އެސޯސިއޭޝަން ކަޕް: މެޗު ޝެޑިއުލަށް ބަދަލު ގެނެސްފި

ވީއޭއެމް އެސޯސިއޭޝަން ކަޕް ފިރިހެން ޑިވިޝަންގެ މެޗު ޝެޑިއުލަށް ބަދަލު ގެނެސްފިއެވެ.

ބޮޑު ބަދަލަކާއެކު މި ފަހަރުގެ މުބާރާތުގައި ވާދަކުރާ ކޮންމެ ޓީމެއްގައި ވެސް ބިދޭސީ ތިން ކުޅުންތެރިން ހިމެނެއެވެ. މި ގޮތަށް މިއަހަރުގެ މުބާރާތް ވަނީ ހޮނިހިރު ދުވަހުގެ ރޭ ފަށާފައެވެ. މުބާރާތުގައި ހޮނިހިރު ދުވަހުގެ ރޭ ކުޅުނު ދެ މެޗު ވެސް ފެނުނީ ވަރަށް ވާދަވެރިކޮށެވެ. ރޭގެ މެޗުތައް ވަނީ ދިގުލައި ގޮސްފައެވެ. މުބާރާތުގެ މެޗުތައް ކުޅެމުން އަންނަނީ ރޭގަނޑު ދެ މެޗު ކުޅޭ ގޮތަށެވެ. އެއީ ފުރަތަަމަ މެޗު 20:15 ގައި އަދި ދެ ވަނަ މެޗު 21:45 ގައި ކުޅޭ ގޮތަށެވެ.

ވީއޭއެމުން ބުނީ މުބާރާތް ވާދަވެރިވުމާ ގުޅިގެން މެޗު ޝެޑިއުލަށް ބަދަލެއް ގެންނަން ނިންމާފައިވާކަމަށެވެ. އެގޮތުން ގެނެވުނު ބަދަލާއެކު އައު ޝެޑިއުލަށް އަމަލުކުރަން ފަށާނީ މާދަމާއިން ފެށިގެން ކަމަށް ވެސް އެ އެސޯސިއޭޝަނުން ވަނީ ބުނެފައެވެ. ވީއޭއެމުން ޝެޑިއުލަށް ގެނެސްފައިވާ ބަދަލަކީ ހަވީރު ވެސް މެޗު ކުޅޭ ގޮތަށް ހަމަޖެއްސުމެއެވެ. އެގޮތުން ރޭގަނޑު 20:15 ގައި ކުޅެން ހަމަޖެހިފައިވާ މެޗުތައް ހަވީރު 16:15 އަށް ވަނީ ބަދަލުކުރެވިފައެވެ. އަދި ރޭގަނޑު 21:45 ގައި ކުޅުމަށް ހަމަޖެހިފައިވާ މެޗުތައް ފަށާނީ ރޭގަނޑު 20:15ގައެވެ.

މި ބަދަލާއެކު މާދަމާއިން ފެށިގެން މުބާރާތުގެ މެޗުތައް ކުޅޭނީ ހަވީރު މެޗެއް އަދި ރޭގަނޑު މެޗެއް ކުޅޭ އުސޫލުންނެވެ. ބަދަލާއެކު މިއަހަރުގެ ވޮލީ ސީޒަން ފެށިއިރު، މިފަހަރުގެ މުބާރާތް ފޯރި ގަދައެވެ. އަދި މެޗުތައް ބަލަން ޒުވާނުންގެ މަރުކަޒަށް ވަންނަ މީހުންގެ އަދަދު ވެސް ވަނީ އިތުރުވެފައެވެ. ރޭގެ ދެ މެޗު ކުރިއަށް ދިޔަ ވަގުތުގައި ވެސް ޒުވާނުންގެ މަރުކަޒު އޮތީ ސަޕޯޓަރުން ވަދެ ފުރާލާފައެވެ.