ނޯވޭގެ ކެސްޕާ ރޫޑް ބަލިކޮށް ސްޕެއިނުގެ ރަފައެލް ނަޑާލް ފްރެންޗް އޯޕަންގެ ޗެމްޕިއަންކަން ހޯދައިފިއެވެ.

މި މޮޅާއެކު ނަޑާލް ވަނީ އޭނާގެ ކެރިއަރުގައި ޖުމުލަ 22 ގްރޭންޑް ސްލޭމް ތަށި ހޯދާފައެވެ. އެންމެ ގިނައިން ގްރޭންޑް ސްލޭމް ތަށި އުފުލާލުމުގެ ރެކޯޑު އޮތީ ވެސް ނަޑާލް އަތުގައެވެ. އޭނާއާއި އެންމެ ގާތުން ގްރޭންޑް ސްލޭމް ތަށި ހޯދާފައިވަނީ ސާބިއާގެ ޖޮކޮވިޗާއި ސްވިޒަލެންޑްގެ ރޮޖާ ފެޑެރާއެވެ. އެ ދެ ކުޅުންތެރިން ވަނީ 20 ގްރޭންޑް ސްލޭމް ތަށި ހޯދާފައެވެ.

ފައިނަލުން މޮޅުވުމަށްފަހު ނަޑާލް ބުނީ ފްރެންޗް އޯޕަން އަކީ ޓެނިހުގެ އެންމެ ބޮޑު މުބާރާތް ކަމަށެވެ. އަދި އޭނާއަށް އެންމެ ކާމިޔާބު މުބާރާތް ކަމަށެވެ. މީގެ އިތުރުން ނަޑާލް ބުނީ އޭނާގެ އުމުރުން 36 އަހަރުގައި ވެސް އޭނާ ޕެރިހުގައި މުބާރާތް ކުޅެން ހުރީ، އެ މުބާރާތް އޭނާއަށް ޚާއްސަވީމަކަމަށެވެ. އަދި އޭނާގެ ޚާއްސަ ކޯޓަކީ ޕެރިސްކަމަށެވެ.

މީގެ އިތުރުން ނަޑާލް ބުނީ އޭނާއަށް ލިބުނު ކާމިޔާބީގެ އެންމެ ބޮޑު ހިއްސާދާރަކީ އޭނާގެ އާއިލާކަމަށެވެ. އޭނާ ބުނި ގޮތުގައި އޭނާގެ ހުރިހާ ވެސް އެއްޗަކީ އަނިޔާވެ ކުޅުމާ ދުރުގައި ހުރިއިރު އާއިލާގެ ފަރާތުން ލިބުނު އެހީތެރިކަމާއި ސަޕޯޓުކަމަށެވެ. އަދި އާއިލާގެ މީހުން ނެތް ނަމަ، ވަރަށް ކުރިން އޭނާ ޓެނިހުން ރިޓަޔާކުރާނެކަމަށެވެ.

ފައިނަލްގައި ނަޑާލް މޮޅުވީ އެއްވެސް ސެޓެއް ނުގެއްލިއެވެ. ރޫޑްގެ މައްޗަށް ނަޑާލް ކުރި ހޯދީ  6-3 6-3 6-0 ންނެވެ. ފައިނަލަށްފަހު ރޫޑް ބުނީ މުބާރާތް ކާމިޔާބުކުރި ނަޑާލަކީ މުބާރާތުގައި ވެސް އަދި ޓެނިހުގައި ވެސް ކޮން ފެންވަރެއްގެ ކުޅުންތެރިއެއްކަން އެންމެންނަށް އިނގޭނެކަމަށެވެ. އޭނާ ބުނީ ގޮތުގައި ނަޑާލް ކަހަލަ މޮޅު ކުޅުންތެރިޔަކާ ދެކޮޅަށް އެ ލެވެލްގެ މެޗެއް ކުޅުމަކީ ވެސް އޭނާއަށް ލިބުނު މޮޅެއް ކަމަށެވެ. އޭނާ ބުނީ އުންމީދުކުރަނީ މުސްތަގުބަލުގައި އިތުރު ފައިނަލްތަކުގައި ކުޅެވޭނެކަމަށް އުންމީދުކުރާކަމަށެވެ.