އެސޯސިއޭޝަން ކަޕް: ފިރިހެން ޑިވިޝަންގެ ކުޅުން މިރޭ ފަށަނީ

ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އެސޯސިއޭޝަން ކަޕް ފިރިހެން ޑިވިޝަންގެ ކުޅުން މިރޭ ފަށާނެއެވެ.

ބޮޑު ބަދަލެއް ފެނިގެންދާނެ މިފަހަރުގެ މުބާރާތުގައި ހަ ކުލަބަކުން ވާދަކުރެއެވެ. އެއީ ދިވެހި ސިފައިންގެ ކުލަބް، ޕޮލިސް ކުލަބް، ކުލަބް ވެމްކޯ، ސްޕޯޓްސް ކުލަބް ސިޓީ، ގުޑީސް ސްޕޯޓްސް ކުލަބް އަދި އޮފު އެފްސީއެވެ. މީގެ ތެރެއިން ވެމްކޯ އަދި އޮފު އެފްސީއަކީ ޕްރެލިމިނަރީ ބުރުގައި ވާދަކޮށް، އެސޯސިއޭޝަން ކަޕަށް ކޮލިފައިވި ދެ ކުލަބެވެ.

މިފަހަރުގެ މުބާރަތުގައި ކޮންމެ ޓީމެއްގައި ވެސް ބިދޭސީ ތިން ކުޅުންތެރިން ހިމެނެއެވެ. އެ ކުޅުންތެރިންނަކީ ވީއޭއެމުން އެކުލަވާލި 18 ކުޅުންތެރިންގެ ޕޫލަކުން ޓީމުތަކަށް ބެހި ކުޅުންތެރިންނެވެ. މި 18 ކުޅުންތެރިންނަކީ އަވަށްޓެރި އިންޑިއާގެ ޓޮޕް ޑިވިޝަނުން ހޮވާލެވުނު 18 ކުޅުންތެރިންނެވެ.

ޒުވާނުންގެ މަރުކަޒުގެ އެތެރޭ ކޯޓުގައި މިރޭ އޮންނަ ފުރަތަމަ މެޗުގައި ބައްދަލުކުރާނީ ޕޮލިސް ކުލަބާއި ގުޑީސް ސްޕޯޓްސް ކުލަބެވެ. މި ދެ ޓީމުގެ ތެރެއިން ޕޮލިހުގައި ހިމެނޭ ބިދޭސީ ކުޅުންތެރިންނަކީ ސެޓަރ މުތުސާމީ، ބްލޮކަރ އަކިން އަދި އެޓޭކަރ އަނޫ ޖޭމްސްއެވެ. އަދި މި ޓީމުގައި ފާހަގަކޮށްލެވޭ ދިވެހި ކުޅުންތެރިންނަކީ ޝުއައިބް އަބްދުއްލަތީފް، މުޙައްމަދު ހަމްދޫން އަދި އުންމީދީ ޒުވާން ކުޅުންތެރިޔާ އަހުމަދު ނާފިއުއެވެ. ގުޑީސް ސްޕޯޓްސް ކުލަބުގައި ހިމެނޭ ބިދޭސީ ކުޅުންތެރިންނަކީ އެޓޭކަރ ވަރުން ޖީއެސް އަދި ރިޔާޒުއްދީންގެ އިތުރުން ބަލްކަރ މޯހިތު ޝަރާވަތެވެ. މީގެ އިތުރުން ޤައުމީ ޓީމުގެ ސެޓަރ ހުސެއިން ވިޝާމް، ގައުމީ ޓީމުގެ އެޓޭކަރ ހަސަން ނިލާމް އަދި ޤައުމީ ޓީމަށް ގިނަ މެޗުތަކެއް ކުޅެދިން އަލީ އާމިރު އަކީ މި ޓީމުގައި ފާހަގަކޮށްލެވޭ ދިވެހި ކުޅުންތެރިންނެވެ. ޕޮލިސް އަދި ގުޑީސް ބައްދަލުކުރާ މެޗު ފަށާނީ މިރޭ 20:15ގައެވެ.

މިރޭގެ ދެ ވަނަ މެޗުގައި 21:45 ގައި ބައްދަލުކުރާނީ އޮފު އެފްސީ އަދި ކުލަބް ވެމްކޯއެވެ. އޮފު އެފްސީގައި ހިމެނޭ ބިދޭސީ ކުޅުންތެރިންނަކީ ބްލޮކަރ ޖޯން ޖޯސެފް، ގުރޫ ޕްރަޝާންތު އަދި އެޓޭކަރ އަމިތު ގޫލިއާއެވެ. މި ޓީމުގައި ހިމެނޭ އަހުމަދު ސިމާއު، މުޙައްމަދު އަލީ (ޑެންޒޯ) އަދި އަހުމަދު މުހައްމަދު (ކޯކޭ) އަކީ ފާހަގަކޮށްލެވޭ ދިވެހި ކުޅުންތެރިންނެވެ. ވެމްކޯ ޓީމުގައި ހިމެނޭ ބިދޭސީ ކުޅުންތެރިންނަކީ އެޓޭކަރ އަމިތު ސިންގ، ސެޓަރ ރަންޖީތު ސިންގް އަދި ބްލޮކަރ އަޝްވަލް ރާއީއެވެ. މި ޓީމުގައި ހިމެނޭ ދިވެހި ކުޅުންތެރިންނަށް ބަލާއިރު، ޤައުމީ ޓީމުގެ މިހާރުގެ ކެޕްޓަން އިސްމާއިލް ސާޖިދު (ކުޑަ ކާއްޓޭ)، އާދަމް ފައިރޫޒް އަދި އަޝްފާގު އާދަމް (އައްކަޅޭ) ހިމެނެއެވެ.

މުބާރާތް ކުރިއަށް ދާނީ ކޮންމެ ޓީމެއް ކޮންމެ ޓީމަކާ ވާދަކޮށް، ތާވަލްގެ އެއް ވަނަ ލިބޭ ޓީމު ސީދާ ފައިނަލަށް ދާ ގޮތަށެެވެ. އަދި ތާވަލްގެ ދެ ވަނަ ޓީމާއި ތިން ވަނަ ޓީމާ ދެމެދު ސެމީ ފައިނަލެއް ކުޅެވޭނެއެވެ. ފައިނަލްގެ ދެ ވަނަ ޖާގަ ލިބޭނީ މި ސެމީން މޮޅުވާ ޓީމަކަށެވެ.