އެސޯސިއޭޝަން ކަޕް 2022: ޕޮލިސް އަދި ވެމްކޯއިން މުބާރާތް ފެށީ މޮޅަކުން

އެސޯސިއޭޝަން ކަޕްގެ ފިރިހެން ޑިވިޝަންގައި ޕޮލިސް ކުލަބް އަދި ކުލަބް ވެމްކޯ ކުޅުނު ފުރަތަމަ މެޗުން ދެ ޓީމު ވެސް މޮޅުވެއްޖެއެވެ.

ޒުވާނުންގެ މަރުކަޒުގެ އެތެރޭ ހޯލުގައި ހޮނިހިރު ދުވަހުގެ ރޭ ފުރަތަމަ މެޗުގައި ޕޮލިސް ނުކުތީ ގުޑީސް ސްޕޯޓްސް ކުލަބާ ދެކޮޅަށެވެ. ވާދަވެރި އަދި ފޯރި ގަދަ ކުޅުމަކަށްފަހު، މި މެޗު ޕޮލިހުން ކާމިޔާބުކުރީ ތިން ސެޓު ދެ ސެޓުންނެވެ. ފުރަތަމަ ސެޓު ފަށައިގެން ދެ ޓީމުގެ ފަރާތުން ވެސް ފެނުނީ ވަރަށް ހަމަހަމަ ކުޅުމެކެވެ. ޕޮލިހުން ވަނީ މި ސެޓުގައި 23-17 ން ލީޑު ނަގާފައެވެ. ނަމަވެސް ގުޑީސުން ވަނީ ކުޅުން ރަނގަޅުކޮށް، 22-23 އަށް ފަރަގު ކުޑަކޮށްފައެވެ. ޕޮލިހުގެ ލީޑު 24--22 އަށް ފުޅާކޮށްދިނީ ބިދޭސީ ކުޅުންތެރިޔާ އަކިންގެ ބާރު ހަމަލާއަކުންނެވެ. އޭގެ ފަހުން ގުޑީސްގެ އަލީ އާމިރު (ދިގު އައްޔަ)ގެ ހަމަލާއަކުން އެ ޓީމުް 23-24 އަށް ނަތީޖާ ކުޑަކުރިއިރު، ގުޑީސަށް ނަތީޖާ ހަމަހަމަ ވީ ޕޮލިހުގެ އަނޫ ޖޭމްސް ކުރި އެޓޭކް ބޭރަށް ދިޔުމުންނެވެ. ޕޮލިހުން ސެޓު ހޯދީ އަކިންގެ ދެ ބްލޮކާއެކު، 30-28 ންނެވެ.

ދެ ވަނަ ސެޓު ފަށައިގެން ގުޑީސުން ވަނީ ކުޅުން ރަނގަޅުކޮށް، ލީޑުގައި އޮވެ ކުޅެފައެެވެ. މި ސެޓުގެ މެދު ތެރެއިން ގުޑީސްގެ ސެޓަރު ހުސެއިން ވިޝާމަށް އަނިޔާވެ، ކޯޓު މަތީގައި ވަނީ ފަރުވާދީފައެވެ. ގުޑީސުން މި ސެޓު ކާމިޔާބުކުރީ 25-23 ންނެވެ. ގުޑީސުން ވަނީ ޖެހިގެން އައި ތިން ވަނަ ސެޓު ވެސް ހޯދާ، ސެޓުގެ ގޮތުން ލީޑު ނަގާފައެވެ. މި ސެޓުގައި އެ ޓީމުގެ ދިގު އައްޔަގެ ބާރު ހަމަލާތަކެއް ވެސް ވަނީ ފެނިފައެވެ. މި ސެޓު ގުޑީސުން ނިންމާލީ މުޅިން ލީޑުގައި އޮވެއެވެ. ގުޑީސުން ސެޓު ހޯދީ 25-20 ންނެވެ.

