ޒެވްރެވްއަށް ލިބުނު އަނިޔާ ސީރިއަސް

ފްރެންޗް އޯޕަން ޓެނިސް މުބާރާތުގެ ފިރިހެން ސިންގަލްސް ސެމީ ފައިނަލް މެޗުގެ ތެރެއިން ފައިގެ ކުޑަހުޅަށް ލިބުނު އަނިޔާ ސީރިއަސް ކަމަށް އަލެކްސަންޑާ ޒެވްރެވް ބުނެފިއެވެ.

އޭނާއަށް އަނިޔާވީ ސެމީ ފައިނަލްގައި ސްޕެއިނުގެ ރަފައެލް ނަޑާލާ ދެކޮޅަށް ކުޅުނު މެޗުގައެވެ. އަނިޔާގެ ސަބަބުން އޭނާއަށް މެޗު ކުރިއަށް ގެންދެވޭ ގޮތެއް ނުވިއެވެ. އެއާއެކު ފުރޮޅުލީ ގޮނޑީގައި އޭނާ ވަނީ ދަނޑުން ބާލާފައެވެ. މިކަމާ ގުޅިގެން ޒެވްރެވް ބުނީ ދަނޑު މަތީގައި ހިނގި ކަންތަކަކީ އޭނާއަށް ވަރަށް އުނދަގޫވިކަމެއް ކަމަށެވެ. އަދި އަނިޔާވުމުގެ ކުރިން އެއީ ވަރަށް ރަނގަޅު މެޗެއް ކަމަށެވެ.

ކުޑަ ހުޅަށް ލިބުނު އަނިޔާއާއި ގުޅިގެން އޭނާ ބުނީ ހީވާ ގޮތުގައި އެއީ ވަރަށް ސީރިއަސް އަނިޔާއެއް ހެންނެވެ. އެކަމަކު އަދިވެސް ޑަކްޓަރުންނާއި މެޑިކަލް ޓީމުން އަންނަނީ އިތުރަށް ބަލަން ޖެހޭ ކަންކަން ބަލަމުން ކަމަށް އޭނާ ބުންޏެވެ. އަދި އިތުރު ކަންކަން އެނގޭ ވަރަކުން ސަޕޯޓަރުންނާ ހިއްސާ ކުރަމުންދާނެ ކަމަށް ވެސް އޭނާ ބުންޏެވެ.

މީގެ އިތުރުން އޭނާ ބުނީ ނަޑާލަށް މަރުޙަބާ ކިޔާކަމަށެވެ. ނަޑާލް އޭނާގެ 14 ވަނަ ފައިނަލުން ފެނުމަކީ ތަފާތުކަމަށެވެ. އަދި ނަޑާލަށް އިތުރު ހިސްޓްރީއެއް ހެދޭނެ ކަމަށް އުންމީދުކުރާކަމަށެވެ.

އަނިޔާގެ ސަބަބުން މެޗު ހުއްޓާލަން ޖެހުނުއިރު، މެޗުގެ ލީޑު އޮތީ ނަޑާލް އަތުގައެވެ. އެއީ 7-6 (10-8) 6-6 އިންނެވެ. މެޗަށްފު ނަޑާލް ބުނީ ގްރޭންޑް ސްލޭމް މުބާރާތެއް ކާމިޔާބުކުރަން ޒްވެރެވް އައީ ވަރަށް މޮޅަށް ކުޅެމުންކަމަށެވެ. ޒްވެރެވްއަށް ހިތްދަތި ގޮތަކަށް މުބާރާތް ނިމުމަކީ ޕްރޮފެޝަނަލެއްގެ ހައިސިއްޔަތުން އޭނާ ހިތާމަކުރާނެ ކަމެއް ކަމަށް ވެސް ނަޑާލް ބުންޏެވެ. މީގެ އިތުރުން ނަޑާލް ބުނީ ކުޅުންތެރިއެއްގެ ދިރިއުޅުމުގައި އިންޖަރީ އަކީ ކޮންމެ ވަގުތެއްގައި ވެސް އައިސްދާނެ ކަމެއްކަން ޤަބޫލުކުރަންޖެހޭ ކަމަށެވެ.

މިފަހަރުގެ ފްރެންޗް އޯޕަން ޓެނިސް މުބާރާތުގެ ފިރިހެން ސިންގަލްސް ފައިނަލުގައި ނަޑާލް ނިކުންނާނީ ނޯވޭގެ ކެސްޕާ ރޫޑާ ދެކޮޅަށެވެ.