އަމީރު ޤާނޫނާއި ޚިލާފަށް ކަމެއް ކުރައްވާފައިވާ ކަމަށް ނުފެނޭ، މައްސަލައެއް އޮތް ނަމަ ލިޔުމުން ހުށަހަޅުއްވާ - އަސްލަމް

ފިނޭންސް މިނިސްޓަރު އިބްރާހީމް އަމީރު ޤާނޫނާއި ޚިލާފަށް ކަމެއް ކުރައްވާފައިވާ ކަމަށް ފެންނަން ނެތް ކަމަށް ރައްޔިތުންގެ މަޖިލީހުގެ ރައީސް މުހައްމަދު އަސްލަމް ވިދާޅުވެއްޖެއެވެ.

މަޖިލީހުގެ ރައީސް މިހެން ވިދާޅުވެފައިވަނީ ފިނޭންސް މިނިސްޓަރު އިބްރާހީމް އަމީރު މަޖިލީހަށް ގޮންޖައްސަވާފައިވާ ކަމަށާއި އެ މަނިކުފާނު ޝަރީއަތަށް ފޮނުވަން ޖެހޭ ކަމަށް މަޖިލީހުގެ ކުރީގެ ރައީސް މުހައްމަދު ނަޝީދު ވިދާޅުވެފައިވާތީ އެކަމާއި ގުޅިގެންނެވެ.

މައްޗަންގޮޅި މެދު ދާއިރާގެ މެންބަރު މުހައްމަދު ނަޝީދު ވަނީ ނިޒާމީ ނުކުތާއެއް ނަންގަވާ، މިނިސްޓަރު އަމީރު މަޖިލީހަށް ވަޑައިގަންނަވާފައިވަނީ ކުށުގެ ތުހުމަތުގައި ހުންނަވައިގެން ކަމަށް ވިދާޅުވެފައެވެ. އަދި މަޖިލީހުގެ ޤަވާއިދުގެ 62 ވަނަ މާއްދާ އާއި މަޖިލީހުގެ މުޅި ރޫހާއި، ޤާނޫނު އަސާސީ އާއި ރާއްޖޭގެ އުސޫލުތަކާއި ޚިލާފަށް ފިނޭންސް މިނިސްޓަރު އަމީރު ވަނީ މީގެ ކުރިން ބަޖެޓް ހުށަހަޅަން ތާވަލްކުރި ޖަލްސާ އަށް ވަޑައިނުގެން ކުށެއް ކުރައްވާފައި ކަމަށް ނަޝީދު ވިދާޅުވިއެވެ. އަދި ސިޔާސީ ބޭނުންތަކަށް އެކަން އެކި ގޮތްގޮތަށް އަނބުރަމުންދާ ކަމަށް ވެސް ވަނީ މެންބަރު ނަޝީދު ވަނީ ވިދާޅުވެފައެވެ. އަދި ދައުލަތުގެ ނިޒާމް ބޭނުން ގޮތަަކަށް އަނބުރާލެވިގެން ނުވާނެ ކަމަށާއި މާލީ ވަޒީރަށް މަޖިލީހަށް ގޮންނުޖެއްސެވޭނެ ކަމަށް އޭނާ ވަނީ ވިދާޅުވެފައެވެ.

ނަޝީދުގެ އެ ވާހަކަފުޅުތަކާއި ގުޅިގެން އަސްލަމް ވިދާޅުވީ ބަޖެޓުގެ މަސައްކަތް ތާވަލްކޮށްފައި އޮތް 31 އޮކްޓޯބަރު ވަނަ ދުވަހުގެ ޖަލްސާ އަށް އަމީރު ވަޑައިނުގަންނަވާ ސަބަބު ފާހަގަކުރައްވާ، މަޖިލީހަށް އަމީރު ސިޓީއެއް ފޮނުއްވާފައިވާ ކަަމަށާއި އެކަމުގައި ޤާނޫނާއި ޚިލާފު ކަމެއް ފެންނަން ނެތް ކަމަށެވެ. މަޖިލީހުގައި ކަންހިނގައި ދިޔަ ގޮތާއި މަޖިލީހުގެ ޤަވާއިދަށް އަމަލުކުރި ގޮތް ވަރަށް ސާފު ކަމަށާއި އެކަމުގެ ބަހުސަކަށް ހުޅުވާލަން ބޭނުންފުޅު ނުވާ ކަމަށް އަސްލަމް ވިދާޅުވިއެވެ. އަދި ޤާނޫނާއި ޚިލާފަށް އަމަލެއް ކުރައްވާފައިވާ ނަމަ އެކަމެއް ފާހަގަކުރައްވާ ލިޔުމުން ހުށަހެޅުއްވުމަށް އަސްލަމް ވިދާޅުވިއެވެ.

ކުރިން ބަޖެޓް ހުށަހަޅަން ތާވަލްކުރި ޖަލްސާ އަށް އަމީރު ވަޑައިގަންނަވާފައި ނުވަނީ ބަންޑާރަނާއިބުގެ ލަފާފުޅާއި އެކުގައެވެ.