ޕޮލިހުން ވަނީ ޖެހިގެން އައި ހަތަރު ވަނަ ސެޓާއި ފަސް ވަނަ ސެޓު ވެސް ހޯދާފައެވެ. ހަތަރު ވަނަ ސެޓު ފަށައިގެން ގުޑީސުން ލީޑު ކުރަމުން ދިޔަ ނަމަވެސް، ޕޮލިހުން ވަނީ 8-8 ން ނަތީޖާ ހަމަހަމަކޮށްފައެވެ. މި ސެޓުގައި ޕޮލިސް ޓީމުގެ ޒުވާން ކުޅުންތެރިޔާ މާއިޝް އަހުމަދުގެ މޮޅު ކުޅުން ވެސް ވަނީ ފެނިފައެވެ. ހަމަހަމޮށް ގޮސް ޕޮލިހުން ވަނީ 13-10 އަށް ލީޑު ފުޅާކޮށްފައެވެ. ޕޮލިހުން ލީޑުގައި އޮވެ ކުޅެމުން ދަނިކޮށް، ގުޑީސުން ވަނީ 19-19 ން ނަތީޖާ ހަމަހަމަކޮށްފައެވެ. އޭގެ ފަހުން 20-20 ން ނަތީޖާ ހަމަހަމަވި ނަމަވެސް، ޕޮލިހުން ވަނީ 22-20 އަށްް ލީޑު ފުޅާކޮށްފައެވެ. އެއީ އެ ޓީމުގެ މާއިޝް އާއި އަނޫ ކުރި އެޓޭކަކުންނެވެ. އޭގެ ފަހުން ގުޑީސްގެ ވަރުން ޖީއެސްގެ އެޓޭކަކާއި، މޯހިތުގެ ބްލޮކަކުން އެ ޓީމު ވަނީ 22-22 ން ނަތީޖާ ހަމަހަމަކޮށްފައެވެ. އޭގެ ފަހުން 23-23 ން ސެޓުގެ ނަތީޖާ ހަމަހަމަ ވެސް ވިއެވެ. ގުޑީސްގެ ބްލޮކަރު މޯހިތުގެ ސަރވިސް ބޭރަށް ދިޔުމާއެކު، ޕޮލިހަށް ވަނީ 24-23 އިން ލީޑު ލިބިފައެވެ. ޕޮލިހުން މި ސެޓު 25-23 ން ހޯދީ ގުޑީސްގެ ރިޔާޒުއްދީން ކުރި އެޓޭކް ބޭރަށް ދިޔުމުންނެވެ.

ނަތީޖާ ނެރުމަށް ކުޅުނު ފަސް ވަނަ ސެޓުގައި ވެސް ޕޮލިސް ޓީމުގެ އެޓޭކަރުންގެ ބާރު ހަމަލާތަކެއް ވަނީ ފެނިފައެވެ. ޕޮލިހުގެ އަނޫގެ ބާރު ހަމަލާތަކުން އެ ޓީމު ވަނީ 6-2 ން މި ސެޓުގައި ލީޑު ނަގާފައެވެ. ގުޑީސުން ވަނީ އޭގެ ފަހުން 6-8 އަށް ނަތީޖާގެ ފަރަގު ކުޑަކޮށްފައެވެ. ލީގު ހިފަހައްޓާ ޕޮލިހުން މި ސެޓު 15-12 ން ނިންމާލީ ވެސް އަނޫގެ ބާރު ހަމަލާއަކުންނެވެ. މެޗުގެ މޮޅު ކުޅުންތެރިޔަކަށް ހޮވުނީ ޕޮލިހުގެ ސެޓަރު  މުތުސާމީއެވެ.

ދެ ވަނަ މެޗުގައި ކުލަބް ވެމްކޯ ނިކުތީ އޮފު އެފްސީއާ ދެކޮޅަށެވެ. މި މެޗު ވެމްކޯއިން ކާމިޔާބުކުރީ ތިން ސެޓު އެއް ސެޓުންނެވެ. މެޗުގެ ފުރަތަމަ ދެ ސެޓު ހޯދީ ވެމްކޯއިންނެވެ. އެ ޓީމުން ފުރަތަމަ ސެޓު ހޯދީ 25-15 ންނެވެ. އަދި ދެ ވަނަ ސެޓު ހޯދީ 25-17 ންނެވެ. ނަމަވެސް އޮފު އެފްސީން ވަނީ 25-21 ން ތިން ވަނަ ސެޓު ހޯދާފައެވެ. ހަތަރު ވަނަ ސެޓުގެ ކުޅުން ފެނުނީ ވާދަވެރިކޮށެވެ. މި ސެޓު ވެމްކޯއިން ހޯދީ 28-26 ންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ ވެމްކޯގެ ބިދޭސީ ބްލޮކަރު އަޝްވަލް ރާއީއެވެ.

މުބާރާތުގެ ކުޅުން މިރޭ ވެސް ކުރިއަށްދާނެއެވެ. މިރޭގެ ފުރަތަމަ މެޗުގައި ދިވެހި ސިފައިންގެ ކުލަބް ނުކުންނާނީ ސްޕޯޓްސް ކުލަބް ސިޓީއާ ދެކޮޅަށެވެ. އަދި ދެ ވަނަ މެޗުގައި ގުޑީސް ނުކުންނާނީ އޮފު އެފްސީއާ ދެކޮޅަށެވެ. މި ދެ ޓީމު ފުރަތަމަ މެޗުން ބަލިވެފައިވުމުން، މި މެޗަކީ ދެ ޓީމަށް ވެސް ވަރަށް މުހިންމު މެޗަކަށްވާނެއެވެ.