ފައްޔާޒުގެ ވައުދާ އެއްގޮތަށް އިސްލާމް ދީނުގެ މަޝްވަރާ މަޖިލީހުގެ އިންތިޚާބު ބޭއްވުމަށް ހުޅުވާލައިފި
މަގާމަށް އެދި ހުށަހެޅުމަށް ހުޅުވާލާފައިވަނީ 16 ޖޫން ވާ ބުރާސްފަތި ދުވަހުގެ މެންދުރު 2:00 ގެ ކުރިން
އެމްޑީޕީގެ ޗެއާޕާސަން ފައްޔާޒު އިސްމާއިލް
އެމްޑީޕީގެ ޗެއާޕާސަން އިންތިޚާބުގައި ވާދަކުރައްވާ އެމަގާމު ކާމިޔާބުކުރެއްވި އިކޮނޮމިކް މިނިސްޓަރ ފައްޔާޒު އިސްމާއީލު ވައުދުވެވަޑައިގެންނެވި ގޮތަށް އެޕާޓީގެ އިސްލާމް ދީނުގެ މަޝްވަރާ މަޖިލިސް އެކުލަވާލުމަށް އެމަޖިލީހަށް ކުރިމަތިލުމަށް ހުޅުވާލައިފިއެވެ.
އެމްޑީޕީން ކޮށްފައިވާ އިއުލާނެއްގައި ބުނެފައިވަނީ އެޕާޓީގެ އިސްލާމް ދީނުގެ މަޝްވަރާ މަޖިލިހަށް ކުރިމަތިލާން ބޭނުންވާ އެޕާޓީގެ މެމްބަރުންގެ ތެރެއިން ޝަރުޠު ހަމަވާ މެމްބަރުން އެކަމަށް އެދި ފޯމު ހުށަހެޅުމަށެވެ. އަދި މި ހުށަހެޅުމަށް ހުޅުވާލާފައިވަނީ 16 ޖޫން ވާ ބުރާސްފަތި ދުވަހުގެ މެންދުރު 2:00 ގެ ކުރިންނެވެ.
އެމަގާމަށް އެދި ހުށަހެޅޭނީ އެމްޑީޕީގެ އަސާސީ ގަވާއިދުގެ 54 ވަނަ މާއްދާގައި ބުނާ ޝަރުޠުތައް ހަމަވާ ފަރާތްތަކަށް ކަމަށާއި އެ ޝަރުތުތަކަކީ
- އިސްލާމިކް ޔުނިވަރސިޓީއަކުން ތައުލިމީ ސެޓްފުކެޓެއް ލިބިފައިވުން ނުވަތަ އެފެންވަރަށް ކިޔަވާފައިވާކަމުގެ ލިޔުމެއް އިސްލާމިކް ޔުނިވަރސިޓީއަކުން ލިބިފައިވުން،
- އިސްލާމްދީން ކިޔަވައި ދިނުމުގެ ހުއްދަ ލިބިފައިވުން
- ދީނީ ތަޤުރީރުކުރުމުގެ ހުއްދަ ލިބިފައިވުން
- ހާފިޒުކަމުގެ ސަނަދުއޮތުން
- އިމާމް ކޯހުން ނުވަތަ ޤާޟީކޯހުން ފާސްވެފައިވުން
އެމްޑީޕީގެ އިސްލާމްދީނުގެ މަޝްވަރާ މަޖިލިސް އެންމެފަހުން އެކުލަވާލާފައިވަނީ 2011 ވަނަ އަހަރުއެވެ.
