ކުޅުންތެރިންނާމެދު 100 ޕަސެންޓު އިތުބާރު އެބައޮތް: ނާޒިމާ

އެސޯސިއޭޝަން ކަޕްގެ ފައިނަލް މެޗަށް ނުކުންނައިރު، ޓީމުގެ ހުރިހާ ކުޅުންތެރިންނަށް ފުރިހަމަ އިތުބާރު އެބައޮތްކަމަށް ކްލަބް ވެމްކޯގެ ކޯޗު އާއިޝަތު ނާޒިމާ ބުނެފިއެވެ.

ނާޒިމާ މިހެން ބުނީ ފައިނަލްގެ ކުރިން "ރާއްޖެ އެމްވީ"އަށް ދިން އިންޓަވިޔުއެއްގައެވެ. ނާޒިމާ ބުނީ ފައިނަލްގައި ނުކުންނަން ޖެހެނީ ވަރުގަދަ ޓީމަކާ ދެކޮޅަށްކަމަށެވެ. ޕޮލިސް ކުލަބުގައި ތަޖުރިބާކާރު ގިނަ ކުޅުންތެރިން ތިބިކަމަށާއި، އެ ޓީމުގެ ކޯޗަކީވެސް ވަރަށް ތަޖުރިބާ ހުރި މީހެއްކަމަށް ނާޒިމާ ބުންޏެވެ. އަދި ފައިނަލަށް ނުކުންނާނީ އެކަން އެނގިގެންކަމަށެވެ. އަދި ކުޅުންތެރިން ތިބީ ރަނގަޅު ފޯމެއްގައި ކަމަށާއި، ރަނގަޅު ފައިޓެއް ދީ މެޗު ކާމިޔާބުކުރެވޭނެކަމަށެވެ.

މީގެ އިތުރުން ނާޒިމާ ބުނީ މުބާރާތުގެ މިހާ ހިސާބަށް ޓީމު އައީ މެޗުތައް ފަސޭހަ ނުކޮށްކަމަށެވެ. އަދި މުބާރާތުގެ ގްރޫޕް ސެޓޭޖުގައި ޓަފް މެޗެއް ނުލިބި، ސެމީއަށް އައިސް ޓަފް މެޗެއް ކުޅެން ޖެހުނު ކަން ފާހަގަކުރިއެވެ. އެގޮތަށް ޓަފް މެޗެއް ކުޅެން ޖެހުމުން ކުޅުންތެރިން އެމީހުންގެ ނެތް ހިތްވަރެއް ނެރެގެން ކުޅުނުކަން ނާޒިމާ ފާހަގަކުރިއެވެ. ނާޒިމާ ފާހަގަކުރިގޮތުގައި ސެމީގެ ފަހު ސެޓު ރަނގަޅު ނަތީޖާއަކާއެކު ނިންމާލެވުނީ ކުޅުންތެރިން އެ މީހުންނަށް ހެދުނު ގޯސްތައް ރަނގަޅުކުރުމުންނެވެ. އެމެޗުގައި ޕްރެޝަރއެއް ލިބި، އެ ޕްރެޝަރު ހޭންޑަލްކުރަން އެނގުމަކީ ލިބުނު ހިތްވަރެއްކަމަށް ނާޒިމާ ބުންޏެވެ.

ނާޒިމާ ބުނީ އިދިކޮޅުގައި އޮތީ ބަލި ޓީމެއް ނޫންކަމަށެވެ އެހެން ނަމަވެސް ފައިނަލަށް ނުކުންނާނީ މެޗުން މޮޅުވެ ޗެމްޕިއަންކަން ހޯދަން ކަމަށެވެ. އަދި އަޒުމަކީ ތަށި ވެމްކޯ އަތުގައި ބެހެއްޓުންކަމަށާއި، އިރާދަކުރެއްވިއްޔާ އެކަން ކުރާނެކަމަށް ނާޒިމާ ބުންޏެވެ.

ވެމްކޯއާއި ޕޮލިސް ބައްދަލުރާ އެސޯސިއޭޝަން ކަޕްގެ ފައިނަލް މެޗު އޮންނާނީ ބުރާސްފަތި ދުވަހުގެ ރޭގައެވެ.