ކާބޯތަކެތީގެ ރައްކާތެރި ކަމަށް ސަރުކާރުން އަބަދުވެސް މަސައްކަތް ކުރައްވާ ކަމަށް ރައީސް ވިދާޅުވެއްޖެ

ކޮންމެ ދުވަހަކު ކައި އުޅޭ ކާނާއަކީ ރައްކާތެރި ތަކެއްޗަށް ހެދުމަށް ސަރުކާރުން މަސައްކަތް ކުރާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މިފަދައިން ވިދާޅުވީ، ހޮނިހިރު ދުވަހު ފާހަގަކުރާ "ވޯލްޑް ފުޑް ސޭފްޓީ ޑޭ" ނުވަތަ ދުނިޔޭގެ ކާބޯތަކެތީގެ ރައްކާތެރިކަމުގެ ދުވަހާގުޅިގެން ސޯޝަލް މީޑިއާގައި ހިއްސާކުރެއްވި ޕޯސްޓެއްގައެވެ.

ކޮންމެ އަހަރެއްގެ ވެސް ޖޫން މަހުގެ 7 ވަނަ ދުވަހަކީ ދުނިޔޭގެ ކާބޯތަކެތީގެ ރައްކާތެރިކަމުގެ ދުވަހުގެ ގޮތުގައި ފާހަގަކުރާ ދުވަހެވެ. ކޮންމެ އަހަރެްގެ ވެސް ޖޫން މަހުގެ ހަތް ވަނަ ދުވަހަކީ ދުނިޔޭގެ ކާބޯތަކެތީގެ ރައްކާތެރިކަމުގެ ދުވަހުގެ ގޮތުގައި ފާހަގަކުރުމަށް އދ. އިން ކަނޑައަޅާފައިވަނީ 2018 ވަނަ އަހަރުގެ ޑިސެމްބަރުމަހު އދ.ގެ އާންމު މަޖިލީހުން ފާސްކުރި ޤަރާރަކުންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ކާބޯތަކެތީގެ ރައްކާތެރިކަމަކީ އަޅުގަނޑުމެންގެ ތެރެއިން ކޮންމެ މީހަކަށްވެސް އަސަރުކުރާ ކޮންމެ ދުވަހެއްގެވެސް ދިރިއުޅުމާ ގުޅިފައިވާ މައްސަލައެއްކަން ޤަބޫލުކުރަންޖެހޭކަމަށެވެ. އަދި މިއީ އާންމު ޞިއްޙަތާއި، އިޤްތިޞާދީ ހަމަޖެހުމާވެސް ގުޅިފައިވާ ކަމެއްކަން އެމަނިކުފާނު ފާހަގަކުރެއްވިއެވެ.

މިއަހަރުގެ ދުނިޔޭގެ ކާބޯތަކެތީގެ ރައްކާތެރިކަމުގެ ދުވަހަށް ދުނިޔޭގެ ޞިއްޙަތު ޖަމްޢިއްޔާ، ޑަބްލިޔުއެޗްއޯއިން ކަނޑައަޅާފައިވާ ޝިޢާރަކީ "ފުޑް ސޭފްޓީ: ސައިންސް އިން އެކްޝަން" މިއެވެ. އެގޮތުން މި ޝިއާރަށް އިޝާރާތްކުރައްވާ ރައީސް ޑރ. މުޢިއްޒު ވަނީ މި ޝިޢާރުގެ ދަށުން ކާބޯތަކެތީގެ ޒަރިއްޔާއިން ޖެހޭ ބަލިތައް ދެނެގަނެ، އެކަންކަމުން ރައްކާތެރިވުމަށް ސައިންޓިފިކް ދިސާރާތަކާއި، އެވިޑެންސް ބޭސްޓް މެތަޑްތަކުގެ މުހިންމުކަން ފާހަގަކުރައްވާފައެވެ.

ރައީސް ވިދާޅުވީ އާންމުކޮށް ކައި އުޅޭ ކާނާއަކީ ރައްކާތެރި އަދި ހަށިގަނޑަށް ފައިދާހުރި ކާނާއަކަށް ހެދުމަށް ސަރުކާރުން އަބަދުވެސް މަސައްކަތްކުރާ ކަމަށެވެ.

މާލޭގައި ބިދޭސީން ސާފުތާހިރުކަން ކުޑަ ތަންތަނުގައި ކާބޯތަކެތި ތައްޔާރުކުރާ މައްސަލަތަކެއް ފެންމަތިވެފައިވެ މިދިޔަ އަހަރު ވަނީ ކާބޯތަކެއްޗާ ބެހޭ ގަވާއިދެއް އެކުލަވާލައިފަ އެވެ. އޭގެ ދަށުން ރާއްޖެއަށް އެތެރެ ކުރާ ކާބޯތަކެތި ޓެސްޓު ކުރުމާއި ގޭގައި ހަދައިގެން ވިއްކާ ތަކެތީގެ ރައްކާތެރިކަން ވެސް ބަލަން ޖެހެ އެވެ.

އޭގެ ދަށުން އެ ރަޖިސްޓްރީ ނުކޮށް ކާބޯތަކެތީގެ ހިދުމަތް ދޭނަމަ އެކަމެއްގެ ކުޑަބޮޑުމިނަށް ބަލައިގެން 10،000ރ. އާއި 500،000ރ. އާ ދެމެދުގެ އަދަދަކުން ޖޫރިމަނާ ވެސް ކުރެވެ އެވެ.

ދުނިޔޭގެ ޞިއްޙަތު ޖަމްޢިއްޔާ، ޑަބްލިޔުއެޗްއޯގެ ތަފާސްހިސާބުތައް ދައްކާގޮތުން ނުރައްކާތެރި ކާނާގެ ސަބަބުން ދުވާލެއްގެ މައްޗަށް އެވްރެޖްކޮށް 1.6 މިލިޔަން މީހުން ބަލިވެއެވެ.

އަދި ސާފުތާހިރުކަން ކުޑަކޮށް ތައްޔާރުކޮށްފައި ހުންނަ ކާނާގެ ބާވަތްތަކާއި ނުރައްކާތެރި ކާނާ ބޭނުންކުރުމުން 200 އަށްވުރެ ގިނަ ބާވަތުގެ ބަލިތައް ފެތުރުމުގެ ފުރުޞަތު އޮންނައިރު މީގެ ތެރޭގައި ބޭރަށް ހިންގުމުން ފެށިގެންގޮސް ކެންސަރުގެ އެކި ވައްތަރުތައްވެސް ހިމެނެއެވެ.