މަންކީ ޕޮކްސް ނުވަތަ އެމްޕޮކްސް އަކީ މިހާރު ބައިނަލްއަޤްވާމީ ސިއްހީ ކުއްލި ނުރައްކަލުގެ ހާލަތު އޮތް ބައްޔެއް ނޫން ކަމަށް ވޯލްޑް ހެލްތް އޯގަނައިޒޭޝަން (ޑަބްލިޔުއެޗްއޯ) ގެ އިސްވެރިޔާ ހުކުރު ދުވަހު ވިދާޅުވެއްޖެއެވެ.

ވައިރަސް އެއްގެ ޒަރީއާ އިން ގައިން ގަޔަށް އަރާ މި ބައްޔަކީ ގާތް ގުޅުމުން ފެތުރޭ، އާންމުކޮށް ރޯގާގެ އަލާމާތްތަކާއި ހަންގަނޑު ގައި ފޮޅު ނަގާ ދޮސްއެރުން ފަދަ އަލާމާތްތައް ފެންނަ ބައްޔެކެވެ.

"މި ނިންމުން ބިނާވެފައި ވަނީ ޑިމޮކްރެޓިކް ރިޕަބްލިކް އޮފް ކޮންގޯ އަދި ބުރުންޑީ، ސިއެރާ ލިއޯން އަދި ޔުގެންޑާ ފަދަ އެހެން ގައުމުތަކުގައި ވެސް ކޭސްތައް މަދުވަމުން އައުމުގެ މައްޗަށް" ކަމަށް ޑަބްލިޔުއެޗްއޯ ގެ ވެރިޔާ ޓެޑްރޮސް އަދަނޮމް ގެބްރެއިސަސް ވިދާޅުވިއެވެ.

ޑަބްލިއުއެޗްއޯގެ ޑިރެކްޓަރ ޖެނެރަލް އިތުރަށް ވިދާޅުވީ މި ނިންމުން ބިނާވެފައި ވަނީ ކޮންމެ ތިން މަހަކުން އެއްފަހަރު ބަލި ފެތުރުން ވަޒަން ކުރުމަށް ބައްދަލުވާ ޑަބްލިއުއެޗްއޯގެ އިމަޖެންސީ ކޮމިޓީގެ ލަފާގެ މައްޗަށް ކަމަށެވެ.

ޑަބްލިއުއެޗްއޯ އިން މި ބަލީގެ ފުރަތަމަ ކުއްލި ނުރައްކަލުގެ ހާލަތު އިޢުލާނު ކުރީ ވޭތުވެދިޔަ އަހަރުގެ އޯގަސްޓް މަހު، އެމްޕޮކްސްގެ އައު ބާވަތެއް ބޮޑަށް ފެތުރިފައިވާ ޑިމޮކްރެޓިކް ރިޕަބްލިކް އޮފް ކޮންގޯ އިން އަވައްޓެރި ގައުމުތަކަށް ފެތުރެން ފެށުމުންނެވެ.

ބައިނަލްއަޤްވާމީ ސިއްހީ ކުއްލި ނުރައްކަލުގެ ހާލަތަކީ ޑަބްލިއުއެޗްއޯ އިން ބައްޔެއްގެ ނުރައްކާތެރިކަމާ ބެހޭ ގޮތުން ދޭ އެންމެ މަތީ ދަރަޖައިގެ އިންޒާރެވެ.