އަމީރު މަޖިލީހަށް ހާޒިރު ނުވީ ޤާނޫނާއި ޚިލާފަށް ކަމަށް ބުނާ ވާހަކައަށް އޭނާގެ ވަރުގަދަ ރައްދު - "ޤާނޫނާއި ޚިލާފަށް މި 5 އަހަރުވެސް ކުރި ކަމެއް ނޯންނާނެ"
ޤަވާއިދުތަކާއި ޚިލާފަށް ކޮށްފައި އޮތް އެއްވެސް ކަމެއް ނޯންނާނެ ކަމަށް ވިދާޅުވި
ފިނޭންސް މިނިސްޓަރ އިބްރާހިމް އަމީރު މަޖިލީހުގެ ޖަލްސާގައި މެންބަރުންގެ ސުވާލުތަކަށް ޖަވާބުދެއްވަނީ
އެޓަރނީ ޖެނެރަލް (އޭޖީ) ގެ ލަފާފުޅާއެކު ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާއަށް ހާޒިރުވެވަޑައިނުގަންނަވަން ފިނޭންސް މިނިސްޓަރު އިބްރާހިމް އަމީރު ނިންމަވާފައި ވަނިކޮށް އެކަން ކުރެއްވީ ޤާނޫނާއި ޤަވާއިދުތަކާއި ޚިލާފަށް ކަމަށް ވިދާޅުވެ ކުރަމުންދާ ތުހުމަތުތަކަށް މިނިސްޓަރ އަމީރު ރައްދު ދެއްވައިފިއެވެ.
މިނިސްޓަރު އެގޮތަށް ނިންމަވާފައި ވަނީ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލަ އެޖެންޑާ ކުރުމަށްފަހު އެ މައްސަލަ ނުނިންމައި މަޖިލީހުގެ އެހެން މަސައްކަތެއް ކުރިއަށް ނުގެންދެވޭނެ ކަމަށް އޭޖީން ގާނޫނީ ލަފާ ދެއްވާފައިވާތީ ކަމަށް ރައީސް އޮފީހުގެ ތަރުޖަމާނު މިއުވާން މުޙައްމަދު "ރާއްޖެ އެމްވީ" އަށް މައުލޫމާތު ދެއްވަމުން ވިދާޅުވިއެވެ. ނަމަވެސް މަޖިލީހުގެ މައިނޯރިޓީ ލީޑަރ އަލީ އާޒިމް ވަނީ އެފަދަ އެންގުމެއް އެޖީ އަށް ވެސް ނޭންގޭނެ ކަަމަށް ވިދާޅުވެފައެވެ. އަދި މަޖިލީހަށް ހާޒިރުވެވަޑައިނުގަތުމަކީ އަމީރު ޤާނޫނާއި ޚިލާފަށް ކުރެއްވި ކަމެއް ކަަަމަށް އާޒިމް ވިދާޅުވިއެވެ. އެހެންކަމުން އެކަމާއި ގުޅިގެން ކޮންމެވެސް ދުވަހަކުން އަމީރު ކޯޓަށް ދާން ޖެހޭނެ ކަަމަށް ވެސް އާޒިމް ވަނީ ވިދާޅުވެފައެވެ.
އާޒިމްގެ އެ ވާހަކަތަކާއި ގުޅިގެން "ރާއްޖެ އެމްވީ" އިން ކުރި ސުވާލަކަށް ޖަވާބުދެއްވަމުން މިނިސްޓަރ އަމީރު ވިދާޅުވީ މުސްތަގްބަލުގައި ކަންކަން ހިނގާނެ ގޮތެއް ދަންނަވަން އެނގިވަޑައިނުގަންނަވާ ކަމަށެވެ. އެހެންނަމަވެސް ޤާނޫނާއި ޤަވާއިދުތަކާއި ޚިލާފަށް ކޮށްފައި އޮތް އެއްވެސް ކަމެއް ނޯންނާނެ ކަމަށް ވިދާޅުވިއެވެ. އެއީ ހަމައެކަނި މިއަދުގެ ވާހަކަ ނޫން ކަމަށާއި ޤާނޫނާއި ޚިލާފަށް މި 5 އަހަރުވެސް އެމަނިކުފާނު ކުރެއްވި ކަމެއް ނޯންނާނެ ކަމަށް އަމީރު ވިދާޅުވިއެވެ.
ނަޝީދުގެ އިތުބާރު ނެތްކަމުގެ މައްސަލަ އެމްޑީޕީ ޕީޖީ ގްރޫޕުން މަޖިލީހަށް ހުށަހެޅުމުން އާދީއްތަ ދުވަހުގެ ޖަލްސާ އާއި ހޯމަ ދުވަހުގެ ޖަލްސާއަށް އެ މައްސަލައިގައި ގޮތެއް ނިންމަން ވަނީ އެޖެންޑާކޮށްފައެވެ. އެހެންނަމަވެސް މަޖިލީހުގެ ނައިބު ރައީސް އީވާ އަބްދުﷲ ސަލާމުގައި ހުންނެވުމުން މައްސަލަ ކުރިއަށްގެންދެވޭ ގޮތް ވަނީ ނުވެފައެވެ. މަޖިލީހުގެ ގަވާއިދު ބުނާގޮތުން، ރިޔާސަތުގެ އިތުބާރު ނެތްކަމުގެ މައްސަލަ ހުށަހަޅައިފިނަމަ މަޖިލީހުގެ އިތުރު އެއްވެސް މަސައްކަތެއް ކުރިއަށްގެންދެވޭނީ އެ މައްސަލައާމެދު ގޮތެއް ނިންމުމަށްފަހުއެވެ. ނަމަވެސް އެ މައްސަލަ ހުށަހަޅަން އޮއްވާ އެ މައްސަލަ އެޖެންޑާ ނުކޮށް މަޖިލީހުން ވަނީ ދައުލަތުގެ ބަޖެޓާއި ސަޕްލިމެންޓްރީ ބަޖެޓު ހުށަހަޅަން އަންގާރަ ދުވަހުގެ ޖަލްސާއަށް ތާވަލުކޮށްފައެވެ.
