މެންޗެސްޓަރ ޔުނައިޓެޑަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯއާ ދެކޮޅަށް ކޯޓަށް ހުށައަޅާފައިވާ ރޭޕުގެ މައްސަލަ ކޯޓުން ބޭރުކޮށްލައިފިއެވެ.
ރޮނާލްޑޯއާ ދެކޮޅަށް ރޭޕުގެ މައްސަލައެއް އެމެރިކާގެ ކޯޓަށް ހުށައަޅާފައިވަނީ އެ ގައުމަށް ނިސްބަތްވާ ކެތަރިން މަޔޯގާ ނަމަކަށް ކިޔާ މޮޑެލް ކުރާ އަންހެނެކެވެ. ރޮނާލްޑޯއާ ދެކޮޅަށް އޭނާ ކޯޓަށް މައްސަލަ ހުށައަޅާފައި އޮންނަތާ އެެތައް ދުވަހެއް ވެއްޖެއެވެ.
ކެތަރިން މައްސަލަ ހުށައަޅާފައިވަނީ 2009 ވަނަ އަހަރު ރޮނާލްޑޯ އޭނާ ރޭޕުކުރި ކަމަށް ބުނެއެވެ. ނަމަވެސް ރޮނާލްޑޯ ވަނީ ކެތަރިންގެ ތުހުމަތުތައް ދޮގުކޮށްފައެވެ. މި މައްސަލައިގައި ކެތަރިން ބުނީ ރޭޕުގެ ވާހަކަތައް ސިއްރުކުރަން ބުނެ ރޮނާލްޑޯގެ ގާނޫނީ ވަކީލުންގެ ފަރާތުން ވަނީ އޭނާ ލައްވައި ލިޔުމެއްގައި ސޮއިކުރުވާފައެވެ. އަދި އެ ސޮއިކުރުވީ އޭނާއަށް މަޖުބޫރުކޮށްގެން ކަމަށް ވެސް ކެތަރިން ވަނީ ބުނެފައެވެ.
މި މައްސަލާގައި ކެތަރިންގެ ފަރާތުން ގިނަ ހެކިތަކެއް ކޯޓަށް ހުށައަޅާފައިވެއެވެ. އަދި އޭނާގެ ގާނުނީ ވަކީލު ބުނީ އެތައް ދުވަހެއް ފަހުން މި މައްސަަލައިގެ ވާހަކަ ދައްކަން ކެތަރިންއަށް ހިތްވަރު ލިބުނީ ރޭޕާ ދެކޮޅަށް ހިންގާ "މީޓޫ" ކެމްޕެއިންގެ ސަބަބުންކަމަށެވެ. ނަމަވެސް މިކަމާ ގުޅިގެން ރޮނާލްޑޯގެ ގާނުނީ ވަކީލުން ބުނެފައިވަނީ މިއީ ކެތަރިން ރޮނާލްޑޯގެ އަތުން ކޮންމެސް ކަމެއް ހާސިލްކުރުމުގެ މަގުސަދުގައި ހުށައަޅައިގެން އުޅޭ މައްސަލައެއް ކަމަށެވެ.
ކޯޓުން މި މައްސަލަ ބޭރުކޮށްލާފައިވަނީ މިދިޔަ ހުކުރު ދުވަހުއެވެ. ކޯޓުން މައްސަލަ ބޭރުކޮށްލީ، ހެކީގެ ގޮތުގައި ކެތަރިންގެ ފަރާތުން ކޯޓަށް ހުށައަޅާފައިވާ މީހެއްގެ މައުލޫމާތަކީ ލިޔެކިޔުންތަކަކުން ވައްކަންކޮށްގެން ހުށައަޅާފައިވާ ހެކިކަމަށް ބުނެއެވެ. އަދި މިއީ އެފަދަ ކަމެއްގައި ކޯޓުން ކުރިއަށް ގެންދެވޭނެ މައްސަލައެއ ނޫން ކަމަށް ވެސް ކޯޓުން ވަނީ ބުނެފައެވެ.
