ވިމްބަލްޑަންގައި ނަޑާލް ނުފެނިދާނެ

ކުރިއަށް އޮތް ވިމްބަލްޑަން ޓެނިސް މުބާރާތުގައި ނުފެނިދާނެކަމަށް ރަފައެލް ނަޑާލް ބުނެފިއެވެ.

ނަޑާލް މިހެން ބުނީ މިއަހަރުގެ ފްރެންޗް އޯޕަން ކާމިޔާބުކުރުމަށްފަހުއެވެ. ނަޑާލް ވަނީ ފައިނަލްގައި ކެސްޕާ ރޫޑް ބަލިކޮށް 14 ވަނަ ފަހަރަށް ތަށި އުފުލާލާފައެވެ. މިއީ އޭނާ ކާމިޔާބުކުރި 22 ވަނަ ގްރޭންޑް ސްލޭމްއެވެ. ވިމްބަލްޑަން ޓެނިސް މުބާރާތް ފެށުމަށް ހަމަޖެހިފައި އޮތީ މި މަހުގެ 27 ގައެވެ. މިއީ މިއަހަރުގެ ތިން ވަނަ ގްރޭންޑް ސްލޭމްއެވެ.

ވިމްބަލްޑަންގައި ފެނިދާނެތޯ ސުވާލުކުރުމުން ނަޑާލް ބުނީ ދެ ހަފްތާ ވަންދެން ފްރެނެޗް އޯޕަން އޭނާ ކުޅުނީ ވާތު ފަޔަށް ލިބިފައިވާ އަނިޔާ ރިކަވާ ނުވާތީ، އިންޖެކްޝަން ޖަހައިގެން ކަމަށެވެ. އަދި އެގޮތަށް އިންޖެކްޝަން ޖަހައިގެން ކުޅެންޖެހޭނަމަ ވިމްބަލްޑަންގައި އޭނާ ނުފެންނާނެ ކަމަށް ނަޑާލް ބުންޏެވެ. މީގެ އިތުރުން ނަޑާލް ބުނީ އަނިޔާއިން ރަނގަޅުވުމަށް މުއްދަތު އެބަ އޮތް ކަމަށެވެ. އަދި މުބާރާތް ފެށެން ވާއިރަށް އަނިޔާއަށް ލުޔެއް ލިބިއްޖެނަމަ، ވިމްބަލްޑަންގައި އޭނާ ކުޅޭނެކަމަށެވެ.

ފަޔަށް ލިބިފައިވާ އަނިޔާގެ ސަބަބުން މިދިޔަ އަހަރު އޮތް ދެ މުބާރާތެއް ނަޑާލް ނުކުޅެއެވެ. އެއީ މިދިޔަ އަހަރުގެ ވިމްބަލްޑަން އާއި ޔޫއެސް އޯޕަންއެވެ. ނަޑާލްގެ ސަޕޯޓުން މި އަހަރުގެ ފަހު މުބާރާތުގައި އޭނާ ފެންނަން ބޭނުންވާ ކަމަށް ނަޑާލް ބުންޏެވެ. ނަމަވެސް ނަޑާލް ބުނީ އޭނާ ފުރަތަމަ އިސްކަން ދޭނީ ސިއްހަތަަށްކަމަށެވެ.