ތިލަފުށި ފަޅުގައި ގަވާއިދާ ޚިލާފަށް ބަހައްޓާފައި ހުރި އުޅަނދުތައް ނެގުމަށް 30 ދުވަހުގެ މުހުލަތެއް

ކ. ތިލަފުށި ފަޅުގައި ގަވާއިދާ ޚިލާފަށް ބަހައްޓާފައި ހުރި އުޅަނދުތައް ނެގުމަށް ހައުސިންގ ޑިވަލޮޕްމެންޓް ކޯޕަރޭޝަން، (އެޗްޑީސީ) އިން އަންގައިފިއެވެ.

އެޗްޑީސީން ބުނީ، ގްރޭޓާ މާލެ އިންޑަސްޓްރިއަލް ޒޯން ލިމިޓެޑް (ޖީއެމްއައިޒެޑްއެލް) އާއި އެޗްޑީސީ އެއްކޮށްލުމާއި ގުޅިގެން ތިލަފުއްޓާއި ގުޅީފަޅު މިހާރު ބަލަހައްޓަމުން އަންނަނީ އެ ކޯޕަރޭޝަނުން ކަމަށެވެ. އެހެންކަމުން ތިލަފުށި ފަޅުގައި ގަވާއިދާ ޚިލާފަށް ބަހައްޓާފައިވާ އުޅަނދުތައް ނެގުމަށް އެކި ފަހަރުމަތިން އިއުލާން ކުރެވިފައިވީ ނަމަވެސް އެކަން އެގޮތަށް ކޮށްފައި ނުވާކަމަށެވެ.

އަދި އުޅަނދުތައް އެ ސަރަހައްދުން ނަގާފައި ނުވުމުގެ ސަބަބުން، އެޗްޑީސީއާ ސަރުކާރުން ކ. ތިލަފުށީގައި ހިންގަން ރާވާފައިވާ ޕްރޮޖެކްޓުތައް ހިންގުމަށް ހުރަސް އެޅިފައިވާކަމަށެވެ. ބައެއް އުޅަނދުތައް އެ ސަރަހައްދަށް އަޑިއަށް ގޮސްފައި ހުރުމުގެ ސަބަބުން ތިމާވެއްޓަށް ބޮޑެތި ގެއްލުންތަކެއް ލިބެމުންދާކަންވެސް ވަނީ ފާހަގަކޮށްފައެވެ.

އެހެންކަމުން ގަވާއިދާ ޚިލާފަށް އެ ފަޅުގައި ބައްހައްޓާފައިހުރި އުޅަދުތައް 30 ދުވަހުގެތެރޭގައި ނެގުމަށް ވަނީ މުހުލަތު ދީފައެވެ. އުޅަނދުތައް ނުނަގާނަމަ އެ ތަކެތި ނަގާ ނައްތާލެވޭނެ ކަމަށް އެޗްޑީސީން ކުރި އިއުލާނުގައިވަނީ ބުނެފައެވެ.