ވީއޭއެމް އެސޯސިއޭޝަން ކަޕްގެ ފައިނަލްގައި ސީދާ ތިން ސެޓުން ޕޮލިސް ކްލަބް ބަލިކޮށް ކްލަބް ވެމްކޯ މުބާރާތުގެ ތަށި އުފުލާލައިފިއެވެ.

ޒުވާނުންގެ މަރުކަޒު އެތެެރެ ކޯޓުގައި ބުރާސްފަތި ދުވަހުގެ ރޭ ކުޅުނު މި މެޗުގެ ސެޓުތައް ވެމްކޯއިން ގެންދިޔައީ 25-20، 25-16 އަދި 25-12 އިންނެވެ. ކޮވިޑަށްފަހު މުބާރާތް އަލުން ފަށާފައިވާއިރު މި މުބާރާތް އެންމެ ފަހުން ބޭއްވީ 2019 ވަނަ އަހަރުއެވެ. އެފަހަރުގެ މުބާރާތުގައި ވެސް ފައިނަލުގައި ޕޮލިސް ކްލަބާ ވާދަކޮށް ކާމިޔާބުކުރީ ވެމްކޯއިންނެވެ.

މިފަހަރުގެ މުބާރާތުގައިވެސް މި ދެޓީމު ބައްދަލުކުރިއެވެ. ސެމީ ފައިނަލުގެ ފުރަތަމަ މެޗުގައި މި ދެޓީމު ބައްދަލުކުރި މެޗު ވެމްކޯއިން ކާމިޔާބު ކުރީ 3-2 ސެޓުންނެވެ. ޕޮލިސް ކްލަބުން މުބާރާތުގެ ފައިނަލަށް ދަތުރުކުރީ ތިންވަނަ ސެމީއިން މޮޅުވެގެންނެވެ.

ގިނަ ސަޕޯޓަރުންތަކެއްގެ ކުރިމަތީގައި ކުޅުނު މި މެޗު ޝަރަފުވެރިކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހްމަދުއެވެ.

ވެމްކޯއިން މުބާރާތް ކާމިޔާބުކުރިއިރު، މުބާރާތުގެ ޑްރީމް ޓީމުގައި އެޓީމުގެ ހަތަރު ކުޅުންތެރިން ހިމެނުނެވެ. ޑްރީމް ޓީމުގައި ހިމެނުނީ ވެމްކޯގެ އާމިނަތު އަރީޝާ، ހައްވާ ނާޒިމާ، ފާތިމަތު ޖޫޒާންގެ އިތުރުން ޓީމުގެ ލިބަރޯ ސިލްމާ ޒަރީރުއެވެ. ޑްރީމް ޓީމުގައި ދެން ހިމެނުނީ ޕޮލިސް ކްލަބުގެ ހައްވާ ރާޝިދާ އަދި އާމިނަތު ޝަހާ ޝާމިންގެ އިތުރުން މަރިޔަމް އަޒުމާއެވެ.

މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ ވެމްކޯގެ އާއިޝަތު މާޖިދާއެވެ. އެންމެ އުންމީދީ ކުޅުންތެރިއަކީ ވޮލީބޯލް ޔޫތު ނިއު ޖެނެރޭޝަންގެ ނަރީމާ އިދްރީސްއެވެ. އަދި މުބާރާތުގެ އެންމެ މޮޅު ބޭރު ކުޅުންތެރިއަކަށް ހޮވުނީ ވެމްކޯގެ ސިދީސާތުއެވެ. އެންމެ މޮޅު ކޯޗުގެ މަގާމު ލިބުނީ ޗެމްޕިއަން ވެމްކޯގެ އާއިޝަތު ނާޒިމާއަށެވެ.