އާލާސްކަންފުޅާ އުޅުއްވާތީ ބަޖެޓު ހުށަހަޅަން ވަޑައިނުގެންނެވޭނެކަން އަމީރު މަޖިލީހަށް އަންގަވައިފި
ދެވަނަ ޖަލްސާއަށް ހުށަހަޅާފައިވަނީ މަޖިލީހުގެ ރައީސް، މުހައްމަދު ނަޝީދުގެ އިތުބާރުގެ މައްސަލަ
ފިނޭންސް މިނިސްޓަރު އިބްރާހިމް އަމީރު މަޖިލީހުގެ ޖަލްސާއެއްގައި
ދެ ބަޖެޓެއް ހުށަހަޅަން މިއަދަށް ތާވަލު ކުރި ޖަލްސާއަށް، އާލާސްކަންފުޅާ އުޅުއްވާތީ ވަޑައިގެންނެވެން ނެތްކަން ފިނޭންސް މިނިސްޓަރު މަޖިލީހަށް އަންގަވައިފިއެވެ.
އާދީއްތަ ދުވަހުގެ ރޭ ރައްޔިތުންގެ މަޖިލީހުގެ ރައީސް، މުޙައްމަދު ނަޝީދަށް އެޑްރެސް ކުރައްވައި އަމީރު ފޮނުއްވި ސިޓީގައި ވިދާޅުވީ ޖަލްސާގެ އެޖެންޑާގައި 2024 ވަނަ އަހަރަށް ދައުލަތުގެ ބަޖެޓު ހުށަހަޅަން އޮޔް ކަމަށްވި ނަމަވެސް ބަލިހާލަތު ހުރި ގޮތުން ޖަލްސާއަށް ހާޒިރުވެވަޑައިގެންނެވެން ނެތް ކަމަށެވެ.
އަންނަ އަހަރަށް ލަފާ ކުރާ ބަޖެޓާއި މިއަހަރުގެ ބާކީ މިއޮތް ދުވަހަށް ބޭނުންވާ ސަޕްލިމަންޓްރީ ބަޖެޓު ހުށަހެޅުމަށް މަޖިލީހުގެ އިދާރާއިން ވަނީ މިއަދު ހެނދުނު 9:00ގެ ޖަލްސާއަށް އެޖެންޑާ ކޮށްފައެވެ. ނަމަވެސް އަމީރަށް ޖަލްސާއަށް ވަޑައިގެންނެވެން ނެތުމުން އެ ޖަލްސާ ބޭއްވުމާ މެދު އިދާރާއިން ނިންމާ ގޮތެއް އަދި ހާމަކޮށްފައި ނުވެއެވެ.
މަޖިލީހަށް ބަޖެޓު ހުށަހަޅަން ޖެހޭނީ ތަޅުމަށް ހާޒިރުވެވަޑައިގެން ފިނޭންސް މިނިސްޓަރެވެ. އެ ޖަލްސާގައި ޤައުމުގެ އިގްތިސާދީ ހާލަތާއި ބަޖެޓުގެ ހުލާސާ ބަޔާނެއް މިނިސްޓަރު ދެއްވަން ޖެހެއެވެ.
މިއަދު ދެ ޖަލްސާއެއް ބާއްވަން މަޖިލީހުގެ އިދާރާއިން ވަނީ ތާވަލު ކޮށްފައެވެ. ފުރަތަމަ ޖަލްސާ 9:00 އަށް ތާވަލު ކޮށްފައި އޮތްއިރު ދެވަނަ ޖަލްސާ ތާވާލުކޮށްފައިވަނީ 11:00 އަށެވެ. ދެވަނަ ޖަލްސާއަށް ހުށަހަޅާފައިވަނީ މަޖިލީހުގެ ރައީސް، މުހައްމަދު ނަޝީދުގެ އިތުބާރުގެ މައްސަލައެވެ.
ނަޝީދުގެ އިތުބާރުގެ މައްސަލަ އާދީއްތަ ދުވަހު ދެ ޖަލްސާއަކަށް ތާވަލު ކުރި އެވެ. ނަމަވެސް ދެ ޖަލްސާގައި ވެސް ރިޔާސަތުން ވަނީ އެ ގަރާރު މަޖިލީހުގެ ގަވާއިދާ ހިލާފު ކަމަށް ނިންމަވައި ބޭރުކޮށްލައްވާފައެވެ. މަޖިލީހުގެ ރިޔާސަތުގައި ފުރަތަމަ ޖަލްސާގައި އިންނެވީ ވިލުފުށި ދާއިރާގެ މެމްބަރު ހަސަން އަފީފެވެ. އަދި ދެވަނަ ޖަލްސާގައި ރިޔާސަތުގައި އިންނެވީ މަޖިލީހުގެ ނައިބު ރައީސް އީވާ އަބްދުﷲއެވެ.
