ވަކި ބޭފުޅަކު ވެރިކަމުގައި ހުންނެވީތީ ހިލޭ ކޮށްދޭނެ ކަމަށް ގަބޫލު ނުކުރެވޭ
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ނޫސްވެރިންގެ ސުވާލުތަކަށް ޖަވާބު ދެއްވަނީ
ހިލޭ ކުރެވެން އޮތްއިރު ފުރަތަމަ އެޅި ބްރިޖަށް ފައިސާ ޚަރަދު ކުރެއްވީ ކީއްވެގެންތޯ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ސުވާލު އުފައްދަވައިފިއެވެ.
ރައީސް މިގޮތަށް ސުވާލު އުފެއްދެވީ، ބުދަ ދުވަހު އޮތް ނޫސްވެރިންގެ ބައްދަލުވުމުގައި، ޗައިނާއިން ތިލަމާލެ ބްރި ހިލޭ އަޅައިދޭނެ ކަމަށް އިދިކޮޅު ލީޑަރު އަދި ކުރީގެ ރައީސް ޔާމީން އަބްދުލް ގައްޔޫމް ވިދާޅުވާ ކަމަށް ބުނެ ނޫސްވެރިއަކު ދެންނެވި ސުވާލަށް ޖަވާބު ދެއްވަމުންނެވެ. ރައީސް ވިދާޅުވީ، އެކަން އެގޮތަށް އޮތްނަމަ ޗައިނާއިން ފުރަތަމަ އެޅި ބްރިޖު ހިލޭ ނޭޅި ސަބަބަކީ ކޮބައިތޯ ކަމަށެވެ.
ރައީސް ވިދާޅުވީ، އެމަނިކުފާނު ގަބޫލު ކުރައްވާ ގޮތުގައި، ރާއްޖެއާ ގުޅުން ހުރި އެއްވެސް ގައުމަކުން ވެރިކަމުގައި ހުންނަ ވަކި މީހަކަށް ކަމެއް ނުކޮށްދޭނެ ކަމަށެވެ. އެގޮތަށް އެކަން ކުރަންޏާ އެއީ ގޯހެއް ކަމަށް ރައީސް ވިދާޅުވިއެވެ. ގައުމުތަކުން އެހީ ވާން ވާނީ ދިވެހި ރައްޔިތުންނާއި، ގައުމަށް ކަމަށް ރައީސް ވިދާޅުވިއެވެ.
