ވައްކަން ކޮށްގެން މީހުން ގެންދަނީ އަޅުގަނޑުމެންގެ ޕާޓީން: ރައީސް ޔާމީން
10 ޖޫން 2022 | ހުކުރު 11:09އެގޮތަށް މިފަހަރު ކަންތައްތައް ވިޔަ ނުދިނުމަށް މަސައްކަތް ކުރަން ޖެހޭ
ޕީޕީއެމްއިން ބޭއްވި ޖަލްސާގައި ކުރީގެ ރައީސް އަބްދުﷲ ޔާމީން
އާންމުންނަށް ނޭނގި ސައްހަ ނޫން ފޯމް ހުށަހަޅައިގެން އެންމެ ގިނަ މީހުން ޕާޓީ އަށް ވައްދާފައި ވަނީ ޕީޕީއެމަށް ކަމަށް އިލެކްޝަންސް ކޮމިޝަން (އީސީ) ގެ ތަފާސް ހިސާބުތަކުން ދައްކާފައިވާއިރު ވައްކަން ކޮށްގެން މީހުން ގެންދަނީ އެ ޕާޓީން ކަމަށް ކުރީގެ ރައީސުލްޖުމްހޫރިއްޔާ އަބްދުﷲ ޔާމީން ވިދާޅުވެއްޖެއެވެ.
ބުރާސްފަތި ދުވަހުގެރޭ ޕީޕީއެމްއިން ބޭއްވި ޖަލްސާގައި ވާހަކަފުޅުދައްކަވަމުން ރައީސް ޔާމީން ވިދާޅުވީ އެގޮތަށް މިފަހަރު ކަންތައްތައް ވިޔަ ނުދިނުމަށް މަސައްކަތް ކުރަން ޖެހޭ ކަމަށެވެ. ނޭނގި ސިޔާސީ ޕާޓީތަކަށް ވައްދާފައި އޮތުމާ ގުޅިގެން 2018 ވަނަ އަހަރުން ފެށިގެން މިއަދާ ހަމަޔަށް އީސީ އަށް ލިބިފައިވާ ޝަކުވާތަކުގެ ތަފާސް ހިސާބު އީސީން ވަނީ އާންމުކޮށްފައެވެ.
އެ ހިސާބުތަކުން ދައްކާ ގޮތުގައި ޕީޕީއެމްގައި ނޭނގި ރަޖިސްޓްރީ ވެފަ އޮވެގެން 391 މީހުން ވަނީ އީސީ އަށް ޝަކުވާ ހުށައަޅާފައެވެ. އަދި އެމްޑީޕީގައި ނޭނގި ރަޖިސްޓްރީ ވެފަ އޮވެގެން 213 މީހުން ޝަކުވާ ހުށަހަޅާފައިވާ އިރު މޯލްޑިވްސް ލޭބަރ އެންޑް ސޯޝަލް ޑިމޮކްރަޓިކް ޕާޓީގައި ނަން އޮވެގެން 145 މީހުން ވަނީ ޝަކުވާކޮށްފައެވެ. ސައްހަ ނޫން ފޯމް ހުށަހަޅައިގެން އީސީ އަށް ޖުމުލަ 1،208 ޝަކުވާއެއް ވަނީ ހުށައަޅާފަ އެވެ. އެންމެ ގިނަ ޝަކުވާ ހުށައަޅާފަ ވަނީ 2019 ވަނަ އަހަރާއި މި އަހަރު ކަމަށް އެ ހިސާބުތަކުން ދައްކައެވެ.
ޕާޓީތަކަށް މީހުން ނޭނގި ވަައްދާ މައްސަލަ ހައްލު ކުރުމަށް އިލެކްޝަންސް ކޮމިޝަން (އީސީ) އިން ނިންމާފައި ވަނީ ޕާޓީތަކާ އަލަށް ގުޅޭ މެމްބަރުންގެ ނަންތައް އެ ކޮމިޝަންގެ ވެބްސައިޓުގައި އާންމު ކުރުމަށެވެ. އަދި އިތުރަށް ކަށަވަރު ކުރުމަށް މިދިޔަ އޭޕްރިލް މަހުން ފެށިގެން ޕާޓީއާ ގުޅުނު ކަމުގެ މެސެޖު އެ މީހެއްގެ ފޯނަށް ފޮނުވަން ވެސް ވަނީ ފަށާފައެވެ.
