މި ނަތީޖާއަކީ ހެދުނު މިސްޓޭކްތައް ރަނގަޅުކުރުމުން ލިބުނު ނަތީޖާއެއް: ނާޒިމާ

އެސޯސިއޭޝަން ކަޕްގެ އަންހެން ޑިވިޝަންގެ ފައިނަލްގައި ސީދާ ތިން ސެޓުން ޕޮލިސް ކުލަބް ބަލިކޮށް، ޗެމްޕިއަންކަން ހޯދުނީ ކުރިން މެޗުގައި ހެދުނު މިސްޓޭކް ތައް ރަނގަޅު ކުރުމުން ކަމަށް ކުލަބް ވެމްކޯގެ ކޯޗު އައިޝަތު ނާޒިމާ ބުނެފިއެވެ.

ފައިނަލްގެ ކުރިން މި ދެ ޓީމު ވަނީ މުބާރާތުގެ ފުރަތަމަ ސެމީގައި ވާދަކޮށްފައެވެ. އެ މެޗު ވެމްކޯއިން ކާމިޔާބުކުރީ ތިން ސެޓު ދެ ސެޓުންނެވެ. އެ މެޗުގައި ވެމްކޯ ދެ ސެޓު ގެނެސްފައިވަނިކޮށް، ޕޮލިހުން ވަނީ ފަހަތުން އަރާ ދެ ސެޓު ހޯދާފައެވެ. ފައިނަލްގެ ކުރިން ނާޒިމާ ބުނީ އެ މެޗުގައި އެ ގޮތަށް ކަންތައް ދިމާވީ ކުދި ކުދި މިސްޓޭކް ތަކެއް ހެދުމުންކަމަށެވެ.

ފައިނަލަށްފަހު ނާޒިމާ ބުނީ މި ކާމިޔާބަކީ ކުޅުންތެރިން ކުރި ހިތްވަރާއި، ކުރީ މެޗުގައި ހެދުނު ގޯސްތައް ރަނގަޅު ކުރުމުން ލިބުނު ކާމިޔާބެއްކަމަށެވެ. ނާޒިމާ ބުނީ މެެޗުގެ ފެށުމާ އެއްގޮތަށް ނިންމުން ވެސް ދިޔައީ ވަރަށް ރަނގަޅަށް ކަމަށެވެ. މީގެ އިތުރުން ނާޒިމާ ބުނީ ކަންކަމުގައި ގިވްއަޕް ނުކޮށް ކުރިއަށްދާ ނަމަ ކާމިޔާބުވާނެކަމަށެވެ. ނާޒިމާ ވަނީ މުބާރާތުގެ އެންމެ މޮޅު ކޯޗުކަމުގެ މަގާމު ވެސް ހޯދާފައެވެ.

މީގެ އިތުރުން ނާޒިމާ ބުނީ ސަޕޯޓަރުން ތިބެފައި، ވެމްކޯގައި ކުޅުންތެރިން ތިބުމަކީ ޓީމަށް ލިބޭނެ އެންމެ ބޮޑު ސަޕޯޓުކަމަށެވެ. އަދި ބޭރުން އިތުރު ގިނަ ކުޅުންތެރިން ނުލާ ނިކުތުމުން ޓީމުގެ ބޮންޑުވެސް ވަރުގަދަ ވާނެކަމަށް ނާޒިމާ ބުންޏެވެ. އަދި ކޯޓު މަތިން ފެނިގެން ދިޔައީ އެކަން ކަމަށް ވެސް ނާޒިމާ ފާހަގަކުރިއެވެ. އަދި ނާޒިމާ ބުނީ އަޒުމަކީ ވޮލީ ސީޒަންގައި ބާކީ ހުރި ތަށިތައް ވެސް ކާމިޔާބުކުރުންކަމަށެވެ.