އޮސްޓްރޭލިއަން އޯޕަން އާއެކު ޓެނިހުގެ ބޮޑު ރިކޯޑު ނަޑާލަށް

މި އަހަރުގެ އޮސްޓްރޭލިއަން އޯޕަން ޓެނިސް މުބާރާތް ކާމިޔާބުކޮށް ޓެނިސް ލެޖެންޑް ރޮޖާ ފެޑެރާ މީގެ ކުރިން ހަދާފައި އޮތް ރިކޯޑު ސްޕެއިނުގެ ރަފައެލް ނަޑާލް މުގުރާލައިފިއެވެ.

މީގެ ކުރިން 2018 ވަނަ އަހަރު ފެޑެރާ ވަނީ ގްރޭންޑް ސްލޭމް 20 ތަށި ކާމިޔާބުކޮށް، އެންމެ ގިނައިން ގްރޭންޑް ސްލޭމް މުބާރާތް ކާމިޔާބުކުރި ކުޅުންތެރިޔާގެ ރިކޯޑު ހަދާފައެވެ. އެ ރިކޯޑާ ނަޑާލް ހަމަކުރީ މިދިޔަ އަހަރުގެ އޮކްޓޯބަރު މަހު އޮތް ފްރެންޗް އޯޕަން ޓެނިސް މުބާރާތް ކާމިޔާބުކޮށްގެންނެވެ. އަދި މީގެ ކުރިން ސާބިއާގެ ނޮވަކް ޖޮކޮވިޗްވެސް ވަނީ ގްރޭންޑް ސްލޭމް 20 ތަށި ކާމިޔާބުކޮށްފައެވެ.

އެކަމަކު މި އަހަރު އޮތް އޮސްޓްރޭލިއަން އޯޕަނުގެ ފައިނަލުގައި ރަޝިއާގެ ޑެނީލް މެޑްވެޑޭވް ބަލިކޮށް، ނަޑާލް ވަނީ 21 ވަނަ ގްރޭންޑް ސްލޭމް ތައްޓާއެކު އެ ރިކޯޑު މުގުރާލާފައެވެ. ފަސް ގަޑިއިރަށް ވުރެ ގިނަ ވަގުތު ކުޅުނު ފައިނަލް މެޗު ފެޑެރާ ކާމިޔާބުކުރީ ފަހަތުން އަރައި 3-2 ސެޓުންނެވެ.

އާދީއްތަ ދުވަހުގެރޭ ކުޅުނު މެޗުގެ ފުރަތަމަ ދެ ސެޓު މޮޅު ކުޅުމެއް ދައްކައި މެޑްވެޑޭވް ވަނީ ކާމިޔާބުކޮށްފައެވެ. އެގޮތުން މި ދެ ސެޓު މެޑްވެޑޭވް ގެންދިޔައީ 6-2 އަދި 7-6 (7-5) އިންނެވެ. އެކަމަކު އޭގެ ފަހުން ކުޅުނު އަނެއް ދެ ސެޓުގައިވެސް ނަޑާލް މޮޅު ކުޅުމެއް ދެއްކިއިރު، އެ ދެ ސެޓު އޭނާ ގެންދިޔައީ 6-4 އަދި 6-4 އިންނެވެ. އަދި މެޗުގެ ފަހު ސެޓު 7-5 އިން ކާމިޔާބުކޮށް، ނަޑާލް ވަނީ މި މެޗުން މޮޅުވެފައެވެ.

މިއީ ނަޑާލް އޮސްޓްރޭލިއަން އޯޕަން ކާމިޔާބުކުރި ދެވަނަ ފަހަރެވެ. އޭނާ އެންމެ ފުރަތަމަ އޮސްޓްރޭލިއަން އޯޕަން ކާމިޔާބުކޮށްފައިވަނީ 2009 ވަނަ އަހަރުއެވެ. އަދި މި ކާމިޔާބީއާއެކު ނަޑާލް ވަނީ ޓެނިހުގެ ތާރީޚުގައި ގްރޭންޑް ސްލޭމް ހަތަރު މުބާރާތް އެއް ފަހަރަށް ވުރެ ގިނަ ފަހަރު ހޯދި ހަތަރު ކުޅުންތެރިންގެ ތެރޭގައިވެސް ހިމެނިފައެވެ.