މިހާރުގެ ސަރުކާރުން ތިބީ އިންޑިއާއަށް އަޅުވެތިވެފައިވާކަމަށް ދޭހަވާ މޭރުމަކުން ރައީސް ޔާމީން ވަނީ ވާހަކަ ދައްކަވާފައެވެ. އަދި މި ސަރުކާރަށް އެމަނިކުފާނު ވަނީ ވަރަށް ބޮޑަށް ފާޑު ވިދާޅުވެފައެވެ. ރައީސް ޔާމީން ވިދާޅުވީ ދުނިޔޭގެ އިގްތިސާދަށް އަންނަމުންދާ ބަދަލުތައް ކިތަންމެ ކައިރިން ދިރާސާކުރިޔަސް، ރާއްޖޭގެ އިގްތިސާދު މިއަދު އޮތީ ނާޒުކު ހިސާބެއްގައި ކަމަށެވެ. މުޅި ދުނިޔެއަށް އަންނަ ކަންކަން ރާއްޖެއަށް ނައިސް ނުދާނެ ކަމަށާއި، ރާއްޖެއަށް ކުރާ އަސަރުވެސް ބޮޑުވާނެކަމަށް ޔާމީން ވިދާޅުވިއެވެ.
ރާއްޖޭގެ އިގްތިސާދަށް އަންނާނެ ކަމަށް ލަފާކުރެވޭ ބަދަލުތަކާ ގުޅޭގޮތުން ފަންނުވެރިން ދައްކާ ވާހަކަތައް ސަރުކާރުން ދޮގުކުރި ނަމަވެސް އެކަންކަން ދިވެހިން ގަބޫލެއް ނުކުރާނެ ކަމަށް ޔާމީން ވިދާޅުވިއެވެ. އަދި ލަންކާއަށް ދިމާވެފައިވާ ހާލަތު ރާއްޖެއަށް ދިމާވެދާނެ ކަމަށް ފަންނުވެރިން ވިދާޅުވާ ވިދާޅުވުން ދޮގުކުރެއްވުން އެއީ ކަމުދާ ކަމެއް ނޫން ކަމަށް ވެސް ވިދާޅުވިއެވެ.
ކުރިއަށް އޮތް ތަނުގައި ރާއްޖޭގެ އިގްތިސާދު ދަށްވެ، ބަނގުރޫޓުވެދާނެ ކަމަށް ގިނަ ބަޔަކު ބުނަމުންދާ ބުނުމަށް ރައްދުދެއްވައި ފިނޭންސް މިނިސްޓަރ އިބްރާހިމް އަމީރު ވަނީ އަހަރު ނިމޭއިރު ރިޒާވް ހުންނާނީ ރަނގަޅު މިންވަރެއްގައި ކަމަށާއި، ދައްކަންޖެހޭ ދަރަނިތައްވެސް ދެއްކޭނެ ކަމަށް ވިދާޅުވެފައެވެ. އަމީރު ވިދާޅުވެފަވަނީ ކުރިއާ އަޅާ ބަލާއިރު ރާއްޖޭގެ ގްރޮސް އަދި ނެޓް ރިޒާވް ވެސް ހުރީ މަތީގައި ކަމަށެވެ. އެގޮތަށް ދެމެހެއްޓުމަށް ބޭރު ފައިސާގެ އިން-ފްލޯ އަދި އައުޓް-ފްލޯ ގާތުން ބަލަމުން ގެންދަވާ ކަމަށާއި ދިމާވާ ގޮންޖެހުންތަކަށް ފިޔަވަޅު އަޅުމުން ގެންދާ ކަމަށް ވެސް އޭނާ ވިދާޅުވިއެވެ.
ރާއްޖޭގެ ރިޒާވް ހުސްވެ ޑިފޯލްޓް ވެދާނެ ކަމަށް ބައެއް ފަރާތްތަކުން ބުނަމުންދިޔަ ނަމަވެސް އެއީ ހަގީގަތާ ޚިލާފު ވާހަކަތަކެއް ކަމަށް އަމީރު ވިދާޅުވިއެވެ. އަމީރު ވިދާޅުވީ ރައްޔިތުންނާއި ބޭރުގެ އިންވެސްޓަރުންނަށް ހަގީގަތް އޮޅޭގޮތަށް މިފަދަ ވާހަކަތައް ދެއްކުމުން ދުނިޔެ މިއޮތް ނާޒުކު ދަނޑިވަޅުގައި މުޅި ރާއްޖެއަށް ލިބެން ނުޖެހޭ ގެއްލުމެއް ލިބިދާނެ ކަމަށެވެ.
