ނަޑާލް މަހެއްހާ ދުވަހަށް ކުޅުމާއި ދުރަށް!

އަނިޔާގެ ސަބަބުން ޓެނިސް ތަރި ރަފައެލް ނަޑާލް މަހެއްހާ ދުވަހަށް ކުޅުމާއި ދުރުގައި ހުންނަން ޖެހިއްޖެއެވެ. އޭނާގެ ރިބްއަށް ލިބުނު އަނިޔާގެ ސަބަބުން 4-6 ހަފްތާއާއި ދެމެދުގެ މުއްދަތަކަށް ނަޑާލް ކުޅުމާއި ދުރުގައި ހުންނަން ޖެހޭނެކަމަށް ބީބީސީން ވަނީ ރިޕޯޓްކޮށްފައެވެ.

ނަޑާލްއަށް އަނިޔާވީ ހޮނިހިރު ދުވަހު އިންޑިޔަން ވެލްސް ސެމީފައިނަލްގައެވެ. ފައިނަލަށް ދަތުރުކުރި ނަމަވެސް ފައިނަލްގައި ޓޭލާ ފްރިޓްޒްއާއި ދެކޮޅަށް ފައިނަލްގައި ކުޅުނެވެ. އެމެޗުގައި ބަލިވުމުގެ އިތުރުން ނަޑާލްގެ ހާލަތު އިތުރަށް ގޯސްވިއެވެ.

އަނިޔާގެ ސަބަބުން 35 އަހަރުގެ ނަޑާލްއަށް ގެއްލޭނެ މުހިއްމު ދެ މުބާރާތަކީ އަންނަ މަހު ކްލޭކޯޓްގައި ކުޅޭ ދެ މުބާރާތެވެ. އެއީ މޮންޓެކާލޯ ޓެނިސް މުބާރާތާއި, ބާސެލޯނާގައި އޮންނަ މުބާރާތެވެ. މެއި މަހުގެ 22 ވަނަ ދުވަހު ފަށާ ފްރެންޗް އޯޕަންއަށް ނަޑާލް މުޅިން ފިޓްވާނެކަމަށް ބެލެވެއެވެ. އެމުބާރާތް ނަޑާލް ވަނީ 13 ފަހަރު ކާމިޔާބުކޮށްފައެވެ. މުބާރާތް އެންމެ ގިނަ ފަހަރު ކާމިޔާބުކޮށްފައިވަނީވެސް ނަޑާލްއެވެ.