ސްޓާރސް އެކަޑަމީގެ 4 ކުޅުންތެރިން ސްރީލަންކާގެ ބާސްކެޓް ކޭމްޕެއްގައި ބައިވެރިވަނީ!

ސްޓާރސް ބާސްކެޓްބޯޅަ އެކަޑަމީގެ ހަތަރު ކުޅުންތެރިއަކަށް ސްރީލަންކާގެ ބާސްކެޓް ކޭމްޕެއްގައި ބައިވެރިވުމުގެ ފުރުޞަތު ލިބިއްޖެއެވެ.

ސްޓާރސް އެކަޑަމީގެ އެލީޓް ލެވެލްގެ ހަތަރު ކުޅުންތެރިން ބައިވެރިވަނީ ސްރީލަންކާގެ އިމްޕެކްޓް ހޫޕްސް ލެޕް އެކަޑަމީން ގެ ތަމްރީނުތަކުގައެވެ. ސްރީލަންކާގެ ހާލަތަށް ބެލުމަށްފަހު އެކޭމްޕް އޮންނާނީ މިއަހަރުއެވެ. ކޭމްޕްގައި ބައިވެރިވުމުގެ ފުރުޞަތު ލިބުނު ހަތަރު ކުޅުންތެރިންނަކީ އައިޝާ ޒައިނާ ހަފީޒު, އަސްނާ އަޚުތަރު ރަޝާދު, އަހުމަދު އާސް ފަރުހާދު, އަދި މުޙައްމަދު ޒާކިން އިސްމާއީލްއެވެ. މިއީ ފަސް ދުވަހުގެ ކޭމްޕެކެވެ.

ކޭމްޕްގައި ބައިވެރިވާން ފުރުޞަތު ލިބޭ ކުޅުންތެރިން ކަނޑައެޅީ ސްރީލަންކާ އެކަޑަމީގެ ޓްރެއިނަރ އަދި ފައުންޑަރ ޕްރަނީތް އުޑުމަލަގާލާ ރާއްޖެ އައިސް ސްޓާރސް އެކަޑަމީގެ ކުޅުންތެރިންނަށް ހަތަރު ދުވަހުގެ ކޭމްޕެއް ބޭއްވުމަށްފަހުއެވެ. ކުޅުންތެރިން ކަނޑައެޅީ މިމެއިމަހު ބޭއްވި ކޭމްޕްގައި ކުޅުނުންތެރިން ދެއްކި ކުޅުމަށް ބަލައިގެންނެވެ.

ސްޓާރސް އެކަޑަމީއަކީ ރާއްޖޭގައި މިހާރު އެންމެ ފުޅާކޮށް ހިންގަމުން އަންނަ އެއް އެކަޑަމީއެވެ. އެ އެކަޑަމީން ތަމްރީނުކުރަނީ ބާސްކެޓް ކުޅުންތެރިންނެވެ.