ޗައިނާއާ ގުޅުން ކަނޑާލުމުގެ ވިސްނުމެއް ޓައިވާނުން ނުގެންގުޅޭ ކަމަށާއި އެގައުމާއެކު ރަނގަޅު ނިޔަތުގައި، ސިޔާސީ ނުފޫޒުން އެއްކިބާވެ، ގުޅުން ބާއްވަން ބޭނުންކަމަށް ޓައިވާންގެ ޕްރިމިއަރ ސޫ ސެންގްޗަންގް ވިދާޅުވެއްޖެއެވެ.

ޓައިވާންގެ ރަސްމީ ނަމަކީ ރިޕަބްލިކް އޮފް ޗައިނާއެވެ. ޓައިވާންއަކީ 1949 ވަނަ އަހަރުގެ ދާހިލީ ހަނގުރާމާގައި ކޮމިއުނިސްޓް ޕާޓީއާ ބައްދަލުކޮށް ބަލިވި ގުރޫޕުން އުފެއްދި ވަކި ސަރަހައްދެކެވެ. ކޮމިއުނިސްޓް ޕާޓީއިން ވެރިރަށަކީ ބޭޖިންގ ކަމުގައި ހަދާ، މައި ޗައިނާ ނުވަތަ ޕީޕަލްސް ރިޕަބްލިކް އޮފް ޗައިނާ އުފެއްދިއެވެ.

ޓައިވާންއަކީ ޗައިނާގެ މުށުތެރެއިން ދެމިގަނެ، މިނިވަން ގައުމެއްގެ ގޮތުގައި ބައިނަލްއަގުވާމީ މުޖުތަމައުގެ ރުހުން ހޯދުމަށް މަސައްކަތް ކުރަމުން އަންނަ ގައުމެކެވެ. ނަމަވެސް ބައިނަލްއަގުވާމީ މައިދާނުގައި، މިނިވަން ގައުމެއްގެ ގޮތުގައި ޓައިވާން ބަލައިގެންފައި ވަނީ މަދު ގައުމަކުންނެވެ.

ޓައިވާން އާއި ޗައިނާއާ ދެމެދު އޮތް ގުޅުމަށް ވަރަށް ބޮޑަށް ބުރުއަރާފައިވާއިރު، ޓައިވާންގެ ސަރުކާރުން ބުނާ ގޮތުގައި އެ ގައުމުގެ ކުރިމަގު ބައްޓަން ކުރުމުގެ ބާރު އޮތް ހަމައެކަނި ހައްގުވެރިންނަކީ އެ ގައުމުގެ އާބާދީގައި ހިމެނޭ 23 މިލިއަން މީހުންނެވެ. އަދި އެމީހުން ބޭނުންވަނީ ސުލްހަ ކަމަށާއި ހަމަލާ ދީފި ނަމަ ގައުމު ދިފާއު ކުރާނެ ކަމަށްވެސް ޓައިވާންގެ ސަރުކާރުން ވަނީ ބުނެފައެވެ.

މައި ޗައިނާއިން ޓައިވާން ވަކިވުމަށް މަސައްކަތް ކުރާނަމަ އަސްކަރީ ފިޔަވަޅު އެޅުމަށް ގާނޫނީ ބާރު ލިބިދޭ ގޮތަށް ޗައިނާގެ ސަރުކާރުން ވަނީ 2005 ވަނަ އަހަރު އެ ގައުމުގެ ގާނޫނަށް ބަދަލު ގެނަސްފައެވެ. މިހާރު ޗައިނާގެ ސަރުކާރުން ދަނީ ޓައިވާންގައި މައި ޗައިނާގެ ސިޔާސީ ނުފޫޒާއި އަސްކަރީ ނުފޫޒު ވަރުގަދަކުރުމަށް މަސައްކަތްކުރަމުންނެވެ.

އާދިއްތަ ދުވަހު ސިންގަޕޫރުގައި ކުރިއަށްދިޔަ ފޯރަމެއްގައި ވާހަކަދައްކަވަމުން ޗައިނާގެ ޑިފެންސް މިނިސްޓަރު ވެއި ފެންގްހެއި ވަނީ ޗައިނާގެ ސަރުކާރުން ބޭނުންވަނީ ސުލްހަވެރިކަމާއެކު ޓައިވާނާ ދެމެދު އުފެދިފައިވާ މައްސަލަތައް ހައްލުކުރަން ކަމަށާއި އެހެންނަމަވެސް އެކަން އެގޮތަށް ނުކުރެވޭ ނަމަ އިތުރު އެހެން ގޮތަކުންވެސް މައްސަލަ ހައްލުކުރާނެ ކަމަށް ވިދާޅުވެފައެވެ.

