ދަރަނި ދެއްކުމުގެ ގާބިލުކަން އެބަހުރި، މިއަހަރު ރިޒާވް ހުންނާނީ ރަނގަޅު މިންވަރެއްގައި: އަމީރު

ދަރަނި ދެއްކުމުގެ ގާބިލުކަން ސަރުކާރުގައި އެބަހުރި ކަމަށާއި އަހަރުނިމޭއިރު ރިޒާވް ހުންނާނީ ރަނގަޅު މިންވަރެއްގައި ކަމަށް ފިނޭންސް މިިނިސްޓަރ އިބްރާހިމް އަމީރު ވިދާޅުވެއްޖެއެވެ.

އާދީއްތަ ދުވަހުގެ ރޭ އަމީރު ކުރެއްވި ޓްވީޓުތަކެއްގައި ވިދާޅުވީ އިތުރުވަމުން އަންނަ ޑޮލަރުގެ އާމްދަނީއާއެކު އަހަރު ނިމޭއިރު ރަސްމީ ރިޒާވް ކޮވިޑުގެ ކުރިން ހުރި ވަރަށް ދެމެހެއްޓޭނެ ކަމަށެވެ. އަދި ރާއްޖެއަށް ދަރަނި ދެއްކުމުގައި ކުރުމުއްދަތުގެ ގޮންޖެހުމެއް ނެތް ކަމަށް ވެސް އޭނާ ފާހަގަ ކުރެއްވިއެވެ.

Advertisement

އަމީރު ވިދާޅުވީ ކުރިއާ އަޅާ ބަލާއިރު ރާއްޖޭގެ ގްރޮސް އަދި ނެޓް ރިޒާވް ވެސް ހުރީ މަތީގައި ކަމަށެވެ. އެގޮތަށް ދެމެހެއްޓުމަށް ބޭރު ފައިސާގެ އިން ފްލޯ އަދި އައުޓް ފްލޯ ގާތުން ބަލަމުން ގެންދަވާ ކަމަށާއި ދިމާވާ ގޮންޖެހުންތަކަށް ފިޔަވަޅު އަޅުމުން ގެންދާ ކަމަށް ވެސް އޭނާ ވިދާޅުވިއެވެ.

މިނިސްޓަރ މިފަދައިން ޓްވީޓް ކުރެއްވީ ރާއްޖޭގެ ރިޒާވް ހުސްވެ ޑިފޯލްޓް ވެދާނެ ކަމަށް ބުނެ ބައެއް ފަރާތްތަކުން ޚަބަރު ފަތުރާތީއެވެ. ނަމަވެސް އެއީ ހަގީގަތާ ޚިލާފު ވާހަކަތަކެއް ކަމަށް އަމީރު ވިދާޅުވިއެވެ.

އަމީރު ވިދާޅުވީ ރައްޔިތުންނާއި ބޭރުގެ އިންވެސްޓަރުންނަށް ހަގީގަތް އޮޅޭގޮތަށް މިފަދަ ވާހަކަތައް ދެއްކުމުން ދުނިޔެ މިއޮތް ނާޒުކު ދަނޑިވަޅުގައި މުޅި ރާއްޖެއަށް ލިބެން ނުޖެހޭ ގެއްލުމެއް ލިބިދާނެ ކަމަށެވެ. އަދި މިއީ އިގްތިސާދު ނުތަނަވަސްވެ މާކެޓަށްއޭގެ ނޭދެވޭ އަސަރުކޮށްފާނެ ފަދަ ވާހަކަތައް ކަމަށް ވެސް އޭނާ ފާހަގަ ކުރެއްވިއެވެ.

މިނިސްޓަރ އަމީރު ވިދާޅުވީ ރާއްޖޭގެ އިގްތިސާދު ދަނީ ހަލުވިކަމާއެެކު ކުރިއަރަމުން ކަމަށާއި މިއަހަރު ނިމޭއިރު އިގްތިސާދު ކޮވިޑުގެ ކުރީގައި ހުރިވަރަށް ރުޖޫއަ ކުރެވޭނެ ކަމަށެެވެ.

މީގެ އިތުރުން ދުނިޔޭގެ އިގްތިސާދަށް އަންނަ ބަދަލުތަކުގެ އަސަރު ރައްޖެއަށް ކުރާނެ ކަމަށާއި އެއިން އަރައިގަނެވޭނީ ރަނގަޅު ދަނޑިވަޅުގައި އެކަށީގެންވާ ފިޔަވަޅުތައް އަޅައިގެން ކަމަށް އަމީރު ވިދާޅުވިއެވެ. ރާއްޖޭގެ އިގްތިސާދީ ހާލަތު މޮނިޓަރކޮށް ސަރުކާރުން ފިޔަވަޅު އަޅަމުންދާ ކަން ވެސް އޭނާ ފާހަގަ ކުރެއްވިއެވެ.

އަމީރު ވިދާޅުވީ ދުނިޔޭގެ އިގްތިސާދަށް އަންނަ ބަދަލުތަކުގެ ސަބަބުން ދައުލަތުގެ ރިޒާވަށް އަންނަ އިމްޕެކްޓް ކުޑަކުރުމަށް އައިޓީއެފްސީގެ ޓްރޭޑް ފައިނޭންސް ފެސިލިޓީގެ ލިމިޓް 175 މިލިއަން ޑޮލަރަށް އިތުރުކޮށްފައިވާ ކަމަަށެވެ. އަދި ސަރުކާރުގެ ވިސްނުމަކީ ހިދުމަތްތަކަށް ބުރޫ ނާރާނެހެން ހަރަދުތައް އަލުން ބައްޓަންކޮށް، ބަޖެޓް ފައިނޭންސް ކުރުން ކަމަށް ވެސް މިނިސްޓަރ އަމީރު ވިދާޅުވިއެވެ.