ޝަންގްހާއި މާސްޓާސް: ނަޑާލް ބަލިކޮށް ފެޑެރާ ތަށި އުފުލާލައިފި

ޝަންގްހާއި މާސްޓާސްގެ ފައިނަލްގައި ރަފައޭލް ނަޑާލް ބަލިކުރުމަށްފަހު ރޯޖާ ފެޑެރާ ތަށި އުފުލާލައިފިއެވެ.

ޗައިނާގެ ޝަންގްހާއީގައި ކުރިޔަށް ދިޔަ އޭޓީޕީ ވޯލްޑް ޓުއާގެ ޝަންގްހާއީ މާސްޓާސްގެ ޗެމްޕިއަންކަން ފެޑެރާ ހޯދީ ދުނިޔޭގެ ރޭންކިންގެ އެއްވަނައިގައި މިވަގުތު ރޭންކް ކުރެވިފައި އޮތް ސްޕެއިންގެ ރަފައޭލް ނަޑާލް ސީދާ ދެ ސެޓުން ބަލިކޮށްގެންނެވެ. މި މެޗުގެ ސެޓުތައް ފެޑެރާ ގެންދިޔައީ 6-4 އަދި 6-3 އަކުންނެވެ. 36 އަހަރުގެ ފެޑެރާ މި އަހަރު ކުޅުނު މެޗުތަކުގެ ތެރެއިން ބަލިވެފައިވަނީ އެންމެ ހަތަރު މެޗުން ކަމުގައިވާއިރު އޭނާ ނަޑާލް ބަލިކޮށްފައިވަނީ 72 މިނެޓުންނެވެ.

މުބާރާތުގެ ޗެމްޕިއަންކަން ހޯދުމަށް ފަހު ވާހަކަ ދައްކަމުން ފެޑެރާ ބުނެފައިވަނީ އަންނަ މަހު ލަންޑަންގެ އޯޓޫ އެރީނާގައި އޮންނަ އޭޓީޕީ ވޯލްޑް ޓުއާ ފައިނަލްސްއަކީ އޭނާގެ އެންމެ ބޮޑު އަމާޒު ކަމަށާއި އޭނާގެ އުއްމީދަކީ އެ މުބާރާތް ކާމިޔާބުކޮށް އަލުން އަނބުރާ ދުނިޔޭގެ ރޭންކިންގެ އެއްވަނަ ހޯދުން ކަމަށެވެ.

މި ސީޒަނުގައި ފެޑެރާ ވަނީ ހަތަރު ފަހަރެއްގެ މަތިން ނަޑާލް ބަލިކޮށްފައެވެ. އަދި މިއީ އެ ދެ ކުޅުންތެރިން ވާދަކުރި މެޗުތަކުގެ ތެރެއިން ފެޑެރާ ނަދާލްގެ މައްޗަށް ޖެހިޖެހިގެން ކުރިހޯދި ފަސް ވަނަ މެޗެވެ. ފެޑެރާ އާއި ނަދާލް ޖުމްލަ 38 ފަހަރު ވާދަކޮށްފައިވާއިރު 23 މެޗުން ނަޑާލް މޮޅުވެފައިވާއިރު ބާކީ 15 މެޗުން މޮޅުވެފައިވަނީ ފެޑެރާއެވެ. މި މުބާރާތް ކާމިޔާބު ކުރުމާއެކު ފެޑެރާ ވަނީ އޯޕަން އެރާގައި 94 މުބާރާތް ކާމިޔާބު ކޮށް އެންމެ ގިނަ މުބާރާތް ކާމިޔާބު ކުރި ކުޅުންތެރިންގެ ލިސްޓުގެ ދެވަނައަށް ޖެހިލާފައެވެ.

މިއީ ފެޑެރާ މި ސީޒަނުގައި ކާމިޔާބުކުރި ހަ ވަނަ މުބާރާތައް ވާއިރު އަންނަ މަހު އޮންނަ އޭޓީޕީ ވޯލްޑް ޓުއާ ފައިނަލްސް އޭނާ ކާމިޔާބު ކޮށްފިނަމަ އޭނާއަށް އަލުން އަނބުރާ ދުނިޔޭގެ ރޭންކިންގެ އެއްވަނަ ލިބޭނެއެވެ. ފެޑެރާ ވަނީ ކެރިއަރުގައި 19 ގްރޭން ސްލޭމް ކާމިޔާބުކޮށް 302 ހަފްތާ ވަންދެން ދުނިޔޭގެ ރޭންކިންގެ އެއްވަނަ ދަމަހައްޓާފައެވެ.