ޗައިނާއިން ޓައިވާނުން އެކްސްޕޯޓްކުރާ ފާނަ އިމްޕޯޓްކުރުން މަނާކުރުމުން އެކަމާ ގުޅޭގޮތުން ނޫސްވެރިންނާ ވާހަކަދައްކަވަމުން ޓައިވާންގެ ޕްރިމިއަރ ސޫ ސެންގްޗަންގް ވަނީ ޓައިވާނުން އަބަދުވެސް ޗައިނާއާ ދޭތެރޭ ގެންގުޅެނީ ރަނގަޅު ނިޔަތްކަމަށް ވިދާޅުވެފައެވެ. އެހެން ނަމަވެސް ޗައިނާގެ މިނިންމުމަކީ ސިޔާސީ ގޮތުން ޕްރެޝަރުކުރުމަށް ނިންމި ނިންމުމެއް ކަމަށް ޓައިވާނުން ވަނީ ބުނެފައެވެ.

އިތުރަށް ވާހަކަދައްކަވަމުން ސޫ ވަނީ ޓައިވާންގެ ރައީސް ސައި އިންގްވެން މީގެ ކުރިން ދައްކަވާފައިވާ ވާހަކަތައް ތަކުރާރުކުރައްވާ ސިޔާސީގޮތުން ޗައިނާއަަށް ވާނެ ފަދަ ޝަރުތުތަކެއް ކުރިއާލައި ނުހިމަނާ ދެގައުމަށްވެސް ފައިދާވާނެ ގޮތަށް ހަމަހަމަކާއެކު ހެޔޮ ނިޔަތުގައި ޗައިނާއާއެކު ކަންތައްތައް ކުރެވޭނެ ނަމަ އެގޮތަށް ގުޅިގެން މަސައްކަތްކުރަން ޓައިވާނުން ތައްޔާރަށްއޮތް ކަމަށް ވިދާޅުވެފައެވެ.

ސޫ ވަނީ ޗައިނާއިން ޓައިވާންގެ ސަރަހައްދުގައި އަސްކަރީ ތަމްރީންތަކާއި އެހެނިހެން ހަރަކާތްތައް ހިންގައި އެގައުމަށް ބިރުދައްކައި ސިޔާސީ ގޮތުންނާއި އެނޫންވެސް ގޮތްގޮތުން އެގައުމު ފިއްތާލުމަށް ކުރާ މަސައްކަތްތަކަކީ ބަލައިގަނެވޭނެ ކަންތައްތައް ނޫން ކަމަށްވެސް ވިދާޅުވެފައެވެ.

ޓައިވާނުން ޗައިނާއާ ގުޅުން ކަނޑައިލާން ބޭނުންނުވާކަމަށް ވިދާޅުވެ، ސޫ ވަނީ އެއްވެސް ސަބަބަކާ ނުލައި ޓައިވާނަށް ފިއްތުތައްކުރިމަތި ކުރުވަމުން ދަނީ ޗައިނާއިން ކަމަށް ވިދާޅުވެފައެވެ.

ޓައިވާންގެ ސަރުކާރުން ބުނާ ގޮތުގައި އެ ގައުމުގެ ކުރިމަގު ބައްޓަން ކުރުމުގެ ބާރު އޮތް ހަމައެކަނި ހައްގުވެރިންނަކީ އެ ގައުމުގެ އާބާދީގައި ހިމެނޭ 23 މިލިއަން މީހުންނެވެ. އަދި އެމީހުން ބޭނުންވަނީ ސުލްހަ ކަމަށާއި، ހަމަލާ ދީފި ނަމަ ގައުމު ދިފާއު ކުރާނެ ކަމަށްވެސް ޓައިވާންގެ ސަރުކާރުން ވަނީ ބުނެފައެވެ.

ޓައިވާންގެ ރައީސްކަމުގެ މަގާމަށް 2016 ވަނަ އަހަރު ސައި އައްޔަނުކުރެވުނު ފަހުން މިހާތަނަށް އޭނާއާއެކު މަޝްވަރާތައް ކުރުމަށް ޗައިނާއިން ދަނީ ދެކޮޅުހަދަމުންނެވެ. ޗައިނާއިން ބުނަމުން ދަނީ ސައި އަކީ މައި ޗައިނާއިން ޓައިވާން ވަކިކުރުމަށް މަސައްކަތްކުރަމުންދާ "ސެޕަރޭޓިސްޓް"އެއް ކަމަށެވެ.