ކޮވިޑް-19ގެ ކުރީގެ އިޤްތިސާދުގެ މިންވަރަށް އަނބުރާ ރުޖޫއަވެއްޖެ - އަމީރު

ރާއްޖޭގެ އިޤްތިސާދު، ކޮވިޑް-19ގެ ކުރީގެ އިޤްތިސާދުގެ މިންވަރަށް އަނބުރާ ރުޖޫޢަވެފައިވާ ކަމަށް ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެއެވެ.

އަންނަ އަހަރަށް ލަފާކުރާ ދައުލަތުގެ ބަޖެޓް މަޖިލީހަށް ހުށަހެޅުއްވަމުން ފިނޭންސް މިނިސްޓަރު އަމީރު ވިދާޅުވި ރާއްޖޭގެ އިޤްތިސާދަށް ކުރިމަތިވި ބޮޑެތި ގޮންޖެހުންތަކުގެ އަސަރު ރައްޔިތުންނަށް އިޙްސާސްވާ މިންވަރު ކުޑަކުރެވި، އެ ގޮންޖެހުންތަކުން އަރައިގަނެވުނު ކަމަށެވެ. އަދި ރައްޔިތުންގެ ދިރިއުޅުމުގެ ފެންވަރު އިހުނަށްވުރެ މަތިކުރެވި ރައްޔިތުންނަށް ފާގަތި ދިރިއުޅުމެއް ހޯދައިދެވުނު ކަމަށް މިނިސްޓަރު ވިދާޅުވިއެވެ.

Advertisement

މިނިސްޓަރު ވިދާޅުވީ މިއީ ހަރުދަނާ ސިޔާސަތުތަކެއްގެ މަތީގައި، އުނދަގޫ ފިޔަވަޅުތައް ވެސް އަޅަންޖެހުނު ވަގުތު އެ ފިޔަވަޅުތައް އަޅައިގެން، ހިކުމަތްތެރިކަމާއެކު ކުރިއަށް ދިއުމުގެ ނަތީޖާ ކަމަށެވެ. ޤައުމެއްގެ އިޤްތިސާދީ އަދި ފިސްކަލް ސިޔާސަތުތައް ބިނާވަނީ އެ ވަގުތެއްގެ އިޤްތިސާދީ ހާލަތާއި ކުރިމަގުގެ އަންދާޒާގެ މައްޗަށް ކަމަށް މިނިސްޓަރު ވިދާޅުވިއެވެ.

ރާއްޖޭގެ އިޤްތިސާދު މިއަދު މިވަނީ، ކޮވިޑް-19ގެ ކުރީގެ އިޤްތިސާދުގެ މިންވަރަށް އަނބުރާ ރުޖޫއަވެފައި ކަމަށާއި، ކޮވިޑް-19ގެ އިޤްތިސާދީ ތަދުމަޑުކަމުން އަރައިގަނެވިއްޖެކަމަށް މިނިސްޓަރު ވިދާޅުވިއެވެ. އަދި މި އަހަރު ރާއްޖޭގެ އިޤްތިސާދު ކުރިއަރާނެކަމަށް މިހާރު ލަފާކުރެވެނީ 8.7 އިންސައްތައިން ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ މި ކުރިއެރުމުގެ މައިގަނޑު ސަބަބަކީ ރާއްޖެއަށް ފަތުރުވެރިން އަންނަ މިންވަރު އިތުރުވެފައިވުމެވެ. މި އަހަރުގެ ތެރޭގައި ޗައިނާގެ ބޯޑަރު ހުޅުވުމާއެކު، އެ ގައުމުގެ ފަތުރުވެރިން ރާއްޖެއަށް އަންނަން ފެށުމުގެ ސަބަބުން، ފަތުރުވެރިކަމަށް އިތުރު ކުރިއެރުމެއް ލިބިފައިވާ ކަމަށް މިނިސްޓަރު ވިދާޅުވިއެވެ. އެހެންނަމަވެސް، އަހަރުގެ 2 ވަނަ ކުއާޓަރުން ފެށިގެން ވިލާތުން އަންނަ ފަތުރުވެރިންގެ އަދަދު، 2022 އާ އަޅައިބަލާއިރު، މަދުވަމުން އަންނަކަން ފާހަގަކުރެވޭ ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ ފަތުރުވެރިކަމުގެ އިތުރުން، ރާއްޖޭގެ އިޤްތިސާދުގައި މުހިއްމު ސިނާއަތްތައް ކަމަށްވާ އިމާރާތްކުރުމާއި، މުވާސަލާތާއި، ހޯލްސޭލް އަދި ރީޓެއިލް ވިޔަފާރީގެ ދާއިރާތައް މިއަހަރާއި މިއަންނަ އަހަރު ވެސް ކުރިއަރާނެ ކަމަށެވެ.

މި އިޤްތިސާދީ ކުރިއެރުމުގެ އެހީގައި ރާއްޖޭގައި އުފެދޭ ވަޒީފާގެ އަދަދު އިތުރުވާނެ ކަމަށާއި، ކޮވިޑް-19 އަށްފަހުގައި 2021 ވަނަ އަހަރުން ފެށިގެން ޕެންޝަން އޮފީހުގައި ރަޖިސްޓަރީކޮށްފައިވާ މުވައްޒަފުންގެ އަދަދު އަހަރުން އަހަރަށް ބަލާއިރު އެވްރެޖްކޮށް 8.4 އިންސައްތަ އިތުރުވަމުންދާ ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ މިއީ ރާއްޖޭގެ މަސައްކަތު އާބާދީ އާއި އިޤްތިސާދަށް ހުރި ފަހި ފުރުސަތުތައް ދައްކައިދޭ އަލާމާތެއް ކަމަށެވެ. އަދި އަންނަ އަހަރުވެސް ފަތުރުވެރިކަމުގެ ދާއިރާ ހިމެނޭހެން، ރާއްޖޭގެ ވަޒީފާގެ ބާޒާރުގަ ވަޒީފާތައް އުފެދި އިތުރުވާނެކަމަށް ބެލެވޭ ކަމަށެވެ.