މަންކީޕޮކްސްގެ 1000ށް ވުރެ ގިނަ ކޭސް ރިޕޯޓްކޮށްފި

އެފްރިކާ ސަރަހައްދުން ބޭރުން އެހެން ގައުމުތަކުން މަންކީޕޮކްސްގެ ކޭސްތައް ރިޕޯޓްކުރަން ފެށިފަހުން މިހާތަނަށް 1000ށް ވުރެ ގިނަ ކޭސް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)އަށް ރިޕޯޓްކޮށްފިއެވެ.

ޑަބްލިޔުއެޗްއޯގެ ޑިރެކްޓަރ ޖެނެރަލް ޓެޑްރޯސް އަދަނޮމް ވިދާޅުވީ މަންކީޕޮކްސް އާންމުކޮށް ނުފެންނަ ގައުމުތަކުން ފެނުމުގެ ފުރުސަތު އިތުރުވަމުން އަންނަކަމަށާއި ނަމަވެސް އަދި މިބަލި އޮތީ ކޮންޓްރޯލްކުރެވިފައި ކަމަށެވެ.

މެއި މަހުގެ ކުރީކޮޅު މިބަލި ރިޕޯޓްކުރަން ފެށިފަހުން މިހާތަނަށް 29 ގައުމަކުން ވަނީ މިބަލި ރިޕޯޓްކޮށްފައެވެ. އެއްވެސް ގައުމަކުން މިބަލީގައި މިހާތަނަށް މީހަކު މަރުވެގެން ރިޕޯޓްކޮށްފައިނުވެއެވެ.

ނޫސްވެރިންނަށް މައުލޫމާތު ދެއްވަމުން ޓެޑްރޯސް އިތުރަށް ވިދާޅުވީ މިއަހަރުގެ މިހާތަނަށް އެފްރިކާގެ ގައުމުތަކުން މަންކީޕޮކްސްއަށް ޝައްކުކުރެވޭ 1400 ކޭސް ފެނިފައިވާކަމަށާއި 66 މީހުން މިބަލީގައި މަރުވެފައިވާކަމަށެވެ.

ނަމަވެސް މަންކީޕޮކްސްއަށް މިހާރު ބޮޑު ސަމާލުކަމެއް ލިބިފައިވަނީ މުއްސަނދި ގައުމުތަކުން މިބަލި ފެންނަން ފެށުމުންކަމަށާއި އެކަމާއި ކަންބޮޑުވެވަޑައިގަންނަވާކަމަށް ޓެޑްރޯސް ވިދާޅުވިއެވެ.

ޓެޑްރޯސް އިތުރަށް ވިދާޅުވީ ބައެއް ގައުމުތަކުގައި ކޭސްތައް ފެންނަ ގޮތުން މިބަލި މިހާރު ކޮމިޔުނިޓީ ޓްރާންސްމިޝަނަކަށް ބަދަލުވެފައިވާކަމަށެވެ. އެހެންކަމުން މަންކީޕޮކްސް ޖެހިފައިވާ މީހުން ގޭގައި އެކަހެރިވުމަށް ޑަބްލިޔުއެޗްއޯއިން ލަފާދޭކަމަށް ވިދާޅުވިއެވެ.

ޑަބްލިޔުއެޗްއޯގެ ޓެކްނިކަލް ޓީމުން ބުނާގޮތުގައި މިބަލި މައިގަނޑު ގޮތެއްގައި އަރަނީ ބަލިޖެހިފައިވާ މީހަކާއި ކޮންޓެކްޓް ވެގެންނެވެ. މީގެއިތުރުން މިބައްޔަށް ފަރުވާދިނުމުގައި ހަރަކާތްތެރިވާ ސިއްހީ މަސައްކަތްތެރިން މާސްކު އަޅަންޖެހޭނެކަމަށް ޓެކްނިކަލް ޓީމުން ބުނެއެވެ.

ޑަބްލިޔުއެޗްއޯއިން ބުނާގޮތުގައި މިހާތަނަށް ފެނިފައިވާ ކޭސްތަކަށް ބަލާއިރު ގިނައިން މިބަލި ފެނިފައިވަނީ ފިރިހެނުންގެ މެދުގައެވެ. އޭގެތެރެއިންވެސް އެއް ޖިއްސުން ގުޅުން ހިންގާ ފިރިހެނުންގެ މެދުގައެވެ. ނަމަވެސް އަންހެނުންގެ ތެރެއިންވެސް މިބަލި ފެނިފައިވާކަމަށް ޑަބްލިޔުއެޗްއޯއިން ބުނެއެވެ.

އދ އިން އަންނަނީ އެކި ޖަމިއްޔާތަކާއި ގުޅިގެން މިބަލި ފެތުރުން ކޮންޓްރޯލްކުރުމަށް ހޭލުންތެރިކަން އިތުރުކުރުމުގެ ޕްރޮގްރާމްތައް ހިންގަމުންނެވެ.