އޭއެފްސީ ކަޕް މެޗަށް ފަހު އެނބުރި ގައުމަށް ދިޔައިރު ބަނގުރާ ގެންދިޔަ މައްސަލާގަ އެވެ. މިކަމާ ގުޅިގެން ސަސްޕެންޑްކޮށްފައިވަނީ ގޯލްކީޕަރު އަނީސުއްރަހުމާން ޒިކޯ އާއި ޓޮޕޫ ބަރުމާން އަދި ޝައިހް މުރުސަލީން އެވެ.

ކޯޗު ބުނީ މި ތިން ކުޅުންތެރިންނަކީ ފާއިތުވެދިޔަ ދޮޅު އަހަރު ފުރަތަމަ 11ގެ މުހިންމު ތިން ކުޅުންތެރިން ކަމަށްވުމުން އެމީހުންގެ ކުއްލި ވަކިވުމުގެ ނޭދެވޭ އަސަރު ކުޑަކުރަންޖެހޭ ކަމަށެވެ.

އޭނާ އަދި ބުނީ ރާއްޖެ އާއި ބަނގްލަދޭޝް އަކީ ވަރަށް ވާދަވެރި ދެ ގައުމު ކަމަށާއި މިއަހަރުގެ ސާފް ޗެމްޕިއަންޝިޕުގައި ރާއްޖެ ބަލިކުރަން ބަނގްލަދޭޝް ދެއްކި ހިތްވަރު މި މެޗުގައި ވެސް ދައްކަންޖެހޭ ކަމަށެވެ.

ސާފް ޗެމްޕިއަންޝިޕުގައި ރާއްޖެ ވަނީ ބަނގްލަދޭޝް އަތުން ބަލިވެފަ އެވެ. މިއީ ސާފުގައި 20 އަހަރު ތެރޭގައި ބަނގްލަދޭޝް އަތުން ބަލިވި ފުރަތަމަ ފަހަރެވެ. އަދި މިއީ އެމުބާރާތުގެ ގްރޫޕް ސްޓޭޖަށް ނުގޮސް ރާއްޖެ ކެޓި ފުރަތަމަ ފަހަރެވެ.

މިއަށްފަހު މި ދެ ޓީމު ކުޅޭ ފުރަތަމަ މެޗަށް ރާއްޖޭގެ ތައްޔާރުވުންތައް ފުރިހަމައެއްނޫނެވެ.