ރައްޔިތުންގެ މަޖިލީހުގެ ރައީސް، މުޙައްމަދު ނަޝީދަށް އަމާޒުކޮށް ދިން ހަމަލާގެ މައްސަލަ ބަލާ ބެންޗު ވީހާވެސް އަވަހަށް އެކުލަވާލުމަށް ވެރިކަން ކުރާ މައި ޕާޓީ އެމްޑީޕީން ގޮވާލައިފިއެވެ.
މި މައްސަލައިގެ ރިޔާސަތު ބަލަހައްޓަވަމުން ގެންދެވީ އެ ކޯޓުގެ ގާޒީ އާދަމް މުހައްމަދެވެ. ބެންޗުގައި ދެން ހިމެނިވަޑައިގަންނަވަނީ ގާޒީ ސޮފްވަތު ޙަބީބާއި، ގާޒީ މުހައްމަދު މިސްބާޙުއެވެ.
އެހެންނަމަވެސް، މި މައްސަލައިގައި އެންމެ ފަހުން ބޭއްވި އަޑުއެހުމުގައި މައްސަލަ ބައްލަވާ ގާޒީ އާދަމް މުޙައްމަދު ވަނީ މައްސަލައިން ތަނާޒުލްވެވަޑައިގެންފައެވެ. އެ އަޑުއެހުމުގައި އޮތީ މި މައްސަލައިގެ އިފްތިތާހީ ބަޔާން އިއްވުމެވެ. އެހެންނަމަވެސް، އަޑުއެހުން ފައްޓަވަމުން މައްސަލަ ބައްލަވާ ގާޒީ އާދަމް ވިދާޅުވީ، މި މައްސަލައިގައި ގާޒީ ތަނާޒުލްވެވަޑައިގަތުން އެދި ދައުވާލިބޭ އިސްހާގުގެ ފަރާތުން ކޯޓަށް ސިޓީއެއް ފޮނުވާފައިވާ ކަމަށެވެ.
އިސްހާގުގެ ސިޓީގައި ބަޔާންކޮށްފައިވަނީ އިސްޙާގުގެ އާއިލާ މީހެއްގެ މައްޗަަށް ދައުވާ ކޮށްފައިވާ މައްސަލައެއްގައި ޙުކުމަކާއި ހިސާބަށް ގޮސްފައިވަނިކޮށް އޭނާގެ އާއިލާގެ އެހެން މެމްބަރަކު ގާޒީ އާދަމްްއަށް އިންޒާރު ދީފައިވާ ކަމަށެވެ.
އެ މައްސަލައަކީ ޔާމީން ރަޝީދުގެ މަރުގެ މައްސަލައެވެ. ޔާމީން ރަޝީދުގެ މަރާއި ގުޅިގެން ދައުވާ އުފުލާފައިވާ ފަރާތްތަކުގެ ތެރޭގައި އިސްހާޤުގެ ކޮށްކޮއެއް ހިމެނެއެވެ. ނަމަވެސް އޭނާގެ މައްޗަށް ކުށް ސާބިތުވެފައެއް ނުވެއެވެ.
އެ މައްސަލަ ހިނގަމުންދިޔައިރު އިސްޙާގުގެ އާއިލާ މެމްބަރެެއްގެ ފަރާތުން ގާޒީ އާދަމްއަށް އިންޒާރު ދިން މައްސަލައެއް ފެންމަތިވެފައިވާތީ އިސްޙާގުގެ ސިޓީގައި އެދިފައިވަނީ ގާޒީ އާދަމް މި މައްސަލައިން ތަނާޒުލްވެވަޑައިގަތުމަށެވެ. ވުމާއެކު، ޝަރީއަތުންވެސް އެކަންކަން އިތުރަށް ސާފު ކުރުމަށްފަހު ގާޒީ ވަނީ މައްސަލައިން ތަނާޒުލްވެވަޑައިގަންނަވާފައެވެ.
އެކަމާ ގުޅޭގޮތުން އެމްޑީޕީން ބުނީ، ޤާޟީގެ ފަރާތްޕުޅުން، އެ އެޅުއްވި ފަޔަވަޅަކީ، އިންސާފުން ޝަރީޢަތް ކުރިއަށް ގެންދިއުމަށް މުހިންމުކަމަށް ވާއިރު، މި މައްސަލައިގެ އަޑުއެހުންތައް މެދުކެނޑުމެއްނެތި ގެންގޮސް ނިންމާލުމަކީ އެއަށްވުރެ މުހިންމު ކަމެއް ކަމުގައި ދެކޭ ކަމަށެވެ.
ކްރިމިނަލް ކޯޓުން ވީހާވެސް އަވަހަކަށް މި މައްސަލަ ބަލާ ބެންޗު އެކުލަވާލައި، އަޑުއެހުންތައް ވިދިވިދިގެން ގެންދިއުމަށް އެމްޑީޕީން ވަނީ ގޮވާލާފައެވެ.
